Saturday, September 6, 2014

ဦးဇင်းစာအုပ်များ ထွက်ရှိပါပြီ


ဦးဇင်းရေးသားထားတဲ့ စာသားများကို ပထမဆုံးအကြိမ် ထုတ်ဝေဖြန့်ချီလိုက်ပါပြီ။

စာအုပ်တိုက်က ကြေးမုံသတင်းစာ၊ ဂျာနယ်တွေမှာလည်း ကြော်ညာထည့်လိုက်ပြီတဲ့။

ရန်ကုန်မှာဆို အင်းဝ၊ စာပေလောကအစရှိတဲ့ စာအုပ်ဆိုင်တွေ၊ မန်းလေးမှာဆို ထွန်းဦး၊ နဂါး၊ တောင်ကြီးမှာဆို မီလျှံနာအစရှိတဲ့ မြို့တိုင်းက နာမည်ကြီး စာအုပ်ဆိုင်တွေကို ဖြန့်ချီပေးလိုက်ပြီဆိုတော့ ဝယ်ဖတ်ဖို့ပဲ လိုတော့တာပေါ့နော်။ ဝယ်ဖတ်ရကျိုးနပ်မဲ့ စာအုပ်တော့ ဖြစ်မှာပါ။

ဘာဖြစ်လို့လဲဆိုတော့ ဗဟုသုတရစရာတွေ အများကြီးကို စုစည်းထားတာဖြစ်သလို စာရေးသူရဲ့ နှစ်ရှည်လများ သင်ယူလေ့လာထားတဲ့ ပညာတွေ၊ ဖြတ်ထိုးဉာဏ်တွေ၊ အချိန်တွေပေးဆပ်ထားတဲ့ စာသားတွေမို့ပါ။




 

Tuesday, July 1, 2014

ယုံကြည်ချက်နဲ့လွဲမှားမှုများ

ယုံကြည်ချက်လွန်ကဲသူတို့သည် သူတစ်ပါးက ဘယ်အရာက ဘယ်လိုစသည်ဖြင့် အထင်ကြီး လေးစားဖွယ်၊ အံ့သြဖွယ်၊ ထူးဆန်းဖွယ်ရာတစ်စုံတစ်ခုကို ပြုလုပ်ပြောဆိုလျှင် လွယ်ကူစွာယုံကြည်ပြီး ထိုယုံကြည်ချက်အတိုင်း ပြုလုပ်ဆောင်ရွက်တတ်ကြသည်။ ထို့ပြင် လူလောကမှာ သူတစ်ပါးကို လိမ်ညာ ချင်သူများလာရခြင်းမှာလည်း သူတစ်ပါးရဲ့ လှည့်ကွက်များကို မစဉ်းစား၊ မတွေးခေါ်၊ သုံးသပ်ဆင်ခြင်ဉာဏ်မရှိဘဲ အလွယ်တကူ ယုံကြည်လွယ်ခြင်းကြောင့် ဖြစ်သည်။

ဗုဒ္ဓဝါဒကို ယုံကြည်သူများဟု သတ်မှတ်ခံယူထားသော ဗုဒ္ဓဘာသာနွယ်ဝင်များပင် ဗုဒ္ဓဝါဒမှတစ်ပါး အခြားများစွာသော သူတစ်ပါးတို့၏ မှားယွင်းသောလုပ်ရပ်များကို စွဲမြဲစွာယုံကြည်လျက် ပြုလုပ်နေကြသည်မှာ အံ့သြဖွယ်ရာပင် မြင်တွေ့ကြားသိနေရ၏။ ဥပမာ-ဗေဒင်ဆရာက ယတြာချေခိုင်းလျှင် ခိုင်းသည့်အတိုင်း မလွဲမသွေ ပြုလုပ်ကြသည်။ ထိုယတြာကြောင့် မိမိဆိုးကျိုးများပျောက်ကင်းပြီး ကောင်းကျိုးများရလာသည်ဟု ထင်မြင်ယူဆကြသည်။ အမှန်မှာ ယတြာချေခိုင်းသည့် အလုပ်ကိစ္စများသည် မကောင်းမှုအကုသိုလ် အလုပ်များကို ပြုလုပ်ခိုင်းသည်မဟုတ်ဘဲ ကောင်းမှုကုသိုလ်အလုပ်များသာ ပြုလုပ်ခိုင်းနေသည်ကို သတိမထားမိကြချေ။ တကယ်တော့ မိမိတို့မှာ ယတြာချေသောကြောင့် ကောင်းကျိုးဖြစ်လာသည်မဟုတ်၊ ကောင်းသည့်အလုပ်ကို ပြုလုပ်သည့်အတွက် ကောင်းကျိုးများဖြစ်လာရခြင်းပါ။ ထို့ကြောင့် မိမိပြုလုပ်နေသော ယတြာချေခြင်းသည် မကောင်းသောအလုပ်လား၊ ကောင်းသောအလုပ်လားဆိုတာ စဉ်းစားကြည့်ပြီး ကောင်းသည့်အလုပ်ကြောင့် ကောင်းကျိုးရသည်ကိုတော့ မယုံကြည်ကြဘဲ ယတြာချေသောကြောင့် ကောင်းကျိုးရသည်ဟု လွဲမှားသောအသိအမြင်များသာ မှတ်ယူနေကြပေသည်။

ရက်ရာဇာ၊ ပြဿဒါးအယူအဆများသည် မိမိတို့ယုံကြည်မှုကြောင့် ကောင်းဆိုးများနှင့် ကြုံတွေ့ရခြင်း ဖြစ်ပေသည်။ မိမိက ရက်ရာဇာနေ့သည် ကောင်းသည်ဟုယူဆပြီး ကောင်းသောအလုပ်များပြုလုပ်လျှင် ထိုအလုပ်သည် အောင်မြင်လေသည်။ မိမိက ပြဿဒါးနေ့သည် မကောင်းသောနေ့ဟုယူဆပြီး မကောင်းသောအလုပ်များပြုလုပ်လျှင် ထိုအလုပ်သည် အောင်မြင်မှုနည်းလိမ့်မည်။ အဘယ်ကြောင့်ဆိုသော် မည်သည့်လုပ်ငန်းမဆို မိမိယုံကြည်ချက်နှင့်ပြုလုပ်သည့်လုပ်ငန်းသာ အောင်မြင်သောကြောင့် ဖြစ်ပေသည်။ ထို့ကြောင့် ရက်ရာဇာသည် ကောင်းသောနေ့၊ ပြဿဒါးသည် မကောင်းသောနေ့စသည်ဖြင့် နေ့၊ လ၊ နက္ခတ်စသည်တို့ကို သတ်မှတ်လုပ်ကိုင်ဆောင်ရွက်ကြရာတွင် မိမိယုံကြည်ချက်သည်သာ အဓိက ကျပေသည်။ မိမိက ယုံကြည်ချက်မရှိဘဲပြုလုပ်လျှင် မည်သည့်နေ့တွင်မဆို လုပ်ကိုင်ဆောင်ရွက်မှုမှန်သမျှသည် အောင်မြင်ပြီးမြောက်လိမ့်မည် မဟုတ်ပါပေ။ ထို့ကြောင့် ရက်ရွေးခြင်းထက် မိမိယုံကြည်ချက်သည်သာ အဓိကဖြစ်သည်ကို အထူးဂရုစိုက် မှတ်သားလိုက်နာသင့်ပေသည်။

ဓဇဂ္ဂသုတ်တွင် မြတ်ဗုဒ္ဓက နတ်သားများအား စစ်တိုက်သောအခါ မိမိတို့တွင် ဘေးရန်အန္တရာယ်ကျရောက်၍ ကြောက်ရွံ့ခြင်း၊ တုန်လှုပ်ခြင်းများဖြစ်လာလျှင် မိမိတို့၏ ခေါင်းဆောင်အလံများကို မော့ကြည့်လိုက်ပါ။ ထိုအခါ သင်တို့သန္တာန်မှာ ကြောက်ရွံ့ခြင်း၊ တုန်လှုပ်ချောက်ခြားခြင်းများ ပျောက်ကင်းသွားပြီး မည်သည့်ဘေးအန္တရာယ်ကိုမဆို ကျော်ဖြတ်နိုင်လိမ့်မည်ဟု ပြောကြားခြင်းမှာ နတ်စစ်သည်များ အတွက် ယုံကြည်ချက်ဖြင့် ခွန်အားပေးလိုက်ခြင်း ဖြစ်ပေသည်။
ထို့အတူ တောတောင်ထဲတွင် သီတင်းသုံးနေထိုင်သော သံဃာတော်များအား မြတ်ဗုဒ္ဓက “သင်တို့မှာ ဘေးရန်အန္တရာယ်များ ကြုံတွေ့ရ၍ ကြောက်ရွံ့ခြင်းများဖြစ်လာလျှင် ရတနာသုံးပါး ဂုဏ်တော်တစ်ခုခုကို ရွတ်ဆိုပွားများ အာရုံပြုပေးလိုက်ပါ။ သင်တို့သန္တာန်မှာ ကြောက်ရွံ့ခြင်းများကင်းပြီး လိုရာခရီးရောက်ပါလိမ့်မည်ဟု မိန့်တော်မူခဲ့ပေသည်။ (သံ၊ ၁၊ ၂၂၀)

