အင်း ဒကာက မေးမှတော့ ဦးဇင်းလည်း သိသလောက် အသိဉာဏ်များဖြင့် ဖြေရှင်းပေးပါမယ်။ မြတ်ဗုဒ္ဓတောင် တစ်ချို့နေရာတွေမှာ မပြောမဟောသင့်တဲ့ စကားလုံးတွေကို ပြောဟောခဲ့သေးရတယ်ဆိုတော့ ဦးဇင်းလည်း ဦးဇင်းသိသလောက် ပြောပြပေးပါမယ်။
လူတစ်ယောက်ကို ချစ်တဲ့နေရာမှာ ပိုင်ဆိုင်လိုသောအချစ်၊ သနားလို့ ကူညီချင်သောအချစ်၊ သူတစ်ပါးစိတ်ချမ်းသာအောင် ပြုလုပ်ပေးချင်သောအချစ်စသည်ဖြင့် အချစ်များစွာ ရှိပါလိမ့်မယ်။ မိမိချစ်တဲ့အချစ်ဟာ ဘယ်အမျိုးစားထဲတွင် ပါဝင်သလဲဆိုတာ အရင်စဉ်းစားပါ။ မိမိချစ်တဲ့အချစ်သည် ပိုင်ဆိုင်လိုသောအချစ်ဖြစ်ပြီး သူ့ကိုမပိုင်ဆိုင်ရလျှင် မိမိမပိုင်ဆိုင်ရမှုကြောင့် သောက၀မ်းနည်းမှုတွေ စိတ်ခံမြင်းမှုတွေ ဖြစ်နေပါလိမ့်မယ်။
သနားချစ်၊ ကူညီပေးချင်သောအချစ်တို့ဖြင့် မိမိက သူတစ်ပါးကိုချစ်လျှင်တော့ မိမိသည် သူ့အပေါ်မှ ပြန်လည်တုန့်ပြန်မှု မည်သို့ပင်ဖြစ်ပေါ်လာစေကာမှု မိမိမှာ သောက၀မ်းနည်းမှုစတာတွေ ဖြစ်လာမှာ မဟုတ်ပါဘူး။
ဘုရားရှင်ကဟောခဲ့တာ ရှိတယ်။ ချစ်ခင်နှစ်သက်ရသောသူနဲ့ ကွဲကွာရခြင်းသည် ဒုက္ခဆင်းရဲဖြစ်သလို မချစ်မနှစ်သက်ရသောသူနဲ့ ပေါင်းသင်းနေထိုင်ရခြင်းသည်လည်း ဒုက္ခပါတဲ့။ အဲဒီတော့ မိမိချစ်တဲ့နေရာမှာ မိမိဝမ်းနည်းမှုစတာတွေ မခံစားရအောင် သူတစ်ပါးကို ပိုင်ဆိုင်ရမှ ဖြစ်မယ်ဆိုတဲ့ စွဲလမ်းစိတ်နဲ့မချစ်ဘဲ ပိုင်ဆိုင်ရသည်ဖြစ်စေ မပိုင်ဆိုင်ရသည်ဖြစ်စေ သူစိတ်ချမ်းသာအောင် ပြုလုပ်ပေးမည်ဟု စိတ်ဆုံးဖြတ်ချက်ချပြီး ချစ်မယ် စိတ်ချမ်းသာအောင်ပြုလုပ်ပေးမယ်ဆိုရင် မိမိအတွက် ကံကောင်း၍ ပိုင်ဆိုင်ရလျှင် ၀မ်းသာနိုင်သလို ကံမကောင်း၍ မပိုင်ဆိုင်ရလျှင်လည်း ၀မ်းနည်းမှုတွေ ဖြစ်လာတော့မည် မဟုတ်ပေ။
အဲဒီတော့ သူတစ်ပါးကိုချစ်တဲ့အခါ ပိုင်ဆိုင်မှု မပိုင်ဆိုင်မှုကို ကံတရားအနေနဲ့ သဘောထားပြီး သူစိတ်ချမ်းသာအောင်ပြုလုပ်ပေးမည်၊ သူ့အကျိုးကို တက်နိုင်သလောက်ပြုလုပ်ပေးလျှက် ချစ်မယ်ဆိုရင် အကောင်းဆုံးသော အချစ်ဖြစ်ပြီး ကံကောင်းလို့ပိုင်ဆိုင်ရလျှင် မိမိသည် ကံအကောင်းဆုံးသော လူတစ်ယောက်ဖြစ်ပါလိမ့်မယ်။ အကယ်၍ ကံမကောင်းလို့ မပိုင်ဆိုင်ရသော်လျှင်လည်း သူ့အတွက် စိတ်ချမ်းသာအောင်ပြုလုပ်ပေးရသော ကုသိုလ်လေးဟာ မိမိအတွက် ထာဝရကုသိုလ်လေး ဖြစ်နေမှာပါ။
တရားသဘောနဲ့ကြည့်လျှင် ဘယ်အရာမှ မမြဲဘူးဆိုပြီး မြင်သမျှကို ရှု့မှတ်နိုင်လျှင်တော့ အကောင်းဆုံးပေါ့လေ။ မိမိသည် ထိုကဲ့သို့ မြင်သမျှသော ရုပ်တရားများကို တရားသဘောနဲ့ မကြည့်နိုင်သေးလျှင် လိုချင်မှု ပိုင်ဆိုင်ချင်မှုတို့ကို စိတ်ထဲမှာ စွဲလမ်းမထားဘဲနဲ့ သူ့ကိုငါချစ်နေတာသည် သူ့စိတ်ချမ်းသာအောင် ပြုလုပ်ပေးချင်သော အချစ်စိတ်သာဖြစ်ရမည်ဟု စိတ်ဆုံးဖြတ်ထားနိုင်အောင် ကြိုးစားပေါ့လေ။ အကယ်၍ မိမိသည် ဘ၀ရေစက်ရှိလျှင် နှစ်ဦးအတူ ဘ၀ကိုလျှောက်လှမ်းရပါလိမ့်မယ်။
အကယ်၍ မိမိသည် ဘ၀ရေစက်ဖူးစာမပါလို့ ကိုယ်ချစ်တဲ့လူကို မပိုင်ဆိုင်ရလျှင်လည်း မိမိသည် သူ့ကိုစိတ်ချမ်းသာစေချင်သောအချစ်နဲ့ ချစ်ခဲ့တာမို့ မိမိမှာဝမ်းနည်းမှုတွေ ခံစားရမှာ မဟုတ်တော့ပါဘူးလေ။ ထို့ကြောင့် မိမိသည် သူတစ်ပါးကိုချစ်ရာ၌ အကျိုးလိုလားသောအချစ်ကို ဦးစားမပေးဘဲ ပေးဆပ်ချင်သာအချစ်နဲ့သာ ချစ်တတ်အောင် ကြိုးစားပါလေ။ ရှေးကံပါလျှင် အချစ်က ချက်ချင်းအကျိုးပေးမယ်။ ရှေးကံမပါလျှင်တော့ နောက်ဘ၀တွေအတွက် ပါရမီဖြည့်ခြင်းပဲလို့ သဘောထားပေါ့။
အင်း ဦးဇင်းကိုယ်တိုင်ကလည်း အချစ်စာရေးဆရာမဟုတ်သောကြောင့် ဤမျှလောက်ပဲ ဖြေပေးလိုက်ပါတယ်။ မိမိထင်မြင်ချက်မျှကိုသာ ရေးသားပေးလိုက်ခြင်း ဖြစ်ပေသည်။
ယခုတော့ ဤမျှနဲ့နားပါရစေ။
0 comments:
Post a Comment