အထက်ပါ မြတ်ဗုဒ္ဓ၏ မိန့်ဆိုချက်များတွင် မည့်သည့်အဆောင်လက်ဖွဲ့ကို ဆောင်ထားပါ။ မည်သည့်နေ့ရက်တွင် ပြုလုပ်ပါ။ မည်သည့်နေ့ရက်သည် မိမိလုပ်ငန်းများ အောင်မြင်မည့်ရက်၊ မည်သည့်နေ့ရက်သည် မိမိလုပ်ငန်းများ ဆုံးရှုံးမည့်ရက်ဟူ၍ မိန့်ကြားထားခြင်း မရှိပါပေ။

တဖန် နက္ခတ္တဇာတ်တွင် မြတ်ဗုဒ္ဓလက်ထက်က သူဌေးသား၏မိဘများနှင့် သူဌေးသမီး မိဘများ သည် နှစ်ဦးနှစ်ဘက်ဆွေးနွေးတိုင်ပင်ပြီး လက်ထပ်ပွဲကျင်းပရန် ရက်သတ်မှတ်လိုက်ကြသည်။ ထိုသို့ ရက်သတ်မှတ်ပြီးမှ သူဌေးသားမိဘများသည် သူတို့သတ်မှတ်ထားသောနေ့ရက်သည် မင်္ဂလာနေ့ရက် ကောင်း ဟုတ်မဟုတ်သိလိုသဖြင့် ၎င်းတို့ကိုးကွယ်ဆည်းကပ် အထင်ကြီးလေးစားရသောပုဂ္ဂိုလ်ထံ သွားရောက်မေးမြန်းကြသည်။
ထိုအခါ သူတို့ဆရာဖြစ်သူက “ငါ့ကို အစဦးဆုံးကတော့ မတိုင်ပင်၊ အကြံဉာဏ်မတောင်းဘဲနဲ့ ယခုမှ လာရောက်မေးမြန်းရမလားဆိုပြီး မင်္ဂလာရက်သတ်မှတ်ထားသောနေ့သည် နက္ခတ်မကောင်းသဖြင့် လက်ထပ်ပွဲကျင်းပလျှင် ဆိုးကျိုးခံစားရမည်”ဟု ပြောလိုက်သည်။ သူဌေးသားနှင့် မိဘများသည် ကံ၊ ကံ၏အကြောင်းအကျိုးကို မယုံကြည်ကြဘဲ ဆရာဖြစ်သူ၏စကားကို ယုံကြည်ပြီး လက်ထပ်မင်္ဂလာပွဲကို နောက်ရက်ရွေ့ရန် သတိုးသမီးဘက်သို့ အကြောင်းကြားလိုက်ပြီး မင်္ဂလာပွဲအခမ်းအနား မသွားရောက်ကြပေ။ ထိုအခါ သတိုးသမီးဘက်မှ မိဘများသည် မင်္ဂလာပွဲကျင်းပရန် သတ်မှတ်ပြီးမှ ရွေ့ပြောင်းရမလားဆိုပြီး တခြားသူနဲ့ လက်ထပ်ပေးလိုက်သည်။

နောက်တစ်ရက် သူဌေးသားတို့ မင်္ဂလာပွဲကျင်းပရန် လာရောက်ကြသောအခါ သတိုးသမီးသည် တစ်ပါးသူနဲ့ လက်ထက်ပြီးပြီဟု ပြောကြားလိုက်လေသည်။ ထိုအခါ သတိုးသားသည် သူချစ်ခင်ရသူ သတိုးသမီးမရရှိသည့်အတွက် ဝမ်းနည်းကြေကွဲမှုများ ခံစားရသည့်အပြင် မိမိချစ်ခင်နှစ်သက်သော ဇနီးကောင်းတစ်ယောက် ဆုံးရှုံးခြင်းအကျိုးပါ ရရှိခဲ့သည်။

ထိုအဖြစ်အပျက်ကို သိမြင်သောအခါ မြတ်ဗုဒ္ဓက “နက္ခတ်ကောင်းမကောင်း တွက်ချက် စဉ်းစားနေသောလူမိုက်ကို အကျိုးစီးပွားများက ကျော်လွန်သွားသည်။ အကျိုးစီးပွားကို လိုချင်သူအတွက် အကျိုးရှိသော အလုပ်သည်ပင် နက္ခတ်ကောင်းဖြစ်၏။ ကောင်းကင်က ကြယ်တာရာတို့သည် ဘာလုပ်နိုင်ကြမည်နည်း”ဟု ဟောကြားတော်မူခဲ့ပါသည်။ (နက္ခတ္တဇာတ်၊ ဇာတက၊ ဋ္ဌ၊ ၁၊ ၂၇၄။)

မြတ်ဗုဒ္ဓက မည်သို့ပင် နက္ခတ်ကြယ်တာရာများသည် အကျိုးကိုမဖြစ်စေနိုင်၊ မိမိယုံကြည်မှုနှင့် လုပ်ဆောင်ချက်တို့သည်သာ မိမိအတွက် အကျိုးဖြစ်ထွန်းစေသည်ဟု မိန့်ကြားခဲ့သည်ကို ဗုဒ္ဓဘာသာဝင် အများစုသည် နက္ခတ်ကြယ်တာရာ၊ ဂြိုလ်၊ ရက်ရာဇာ၊ ပြဿဒါးများကို ယုံကြည်နေကြခြင်းသည် အလွန်အံ့သြစရာပင် ဖြစ်နေပေသည်။ ထိုထက်ဆိုးသည်က ဗုဒ္ဓဘာသာဝင်များသည် အပေါ်ယံ နေ့ရက်တို့သာ ယုံကြည်ကြရုံသာမကဘဲ မိမိကောင်းမှုကုသိုလ်လုပ်မည့် ကောင်းမှုကုသိုလ် အလှူပွဲများမှအစ နေ့ရက်များရွေးချယ်နေကြသည်မှာ လွန်လွန်းသည်ဟု ထင်မြင်မိပါသည်။ ထို့ကြောင့် အလုံးစုံကို သိမြင်တော်မူသည့် မြတ်ဗုဒ္ဓပြောပြခဲ့သည်ကို မယုံကြည်နိုင်၊ လက်မခံနိုင်ဖြစ်နေပြီး သာမန်လူများ ပြောပြသည်ကို ယုံကြည်လျက် မိမိကောင်းမှုကုသိုလ်လုပ်ငန်းများပါ နောက်ဆုတ်နေမည်ဆိုလျှင် မိမိသေသွားခဲ့ပါက ကောင်းမှုကုသိုလ်များသာ မရရှိဘဲ ဖြစ်နေပါလိမ့်မည်။

ထိုကဲ့သို့ မိမိမသေခင် သေချာရေရာမည့် ကုသိုလ်လုပ်ငန်းများပါ ရက်ရွေးနေ၍ မလုပ်ဖြစ်ခဲ့ဘဲ သေသွားလျှင် မည်မျှလောက် ဝမ်းနည်းစရာ နောင်တရစရာ ကောင်းနေမည်လည်းဆိုတာ သေချာစဉ်းစားကြည့်စေချင်ပါသည်။

တစ်ခါ အောက်ပါဖြစ်ရပ်မှန်လေးကလည်း စာဖတ်သူတို့အတွက် အသိပညာရစေမှာပါ။

သူငယ်ချင်းနှစ်ယောက် တက္ကသိုလ်ဝင်တန်းဖြေပြီးသောအခါ တစ်ယောက်က စစ်ထဲဝင်မည်။ တစ်ယောက်က ဆရာဝန်လုပ်မည်ဆိုပြီး ရည်ရွယ်ချက်ကိုယ်စီ ထားခဲ့ကြသည်။ ဒီလိုနဲ့ တက္ကသိုလ်ဝင်တန်း အောင်မြင်ပြီးသောအခါ စစ်သားဖြစ်ချင်သူက စစ်ထဲဝင်ခဲ့သည်။ ဗိုလ်လောင်းသင်တန်းပြီးသောအခါ စစ်သားဖြစ်သည့်သူငယ်ချင်း ရှေ့တန်းထွက်ရမည့် အခြေအနေ ရောက်လာသောအချိန် ဆရာဝန် သူငယ်ချင်းက “မင်းသွားလေရာမှာ ဘေးရန်အန္တရာယ်တွေကနေ ကင်းရှင်းအောင် ငါလက်ဖွဲ့လေးတစ်ခု ပေးလိုက်မယ်။ ဒီလက်ဖွဲ့လေးဟာ ငါတို့မျိုးရိုးစဉ်ဆက် ယုံကြည်စွာနဲ့ လက်မှာပတ်ထားခဲ့ကြတဲ့ အရာလေးပါ။ ဒါလေးကို မင်းဆောင်ထားမယ်ဆိုရင် မင်းအန္တရာယ်မျိုးစုံကနေ ကင်းလွတ်လိမ့်မယ်”ဟုပြောပြီး စာရွက်ခေါက်လေးတစ်ခုပေါ်မှာ အဝတ်စလေးပတ်ထားသော လက်ဖွဲ့တစ်ခု ပေးလိုက်သည်။

စစ်သားဖြစ်သူသည် သူငယ်ချင်းပြောသည့်စကားကို ယုံကြည်ချက်အပြည့်နှင့် လက်ဖွဲ့ကလေး လက်မှာအမြဲပတ်တီးထားပြီး ရှေးတန်းသို့ လေးကြိမ်တိုင်တိုင် ထွက်ခဲ့ရသော်လည်း မည်သည့်အန္တရာယ်မှ မကျရောက်ဘဲ ကျန်သူများသာ အန္တရာယ်ကြုံတွေ့ရခြင်းသည် သူငယ်ချင်းပေးလိုက်သော လက်ဖွဲ့အဆောင်ကြောင့်ဖြစ်မည်ဟု ယုံကြည်နေသည်။ ရှေ့တန်းသို့လေးကြိမ် ထွက်ခဲ့ပြီးနောက် ခွင့်ရသည်နှင့် သူငယ်ချင်းဆရာဝန်ဆီ အလည်သွားသောအခါ ဆရာဝန်ဖြစ်သည့် သူငယ်ချင်းအား “သူငယ်ချင်း၊ မင်းပေးလိုက်တဲ့ လက်ဖွဲ့အစွမ်းကြောင့် ငါ့မှာ ရှေ့တန်းလေးကြိမ်ထွက်ခဲ့ရပေမဲ့ ဘာအန္တရာယ်မှ မကြုံတွေ့ ခဲ့ရဘူး။ မင်း ငါ့ကို ခုလို အစွမ်းထက်တဲ့   လက်ဖွဲ့ပေးတဲ့အတွက် ကျေးဇူးဆပ်လို့မကုန်အောင် ကျေးဇူးတင်ပါတယ်”ဟု ပြောသောအခါ ဆရာဝန်ဖြစ်သူက “မင်းငါ့ပေးတဲ့လက်ဖွဲ့ကို တစ်ခါမှ ဖြုတ်မကြည့်ဖူးလား” ဟု မေးလိုက်သည်။ ထိုအခါ စစ်သားဖြစ်သူက “ဖြုတ်ကြည့်စရာမလိုအောင် အစွမ်းထက်နေတာမို့ မကြည့်ပါဘူး”ဟု ဖြေလေသည်။

ထိုအခါ ဆရာဝန်သူငယ်ချင်းက ငါပေးလိုက်သောလက်ဖွဲ့သည် ဘာလက်ဖွဲ့လဲဆိုတာ ကြည့်လိုက်ပါဦးဟု ပြောသောအခါမှ စစ်သားဖြစ်သူ ဖွင့်ဖတ်ကြည့်သောအခါ ဒေါသပုန်းထပြီး လက်ဖွဲ့ကို လွင့်ပစ်လိုက်လေသည်။ ထိုအချိန်မှစ၍ စစ်သားဖြစ်သူသည် လက်ဖွဲ့အပေါ် ယုံကြည်မှုမရှိသောအခါ သူ့မှာ ယုံကြည်ချက်ကင်းမဲ့ပြီး ခွန်အားကင်းမဲ့နေသဖြင့် နောက်တစ်ကြိမ် ရှေ့တန်းထွက်ရသောအခါ ကျဆုံးခဲ့သည်။ ဆရာဝန်ဖြစ်သူ သူငယ်ချင်းပေးလိုက်သည့် လက်ဖွဲ့သည် သူငယ်ချင်းအား နောက်ပြောင်လိုသည့်စိတ်နှင့် ရေးပေးလိုက်သော စာရွက်သာဖြစ်သည်။ စာရွက်ကလေးအတိုင်းပေးလျှင် သူ့ရှေ့မှာပင် ဖတ်ကြည့်ပါက သူ့ကို ဒေါသပုန်းထမည်စိုးသဖြင့် စာရွက်ကိုခေါက်လိပ်ပြီး အဝတ်စနှင့် စည်းပေးလိုက်ခြင်း ဖြစ်သည်။ ဆရာဝန်ဖြစ်သူ ရေးပေးလိုက်သည့်စာမှာ “မင်းသေရင် မင်းနှမ ငါယူမည်”ဟူသတည်း။

အထက်ဖော်ပြခဲ့ပါ သာဓကဝတ္ထုတို့ကို ထောက်ဆကြည့်မည်ဆိုပါက မိမိတို့သည် အခြားသောပုဂ္ဂိုလ်များ၏ စကားများကို ယုံကြည်ကြခြင်းမရှိဘဲ မြတ်ဗုဒ္ဓ၏ ဆုံးမသြဝါဒများကိုသာ ယုံကြည်ကြမည်။ မြတ်ဗုဒ္ဓမိန့်တော်မူခဲ့သည့် တရားတော်များရွတ်ဆိုပွားများပြီး တရားတော်များအတိုင်း ကျင့်သုံးနေထိုင်မည်။ သူတော်ကောင်းများ နှစ်သက်သဘောကျသည့် အလုပ်ကိစ္စများကိုသာ လုပ်ကိုင်ဆောင်ရွက်ကြမည်ဆိုလျှင် မည်သည့်လက်ဖွဲ့ကိုမျှ ဆောင်နေစရာမလိုသကဲ့သို့ နေ့ရက်များကိုလည်း ရွေးချယ်စရာမလိုဘဲ မိမိတို့ဘဝမှာ ချမ်းသာသုခများပြည့်စုံပြီးသကာလ မြတ်ဗုဒ္ဓတို့သွားရာလမ်းကို မလွဲဧကန် လျင်မြန်စွာရောက်ရှိပါလိမ့်မည်။

မှတ်ချက်။ ။ ဂျာနယ်၊ မဂ္ဂဇင်းများသို့ ထည့်သွင်းဖော်ပြခြင်း၊ ဖြန့်ဝေခြင်းများ မည်သူမဆို ပြုလုပ်နိုင်ပါသည်။ သို့သော် စာရေးသူရေးထားသည့်အတိုင်း အပြည့်စုံ ထည့်သွင်းပေးဖို့တော့ လိုအပ်ပါလိမ့်မည်။

အရှင်ကောမလ ဆန်နီနေမင်း
သာသနတက္ကသီလ ဓမ္မာစရိယ
B.A (Buddhism), M.A (Sri Lanka)
Ph.D (Thesis), Sri Lanka
ရွှေပြည်သာဓမ္မရိပ်သာ ကျောင်းထိုင်ဆရာတော်
ရပ်စောက်မြို့အနီး၊ ရွှေညောင်-ပင်းတယကားလမ်းဘေး၊
Ph-0933079721. 0973069549.

Tuesday, March 18, 2014

ဗုဒ္ဓဘာသာ ယဉ်ကျေးမှု မေးခွန်းနှင့်အဖြေများ

လွန်ခဲ့သော တစ်လကျော်က မြဝတီမြို့နှင့် ရွှေကုက္ကိုမြိုင်ရွာသို့ တရားဟောကြွရင်း ကလေးများကျောင်းပိတ်ရင် ယဉ်ကျေးလိမ္မာသင်တန်းဖွင့်ပြီး သင်ပေးချင်တယ်။ ဒီရွာက လူကြီးတွေ ဖြစ်မြောက်အောင် ကူညီပေးကြပါလို့ ပြောဆိုခဲ့တယ်။ ယခုတော့ ရွှေကုက္ကိုမြိုင်ရွာလူကြီးတွေက ကူညီပေးကြတာနဲ့ ယဉ်ကျေးလိမ္မာသင်တန်း ဖွင့်ဖြစ်လို့ သွားရောက်သင်ပေးခဲ့တယ်။ ကလေးတွေများတာနဲ့ သူငယ်တန်းကနေ စတုတ္ထတန်းထိကိုတော့ တခြားခွဲသင်ခိုင်းလိုက်ပြီး မိမိကတော့ ပဉ္စမတန်းမှ နဝမတန်းထိ ကလေးများကိုသာ သင်ပေးလိုက်တယ်။ ကလေးတွေ သင်တန်းတတ်ချင်အောင် အင်္ဂလိပ်လိုပါ ဘာသာရေးစာပေများ ရေးခိုင်းကျက်ခိုင်းပေးလိုက်တယ်။

ကလေးများ မိမိဘာသာတရားအကြောင်း အဓိကလိုက်နာရမဲ့ အချက်များ သေချာသိထားဖို့၊ တခြားဘာသာများအကြောင်း ဗဟုသုတရှိထားဖို့၊ သရဏဂုံသုံးပါးမြဲဖို့၊ ငါးပါးသီလ နေ့စဉ်စောင့်ထိန်းလျှင် အကျိုးများမှန်းသိဖို့၊ ဝိပဿနာအားထုတ်ခြင်းသည် မျက်မှောက်ဘဝမှာ တကယ့်ချမ်းသာစစ်အမှန်ကို ရရှိတယ်ဆိုတာသိပြီး ဆက်လက်ကျင့်ကြံနေထိုင်ချင်စိတ်ဖြစ်ဖို့ ပြောဆိုသင်ပေးတယ်။ ဒီအချက်တွေသာ သူတို့လေးတွေ ပြည့်စုံနေမယ်ဆိုရင် ဒီဘဝတွင် တောင်းစားရတဲ့ ဘဝရောက်နေပါစေ မျက်မှောက်တမလွန်မှာ စိတ်ချမ်းသာမှုတော့ ရရှိနေမှာပါ။

(၁၇.၃.၂၀၁၄) ရက်နေ့မှာ ယဉ်ကျေးလိမ္မာသင်တန်းတက်ရောက်ကြတဲ့ ကလေးငယ်ပေါင်း(၄၀၀)ကျော်ကို အတန်းခွဲပြီး စာမေးပွဲဖြေခိုင်းပြီးတာနဲ့ (၁၈.၃.၂၀၁၄)မှာ ဆုပေးပွဲပြုလုပ်ဖို့ရန်အတွက် ချက်ခြင်းအဖြေလွှာ စစ်လိုက်ရတာ နေ့(၁၂)နာရီကနေ ည(၁၂)နာရီမှ ပြီးတော့တယ်။ လူလည်း ညောင်းကိုက်သွားတော့တာပဲ။ “အော်-ဒါလည်း လူမျိုးဘာသာသာသနာအတွက် ပေးဆပ်ရတာ ဆိုတော့ မြတ်ဗုဒ္ဓရဲ့ကျေးဇူးကိုဆပ်ရာရောက်လို့ နိဗ္ဗာန်ရောက်ကြောင်းပဲမို့ ပင်းပန်းခံလုပ်ရတာပေါ့လေ။

ကလေးတွေကို သင်ပေးထားတာတွေထဲက အောက်ပါ မေးခွန်းများကို မေးဖြေခိုင်းခဲ့ပါတယ်။ ကလေးတွေဖြေခိုင်းတဲ့မေးခွန်းတွေကို မသိသေးသူများ သိရှိရအောင် တင်ပေးပါဆိုတာနဲ့ အဖြေများပါ တွဲတင်ပေးလိုက်ပါတယ်။

ဗုဒ္ဓဘာသာ ယဉ်ကျေးလိမ္မာသင်တန်း မေးခွန်းလွှာ

စာဖြေချိန်-(၂)နာရီ    Date-17.3.2014

၁။ အောက်ပါတို့ကို ဖြေဆိုခဲ့ပါ။
(က) မြတ်စွာဘုရားကို ဘာကြောင့် ရှိခိုးရပါသလဲ။
(ခ) မိဘကို ဘာကြောင့် ရှိခိုးရပါသလဲ။
(ဂ) ချမ်းသာချင်လျှင် ဘာလုပ်ရမည်နည်း။
(ဃ) မိသားစုဘဝမှာ ပျော်ပျော်ရွှင်ရွှင် နေချင်လျှင် ဘာလုပ်ရမည်နည်း။
(င) ထင်ပေါ်ကျော်ကြားချင်လျှင် ဘာလုပ်ရမည်နည်း။
၂။ ဒုစရိုက်(၁၀)ပါးကို မြန်မာလို ရေးသားခဲ့ပါ။
၃။ သင်္ဂါယနာ(၆)တန်တွင် ဒုတိယသင်္ဂါယနာနှင့် တတိယသင်္ဂါယနာအကြောင်း ကို ပြည့်စုံစွာ ရေးသားခဲ့ပါ။
၎။ သူယုတ်မာလက္ခဏာ(၄)ပါးကို ရေးသားခဲ့ပါ။
၅။ သူတော်ကောင်းဥစ္စာ(၇)ပါးနှင့် ဗြဟ္မစိုရ်တရား(၄)ပါးတို့ကို မြန်မာလို ရေးသားခဲ့ပါ။
၆။ ငယ်စဉ်အခါ ပညာမသင်ယူခဲ့မိခြင်းနောင်တနှင့် ငယ်စဉ်က အကျင့်မကောင်း ခဲ့ခြင်းနောင်တတို့ကို ရေးသားခဲ့ပါ။
၇။ မှားယွင်းသောအယူဝါဒ(၄)မျိုးကို ရေးသားခဲ့ပါ။
၈။ မဟာတာပနငရဲအကြောင်းကို ရေးသားခဲ့ပါ။
၉။ ကျောင်းပိတ်ရက်ကဗျာကို ရေးသားခဲ့ပါ။
၁၀။ အောက်ဖော်ပြပါ စိတ်ဓာတ်ရေးရာ ခေါင်းစဉ်(၂)ခုတွင် နှစ်သက်ရာခေါင်းစဉ်(၁)ခုကို သူတစ်ပါး အတုယူကျင့်သုံးစရာဖြစ်အောင် (၂)မျက်နှာခန့် ရေးသားခဲ့ပါ။
(က) After me/ you.
(ခ)  ငါနဲ့မဆိုင်ဘူးလို့ မပြောမိပါစေနဲ့။

အဖြေများ

၁။ (က) မြတ်စွာဘုရားသည် မိမိတို့အပေါ်၌ ကောင်းတာမကောင်းတာကို ခွဲခြားသိမြင်အောင် ဟောပြောဆုံးမပေးခဲ့သော ကျေးဇူးရှိသောကြောင့် ရှိခိုးရပါသည်။ မြတ်စွာဘုရားသည် မိမိတို့ တုနှိုင်းမရသော ဂုဏ်သတ္တိများရှိသောကြောင့် ရှိခိုးရပါသည်။ မြတ်စွာဘုရားသည် မိမိတို့ မပြုလုပ်နိုင်သော ပါရမီများဖြည့်ခဲ့ခြင်း၊ မြတ်ဗုဒ္ဓဖြစ်ချိန်တို့တွင်လည်း မိမိတို့အကျိုးရှိစေရန် မနားမနေ ဆိုဆုံးမသြဝါဒများ ပြုလုပ်ပေးခဲ့သော ကျေးဇူးရှိသောကြောင့် ရှိခိုးရပါသည်။
(ခ) မိဘများသည် မိမိတို့ကို လူဖြစ်လာအောင် မွေးဖွားပေးသောကျေးဇူးရှိသောကြောင့် ရှိခိုးရပါသည်။ မိဘများသည် မိမိတို့ကို လူလားမြောက်လာအောင် ကျွေးမွေးစောင့်ရှောက် ပညာသင်ပေးခဲ့သော ကျေးဇူးရှိသောကြောင့် ရှိခိုးရပါသည်။
(ဂ) ချမ်းသာချင်လျှင် သူတစ်ပါးပစ္စည်းကို ခိုးယူခြင်းမှ ရှောင်ကြဉ်ရပါမည်။
(ဃ) မိသားစုဘဝမှာ ပျော်ပျော်ရွှင်ရွှင် နေချင်လျှင် သူတစ်ပါးသားမယား ကို ပြစ်မှားစော်ကားခြင်းမှ ရှောင်ကြဉ်ရပါမည်။
(င) ထင်ပေါ်ကျော်ကြားချင်လျှင် လိမ်ညာပြောဆိုခြင်းမှ ရှောင်ကြဉ်ရပါမည်။

၂။ ဒုစရိုက်(၁၀)ပါးတို့မှာ
သူတစ်ပါးကို အသက်ကိုသတ်ခြင်း၊ သူတစ်ပါးပစ္စည်း ခိုးယူခြင်း၊ မှားယွင်းစွာ ဖောက်ပြန်ခြင်း၊ မဟုတ်မမှန် မုသားပြောခြင်း၊ ကုန်းတိုက်စကား ပြောဆိုခြင်း၊ ကြမ်းတမ်းသောစကား ပြောဆိုခြင်း၊ အကျိုးမရှိသောစကား ပြောဆိုခြင်း၊ သူတစ်ပါးကြီးပွားချမ်းသာသည်ကို ဝန်တိုခြင်း၊ သူတစ်ပါးအား မကောင်းကြံခြင်း၊ အယူမှားခြင်းတို့ ဖြစ်ပါသည်။

၃။ ဒုတိယသင်္ဂါယနာကို သာသနာတော်နှစ် (၁၀၀) ဘီစီ (၄၄၃)ခုနှစ်တွင် အိန္ဒိယနိုင်ငံ၊ ကာလာသောကမင်းလက်ထက်တွင် အရှင်ယသမထေရ်ဦးဆောင်သော ရဟန္တာ(၇၀၀)တို့မှ မြတ်ဗုဒ္ဓ၏ တရားတော်များကို မှတ်တမ်းတင်ခဲ့ကြသည်။ အချိန်ကာလအားဖြင့် (၈)လ ကြာမြင့်သည်။
တတိယသင်္ဂါယနာကို သာသနာတော်နှစ်(၂၃၅)၊ ဘီစီ(၃၀၈)ခုနှစ်တွင် အိန္ဒိယနိုင်ငံ၊ ပါဋလိပုတ်ပြည်၊ သီရိဓမ္မာသောကမင်းကြီးလက်ထွက်တွင် အရှင်မဟာမောဂ္ဂလိပုတ္တတိဿမထေရ် ဦးဆောင်းသော ရဟန္တာ(၁၀၀၀)တို့မှ မြတ်ဗုဒ္ဓ၏တရားတော်များကို မှတ်တမ်းတင်ခဲ့ကြသည်။ အချိန်ကာလအားဖြင့် (၉)လ ကြာမြင့်သည်။

၎။ သူယုတ်မာလက္ခဏာ(၄)တို့မှာ သူတစ်ပါးမကောင်းကြောင်းကို မမေးဘဲနှင့်ပြောခြင်း၊ မေးလာလျှင် အကျယ်ချဲ့၍ ပြောခြင်း၊ သူတစ်ပါးကောင်းကြောင်းကို မမေးလျှင် မပြောခြင်း၊ မေးလာလျှင် အနည်းငယ်သာပြောခြင်း၊ မိမိမကောင်းကြောင်းကို မမေးလျှင် မပြောခြင်း၊ မေးလာလျှင် အနည်းသာပြောခြင်း၊ မိမိကောင်းကြောင်းကို မမေးဘဲနှင့်ပြောခြင်း၊ မေးလာလျှင် အကျယ်ချဲ့၍ ပြောခြင်းတို့ ဖြစ်သည်။

၅။ သူတော်ကောင်းဥစ္စာ(၇)ပါးတို့မှာ သဒ္ဓါ-ကံ၊ ကံ၏အကျိုးကို ယုံကြည်ခြင်း၊ သီလ-ကိုယ်ကျင့်သီလစောင့်ထိန်းခြင်း၊ သုတ-အသိပညာ ဗဟုသုတရှိခြင်း၊ စာဂ-စွန့်ကြံပေးကမ်း လှူဒါန်းခြင်း၊ ပညာ-ကောင်းမှုမကောင်းမှုကို ခွဲခြားသိမြင်ပြီး လောကုတ္တရာပညာရှိခြင်း၊ ဟီရိ-မကောင်းမှုပြုလုပ်ရမည်ကို ရှက်ခြင်း၊ သြတ္တပ္ပ-မကောင်းမှုပြုလုပ်ရမည်ကို ကြောက်ခြင်းတို့ ဖြစ်ပါသည်။ ဗြဟ္မစိုရ်တရားလေးပါးမှာ မေတ္တာ-သတ္တဝါအားလုံးတို့အပေါ် တန်းတူညီမျှ မေတ္တာထားခြင်း၊ ကရုဏာ-သူတစ်ပါးဒုက္ခရောက်နေသည်မြင်လျှင် သနားခြင်း၊ မုဒိတာ-သူတစ်ပါးချမ်းသာသည်ကိုမြင်လျှင် ဝမ်းမြောက်ဝမ်းသာဖြစ်ခြင်း၊ ဥပေက္ခာ-သူတစ်ပါးအပေါ်၌ ချစ်ခြင်းမုန်းခြင်း တန်းတူညီမျှ ထားခြင်းတို့ ဖြစ်သည်။

၆။ ငယ်စဉ်က ပညာမသင်ယူမိခဲ့ခြင်းနောင်တ
ငယ်စဉ်အခါ ပညာသင်ရမည့်အရွယ်မှာ တက်သင့်တက်ထိုက်တဲ့ လက်မှု၊ စက်မှု စာပေပညာတို့ကို မသင်ဘဲ နေမယ်။ အပျော်အပါးလိုက်စားနေမယ်ဆိုရင် ကြီးလာတဲ့အခါ ဘ၀ရှေ့ရေးအတွက် စီးပွားလုပ်တဲ့အခါကျမှ ငယ်စဉ်ကပညာမသင်ယူခဲ့ခြင်းနောင်တတွေ ဖြစ်လာကြတယ်။ အလုပ်တစ်ခုမှာ မိမိကသူတစ်ပါးထက် ၀ီရိယမှာလည်း သာတယ်။ ဇွဲလည်းရှိပါရဲ့နဲ့ လုပ်ငန်းခွင့်မှာ ဦးစီးဦးဆောင်မလုပ်နိုင်ဘဲ မိမိထက်ငယ်သူ၊ သို့မဟုတ် အသက်အရွယ် တန်းတူဖြစ်ပါလျက် ပညာရပ်ကိုကောင်းစွာလေ့လာသူတို့ရဲ့ ခိုင်းစေမှုကို ခံရတဲ့အခါကမှ ငယ်ငယ်ကပညာမသင်ယူခဲ့ရတာ နာတယ်ကွာ၊ ငါသာသေချာလေ့လာ သင်ယူခဲ့မယ်ဆိုရင် ဒီလိုအခိုင်းခံရမှာ မဟုတ်ဘူး၊ ခုတော့ ငါဟာ သူများကို လက်ညိုးခိုင်းရမဲ့ဘဝရောက်အောင် မပြုလုပ်ခဲ့တဲ့အတွက် သူများလက်ညိုးထိုးခိုင်းတာ လုပ်ရတဲ့ဘဝဖြစ်နေရပါလားစသည်ဖြင့် နောင်တသံတွေ ထွက်တတ်ကြတယ်။ ဘယ်လိုပင်နောင်တတွေရရ အချိန်အခါနှောင်းမှရမယ်ဆိုရင် အကျိုးမရှိတော့ပါဘူး။ ဒါကြောင့် ကြီးလာတဲ့အခါ နောင်တမရအောင် ငယ်ငယ်ကတည်းက ဘ၀ရှေ့ရေးအတွက် တက်သင့်တက်ထိုက်တဲ့ပညာများကို သင်ယူဖို့ လိုပါပေတယ်။

ငယ်စဉ်က အကျင့်မကောင်းမိခဲ့ခြင်းနောင်တ
ငါငယ်စဉ်အခါတုန်းက မိဘစကားနားမထောင်ခဲ့ခြင်း၊ ဆရာသမားများစကား နားမထောင်ခဲ့ခြင်း၊ အကျင့်မကောင်းခဲ့တဲ့အတွက်ကြောင့် ကောင်းမှုများမလုပ်ခဲ့ခြင်းတို့သည် အသက်ကြီးလာသောအခါ မိမိက မိဘနေရာရောက်သောအခါ မိမိသားသမီးများက မိမိစကားနားမထောင်တဲ့အခါ၊ မိမိဆရာဖြစ်သောအခါ မိမိတပည့်များက မိမိစကားနားမထောင်သောအခါ၊ အကျင့်မကောင်းခဲ့လို့ ကောင်းမှုမရှိ၍ သေခါနီးအခါ မကောင်းသော ငရဲနိမိတ်၊ အပါယ်နိမိတ်များ မြင်လာရသောအခါကျမှ “အော်-ငါသည် ငယ်စဉ်အခါတုန်းက မိဘစကားနားမထောင်၊ ဆရာ့စကားနားမထောင်၊ အကျင့်မကောင်းခဲ့ခြင်းတို့သည် ငါပဲ ဒုက္ခရောက်ရတာပါလား”ဟု နောင်တရတတ်ပါသည်။

ဒီနောင်တဟာ မိဘဖြစ်သူတို့ သားသမီးတွေပေါ်မှာ သတိထားဆောင်ရွက်ပေးဖို့ လိုအပ်ပါတယ်။ မိမိကလေးဟာ ငယ်စဉ်ကတည်းက မကောင်းတဲ့အကျင့်ပျက်မှုတွေ တွေ့မြင်လာပြီဆိုရင် အကျိုးအကြောင်းပြောပြ ဆိုဆုံးမသင့်ပါတယ်။ လူတစ်ယောက်ရဲ့အကျင့်စရိုက်ဟာ ကြီးတဲ့အထိပါနိုင်တာကြောင့် မိဘဖြစ်သူများဟာ မကောင်းတဲ့အမူအကျင့်တွေ အတုမခိုးစေဘဲ ကောင်းတဲ့အကျင့်တွေကိုသာ သင်ပြပေးဖို့လိုအပ်ပါတယ်။ ငယ်စဉ်ကတည်းက မိမိသားလေး ခိုးတတ်မှန်းသိလျက်နဲ့ ခိုးခြင်းကြောင့် ရရှိမဲ့အပြစ်တွေကိုလည်းမပြော၊ ဆိုဆုံးမမှုလည်းမလုပ်ဘူးဆိုရင် ဒီကလေးဟာ ကြီးလာရင် သူတစ်ပါးပစ္စည်း ခိုးဖို့ရာ ၀န်လေးတော့မှာမဟုတ်ပါဘူး။ ဒီအခါမှာ ငါဒီလိုဖြစ်တာ မိဘတွေ မဆုံးမခဲ့လို့ပဲဆိုတဲ့ နောင်တတွေဖြစ်လာတတ်ပါတယ်။ ဒါကြောင့် မိဘလုပ်သူများဟာ မိမိတို့ရဲ့သားသမီးများ လိမ္မာရေးခြားရှိရေးအတွက် မကောင်းတဲ့အကျင့်ပျက်မှုတွေကို မသင်ယူစေဘဲ အခွင့်ကြုံတိုင်း သားသမီးများကို ဆုံးမပေးရပါမယ်။ ဒါမှသာ ကလေးတစ်ယောက်အသက်ကြီးလာတဲ့အခါ နောင်တရမှုတွေမဖြစ်ဘဲ ဘ၀ကို ကောင်းမွန်စွာနဲ့ဖြတ်သန်းပြီး သကာလ ပန်းတိုင်ကိုလျင်မြန်စွာ လျှောက်လှမ်းနိုင်ပါလိမ့်မယ်။

၇။ မှားယွင်းသောအယူဝါဒ(၄)မျိုးတို့မှာ အဟေတုကဒိဋ္ဌိ-မိမိတို့ခံစားနေရသော ကောင်းကျိုးဆိုးကျိုးတို့သည် မိမိတို့ပြုလုပ်ခဲ့သော အကြောင်းတရားကြောင့်မဟုတ်ဘဲ လောကကြီးဟာ သူဖြစ်ချင်တာဖြစ်သည်ဟု အကြောင်းတရားကို ပယ်သောအယူဝါဒ။ အကိရိယဒိဋ္ဌိ-မိမိတို့ကောင်းတာလုပ်လုပ်၊ ဆိုးတာလုပ်လုပ် အကျိုးတရားဆိုတာမရှိဘဲ လောကကြီးဟာ သူဖြစ်ချင်တာဖြစ်သည်ဟု အကျိုးတရားကို ပယ်သောအယူဝါဒ။ နတ္ထိကဒိဋ္ဌိ- အကြောင်းအကျိုး နှစ်မျိုးလုံးကို ပယ်သောအယူဝါဒ။ နိယတမိစ္ဆာဒိဋ္ဌိ-မှားယွင်းနေသော အယူမှားကိုပဲ ဒါမှအမှန်ပဲဟု လက်ကိုင်ထား ယုံကြည်သောအယူဝါဒ။

၈။ ထိုငရဲသို့ကျရောက်ရသော ငရဲသားများကို ငရဲထိန်းတို့က သံတောင်ပေါ်သို့ မတက်,တက်အောင် ရိုက်နှက်၍ တင်ကြသည်။ သံတောင်ပေါ်သို့ ရောက်သောအခါ ကံကြမ္မာအလျောက် လေမုန်တိုင်းများပေါ်ပေါက်လာပြီး ထိုလေမုန်တိုင်းက တောင်ခြေမှာရှိသော တံကျင်ပေါ်သို့ရောက်အောင် တိုက်လွှင့်ချလိုက်သဖြင့် တံကျင်အဖျား၌ ကားခနဲ စူးဝင်သည့် ဒုက္ခဆင်းရဲများ ခံကြရလေသည်။

၉။ “ကျောင်းပိတ်ရက်”
ကျောင်းပိတ်ရက်ဝယ်၊ အိမ်မှာနားတော့။
ဆော့ကစားလို့၊ မနေသင့်တယ်။
နိုင်တဲ့ဝန်ကို၊ ပါဝင်ထမ်းလို့။
တတ်စွမ်းသမျှ၊ ကူကြကွယ်။
ကိုယ့်အိမ်ကိုယ့်ယာ၊ သန့်သန့်ရှင်းနဲ့။
အမှိုက်လှည်းကျင်းနေရမယ်။
အားလပ်ချိန်မှာ၊ စာကိုဖတ်တော့။
မှတ်စုမှတ်ရာ၊ သုတကြွယ်။
စည်းကမ်းရိုသေ၊ ယဉ်ယဉ်ကျေးနဲ့။
လိမ္မာရေးခြား၊ တို့လူငယ်။
နောင်တစ်ခေတ်မှာ၊ ခေါင်းဆောင်ဖြစ်တော့။
စည်းစနစ်က၊ အခြေခံတယ်။
ကြိုးစားကွယ် တိုးပွားမယ်။ ။ ။


၁၀။ After you/ me

ရန်ကုန်နိုင်ငံတကာလေဆိပ်မှာ တွေ့ကြုံခဲ့တဲ့ အဖြစ်အပျက်လေးပါ။ လေဆိပ်ရဲ့ ဧည့်ခန်းမထဲမှာ မန္တလေးကိုသွားမယ့်လေယာဉ်ကို ကျွန်တော် စောင့်နေခဲ့တယ်။ ဧည့်ခန်းထဲမှာ နိုင်ငံပေါင်းစုံက နိုင်ငံခြားသားတွေ အများကြီးပဲ။ ဧည့်ခန်းထဲမှာ ရန်ကုန်မြို့တွင်းကိုဆက်တဲ့ အများသုံးတယ်လီဖုန်း တစ်ခုရှိတယ်။ အဲဒီတယ်လီဖုန်းက တယ်လီဖုန်းဆက်ခ မပေးရပါဘူး။ အဲဒီ တယ်လီဖုန်းကို ကောင်မလေးတစ်ယောက် ဆက်နေတယ်။ သူ့နောက်မှာလည်း တယ်လီဖုန်းဆက်ဖို့ စောင့်နေတဲ့သူ လေး ငါးယောက်လောက်ရှိတယ်။ ကောင်မလေးကလည်း တယ်လီဖုန်းဆက်နေတာ ပြီးကိုမပြီးနိုင်ဘူး။ မိနစ် (၂၀)လောက်ကြာမှ နောက်တစ်ယောက်အလှည့် ရောက်တော့တယ်။ အဲဒီ တစ်ယောက်ကလည်း ဖုန်းပြောလိုက်တာ အကြာကြီးပဲ။ ကျွန်တော်ဘေးနားမှာ ထိုင်နေတဲ့ နိုင်ငံခြားသားတစ်ယောက်က အဲဒီအဖြစ်အပျက်ကို နားမလည်နိုင်အောင် ဖြစ်နေပုံရတယ်။ ကျွန်တော့်စိတ်ထဲမှာ ဖုန်းပြောနေတဲ့လူတွေကိုကြည့်ပြီး “အားနာမှုမရှိလိုက်ကြတာလို့ ခံစားရတယ်။

ဒီလိုနဲ့ မန္တလေးကိုသွားမယ့်လေယာဉ် ရောက်လာပါတယ်။ လေယာဉ်ပေါ်ကိုတက်ဖို့ “စပီကာ”က ကြေညာပါတယ်။ မန္တလေးကို သွားမယ့်ခရီးသည်တွေ အားလုံး လှုပ်လှုပ်ရွရွဖြစ်သွားကြတယ်။ လေယာဉ်ပေါ်ကိုသွားဖို့ ဘတ်(စ်)ကားတစ်စီး ထိုးဆိုက်လာတယ်။ အဲဒီကားနဲ့ လေယာဉ်ဆီကို လေယာဉ်စီး ခရီးသည်တွေ သယ်ဆောင်မှာဖြစ်တယ်။ လူတွေဟာ ဘတ်(စ်)ကားပေါ်ကို အလုအယက်ပဲ တိုးဝှေ့တက်ကြတယ်။ နိုင်ငံခြားသားတွေက အေးအေးဆေးဆေးပါပဲ။ တိုးဝှေ့တက်တဲ့အထဲမှာ ကျွန်တော်လည်းပါတယ်။ ဒီလိုနဲ့လေယာဉ်ဆီကို ကျွန်တော် ရောက်သွားတယ်။ လေယာဉ်ပျံရဲ့ နောက်အနားအပေါက်က ကျွန်တော် တိုးတက်ရတယ်။ ဒီလိုပါပဲ... လေယာဉ်ပေါ်ကို တိုးဝှေ့ပြီးတက်လိုက်တယ်။ ကိုယ့်ထိုင်ခုံနဲ့ ကိုယ်ဆိုပေမယ့် ဘာကြောင့်များ တိုးဝှေ့တက်ခဲ့မှန်း ကိုယ့်ကိုယ်ကိုယ် မစဉ်းစားမိဘူး။ တိုးတာ၊ ဝှေ့တာ၊ တွန်းတာ၊ တိုက်တာ အကျင့်ပါနေလို့ပဲဖြစ်မယ်။ ဖြစ်ချင်တော့ ကျွန်တော့်ဘေးကထိုင်ခုံမှာ နိုင်ငံခြားသားတစ်ယောက် လာထိုင်တယ်။ ဧည့်ခန်းထဲမှာ တွေ့ခဲ့တဲ့သူပါ။ သူဟာ အေးဆေးတည်ငြိမ်စွာပဲ စာအုပ်တစ်အုပ်ကိုဖတ်နေတယ်။

လေယာဉ်တက်ပြီးလို့ (၁၀)မိနစ်လောက်အကြာမှာ လေယာဉ်မယ်လေးတွေက လက်တွန်းလှည်းလေးတွေကိုတွန်းပြီး အစားအသောက် လာကျွေးပါတယ်။ အပူလား။ အအေးလား။ ကြိုက်ရာသုံးဆောင်လို့ရတယ်။ ဖော့ဘူးလေးနဲ့ အသားညှပ် ပေါင်မုန့်တစ်လုံးစီ လိုက်ပြီးဝေတယ်။ ကျွန်တော့်ရဲ့ထိုင်ခုံက အတွင်းဘက်မှာပါ။ အစားအသောက်လာပြီးပေးတဲ့ လေယာဉ်မယ်လေးတွေက တစ်တန်းပြီးတစ်တန်း၊ တစ်ခုံပြီးတစ်ခုံ စနစ်တကျ ပေးဝေပါတယ်။ ကျွန်တော့်ရဲ့ ခုံအနားလည်းရောက်ရော ကျွန်တော်က ကော်ဖီတစ်ခွက်ကို လှမ်းယူလိုက်တယ်။ အသားညှပ်ဖော့ဘူးတစ်ဘူးကို လှမ်းယူလိုက်တယ်။ တကယ်တော့ အဲဒီနိုင်ငံခြားသားက လူသွားလမ်းရဲ့ဘေးမှာ နေရာယူထားသူ။ သူက အရင်ယူရမှာ။ ကျွန်တော်က အတွင်းဖက်ကခုံမှာ ထိုင်တဲ့သူ။ ကျွန်တော်က နောက်မှယူရမှာ။ ဒါပေမယ် ကျွန်တော်က အရင် လက်ကိုလှမ်းလိုက်တယ်။ အဲဒီအချိန်မှာ နိုင်ငံခြားသားက စကားတစ်ခွန်းပြောတယ်။“After you”အဲ့ဒီစကားကိုကြားကြားချင်း ကျွန်တော် နားမလည်ပါဘူး။

အစာစားရင်း ကျွန်တော်စဉ်းစားမိတယ်။“After you” တဲ့။ After ဆိုတာ... ပြီးနောက်။ you ဆိုတာ... သင်၊ မင်း၊ နင်၊ ရှင်။ ဒီတော့... “After you” ဆိုတာ “မင်းပြီးမှ”လို့ အဓိပ္ပာယ်ရတယ်။ “မင်းကို ဦးစားပေး”ပါတယ်။ “မင်းအရင်လုပ်”ပါ။ ဒီလို သဘောဆောင်တဲ့ အင်္ဂလိပ်ခေတ်ပေါ် စကားတစ်ခုပါ။ ကျွန်တော် တွေးရင်းနဲ့ ရှက်လာတယ်။ ကျွန်တော်ဟာ “After me” သမားပဲ။ ကျွန်တော်ဟာ မီးရထားလက်မှတ်တန်းစီရင်လည်း ငါရဖို့...။ ဘတ်(စ်)ကားစီးရင်လည်း ငါအရင်တက်ဖို့။ ငါ အရင်နေရာရဖို့။ ကားမောင်းရင်လည်း လမ်းဆုံမှာ ငါ အရင်ကူးဖို့။ ငါ အရင်ဖြတ်ဖို့။လမ်းကူးရင်လည်း ငါ အရင် ဟိုဘက်ရောက်ဖို့...။ အလုပ်လျှောက်ရင်လည်း ငါ အလုပ်အရင်ရဖို့...။ ငါအဆင်ပြေဖို့...။

“After me”....“After me”....“After me”....ငါပြီးမှ မင်း...။ ငါအရင်...။ ငါ့ကို ဦးစားပေး။ တွေးရင်း တွေးရင်နဲ့ ကျွန်တော် အရမ်းရှက်လာမိတယ်။

ဒီအကြောင်းကို အိမ်ရောက်တော့ အဖေနဲ့အမေကို ပြောပြမိတယ်။ အမေပြောတဲ့စကားဟာ မှတ်သားလောက်ပါတယ်။“After you” ဆိုတဲ့ စိတ်ဟာ လူကြီးလူကောင်းစိတ်ပဲ။ အိမ်မှာ ထမင်းဟင်းကို အမေကချက်တယ်။ အမေချက်ထားတဲ့ ထမင်း၊ ဟင်းကို အမေ အရင်မစားဘူး။ သားသမီးတွေကို အရင်ကျွေးတယ်။ “After you” ပေါ့ကွယ်။ ဒီလိုပဲ... မင်းအဖေဟာလည်း သူရှာလို့ရတဲ့ ငွေကြေးကို သူအရင်မသုံးဘူး။ သားသမီးတွေကို အရင်ပေးတယ်။ အရင်ကျွေးတယ်။ “After you” ပေါ့ကွယ်။ မင်းဟာလည်း မင်းညီတွေ၊ ညီမတွေနဲ့ ပတ်သက်ရင် “After you” လုပ်ရမှာပဲ။ ဒီလိုပဲ မင်းဟာ ဆရာတစ်ယောက်ဆိုတော့ တပည့်တွေနဲ့တွေ့ရင် တပည့်တွေကို “After you” လုပ်ရမယ်။ “After you” ဆိုတာ ဦးစားပေးခြင်းသဘောအပြင် စာနာခြင်း၊ နားလည်ပေးခြင်းတွေ ပါနေတယ်။ မေတ္တာတရားတွေ ပါနေတယ်။ အတ္တနည်းခြင်းသဘောတွေ ပါဝင်နေတယ်။ အဖေက ၀င်ပြောတယ်။“After me” ဆိုတာ အများအားဖြင့် လူငယ်တွေမှာ ဖြစ်တတ်ကြတယ်။ ကလေးတွေမှာ ဖြစ်တတ်ကြတယ်။ “After me” ဆိုတဲ့ စိတ်ရှိနေတဲ့သူဟာ လူကြီး မဖြစ်သေးဘူး။ စိတ်အရွယ်မရောက်ခြင်းရဲ့ အမှတ်သင်္ကေတဟာ “After me” ပဲ။ “

အသက်တွေကြီးလေလေ တပ်မက်မှုတွေ နည်းလေလေ” ဖြစ်ရမှာ။ “အသက်တွေကြီးလေလေ တပ်မက်မှုတွေများလေလေ” ဆိုရင် ဒါဟာ တော်တော်ရှက်စရာကောင်းတဲ့ “After me” ပဲ။ “After me” ဆိုတာ လောဘ၊ ဒေါသ၊ မောဟ၊ အတ္တတွေ ရင်ထဲမှာ အများကြီးရှိနေခြင်းကို ဖော်ပြလိုက်ခြင်းပဲ။ “After me” သမားဟာာ မိဘဆိုရင်လည်း မိဘ မပီသတဲ့သူပေါ့။ ဆရာဆိုရင်လည်း ဆရာမပီသတဲ့သူပေါ့။ သူငယ်ချင်းဆိုရင်လည်း သူငယ်ချင်း မပီသတဲ့သူပေါ့။ မိတ်ဆွေဆိုရင်လည်း မိတ်ဆွေ မပီသတဲ့သူပေါ့။ ဒါကြောင့် လူကြီးလူကောင်း ဖြစ်ချင်ရင် “After me” ကိုလျှော့။ “After you” ဖြစ်အောင် ကြိုးစားပေါ့ သားရယ်။ကျွန်တော်တို့ပတ်ဝန်းကျင်မှာ “After me” သမားတွေနည်းလာပြီး “After you” သမားတွေများလာရင်တော့ အရမ်းပျော်စရာကောင်းမှာပဲနော်။သူကလည်း ကိုယ့်အပေါ် “After you”။ ကိုယ်ကလည်း သူ့အပေါ် “After you”။ မိဘကလည်း သားသမီးအပေါ် “After you”သားသမီးကလည်း မိဘအပေါ် “After you”လူကြီးတွေကလည်း လူငယ်တွေအပေါ် “After you”လူငယ်တွေကလည်း လူကြီးတွေအပေါ် “After you”ဆရာကလည်း တပည့်အပေါ် “After you”တပည့်ကလည်း ဆရာ့အပေါ် “After you”အပြန်အလှန် “After you” ဆိုတဲ့....၀န်းကျင်တစ်ခုကို ကျွန်တော်တို့ ထူထောင်ကြရအောင်ဗျာ။ ။

Credit-ကိုသောင်း (ပုလဲမြေ)

ဒီဆောင်းပါးလေးကို ဦးဇင်းဖတ်မိတာတော့ တော်တော်ကြာပါပြီ။ အခုလို ကလေးတွေကို စာသင်မယ်၊ စိတ်ဓာတ်ရေးရာနဲ့ပတ်သတ်ပြီး ဘယ်အကြောင်းအရာကို စာစီစာကုံးရေးခိုင်းရင် သူတို့လေးတွေ စိတ်ဓာတ်ကောင်းရရှိစေမလဲ၊ ပါးစပ်ကပြောပြတာကို လက်တွေ့မှာချရေးခိုင်းတာဟာ သူတို့လေးတွေအတွက် စာစီစာကုံး မြန်မာစာလည်း ရေးတတ်သွားမယ်ဆိုပြီး ပါးစပ်ကနေ အထက်ပါဆောင်းပါးကို ပြောပြပေးပြီး စာစီစာကုံးရေးခိုင်းတယ်။ စာမေးပွဲမှာ ထည့်ရေးခိုင်းလိုက်တယ်။

ဒီဆောင်းပါးလေးပြောပြရင်းနဲ့ပဲ ဆက်စပ်ပြီး ပြောစရာလေးတွေပေါ်လာတာနဲ့ အောက်ပါအတိုင်း ဆက်ပြောပြပေးလိုက်တယ်။

အမေရိကန်ရှိ မိသားစုတစ်စုဟာ ရေဘေးဒုက္ခသည်များအတွက် လှူဒါန်းပေးရန် ပြင်ဆင်နေကြတယ်။ ဒုက္ခသည်မိသားစုမှာလည်း အမေရယ် သား (၂)ယောက် သမီးငယ်လေးတစ်ယောက်အားဖြင့် မိသားစု (၄)ယောက်ရှိတယ်။ လှူမဲ့မိသားစုမှာလည်း ထိုနည်းတူ မိသားစု(၄)ယောက်ပါပဲ။

အဲဒါနဲ့ လှူမဲ့မိသားစု အမေဖြစ်သူက သားသမီးတွေကို ကိုယ်မသုံးတော့တဲ့ ပစ္စည်းလေးတွေ ပေးရအောင်ဆိုပြီး အမေဖြစ်သူက သူမဝတ်တော့တဲ့ အဝတ်စားတွေ လှူဖို့ထည့်တယ်။ သား (၂)ယောက်ကလည်း သူတို့မကြိုက်တဲ့ပစ္စည်းတွေ ထည့်ကြတယ်။ အငယ်ဆုံးဖြစ်တဲ့ သမီးငယ်လေးကတော့ သူအကြိုက်ဆုံး နှစ်သက်ဆုံးဖြစ်တဲ့ ကစားစရာ အရုပ်ကလေးကို ဒုက္ခသည်ကလေးမလေးအတွက် လှူဖို့ ယူလာခဲ့တယ်။

အဲဒါကို အမေဖြစ်သူလည်းမြင်ရော သမီးလေး ဘာဖြစ်လို့ သမီးအကြိုက်ဆုံး အရုပ်လေးကို လှူရတာလဲ။ သမီး မလိုချင်တော့တဲ့ အရုပ်တွေ အများကြီးပဲ။ အဲဒါတွေ လှူဖို့ယူခဲ့ပါလို့ ပြောတဲ့အခါ သမီးဖြစ်သူက "အမေ သမီး ဒီအရုပ်လေးနဲ့ ကစားခဲ့တာ ရက်တော်တော်ကြာ ကစားခဲ့ရပေမဲ့ ဒုက္ခသည် ရွယ်တူကလေးမှာ တစ်ခါမှ ကစားရဦးမှာ မဟုတ်ဘူး။ ဒါကြောင့် သမီးက ကိုယ်ချင်းစာပြီး လှူပေးဖို့ ဆုံးဖြတ်လိုက်တာ။ သမီးတို့က ကိုယ်ချင်းစာပြီး ကိုယ်အကောင်းလိုချင်သလို သူများလည်း အကောင်းသုံးစေချင်တဲ့စိတ်ရှိရမှာပေါ့လို့ "ပြောတဲ့အခါကျမှ အမေဖြစ်သူလည်း အဝတ်စားအဟောင်းတွေ ပြန်ဖယ်ပြီး အကောင်းဆုံးအဝတ်စားတွေ လှူဖို့ပြန်ပြင်ပါတော့တယ်။ အကိုဖြစ်တဲ့ သား (၂)ယောက်လည်း သူတို့အကြိုက်ဆုံး အသုံးအဆောင်တွေ လှူဖို့ထည့်ကြပါတော့တယ်။

ဒါဟာ ကလေးကနေပေးလိုက်တဲ့ အသိပညာ ဒါနပြုပုံလေးပါ။

မိမိတို့ဟာ မဲနှိုက်တဲ့အခါ အကောင်းဆုံးကို လိုချင်တယ်။ ထီထိုးရင်လည်း အမြင့်ဆုံးဆုကို လိုချင်တယ်။ စီးပွားချမ်းသာကိုလည်း ကမ္ဘာ့ချမ်းသာဆုံး ဖြစ်ချင်ကြတယ်။ ဒါပေမဲ့ အဲဒါတွေ ဖြစ်မလာကြပါဘူး။ ဒါဟာ ဘာဖြစ်လို့လဲဆိုတော့ မိမိပေးကမ်းမှုပြုခြင်း မျိုးစေ့စိုက်တုန်းက အကောင်းဆုံး ကိုယ့်နှစ်သက်ဆုံး အရာဝတ္ထုများ မပေးကမ်း မလှူဒါန်းဘဲ အညံ့စားတွေပဲ ပေးကမ်းလှူဒါန်းခဲ့လို့ပါပဲ။ လုံးဝကို မပေးကမ်းခဲ့ဘူးဆိုရင်တော့ တောင်းစားရတဲ့အခြေနေထိ ဖြစ်ကြရမှာပါ။

ဒါကြောင့် မိမိတို့ဟာ လူကိုဖြစ်စေ သံဃာကိုဖြစ်စေ ပေးကမ်းလှူဒါန်းခြင်းများ ပြုလုပ်တော့မယ်ဆိုရင် မိမိအကြိုက်ဆုံး အကောင်းဆုံး ပစ္စည်းများဖြင့် ဒါနပြုကြစေချင်ပါတယ်။ ဒါမှ လက်ခံရရှိတဲ့သူကို စိတ်ချမ်းသာစေသလို မိမိရရှိတဲ့အချိန်မှာလည်း အကောင်းဆုံးတွေ ရရှိမှာပါ။ ဒါကြောင့် မိမိတို့ဟာ သူတစ်ပါးကို ပေးကမ်းတဲ့အခါမှာလည်း After you စိတ်ဓာတ်ဖြင့် ကောင်းတာကိုပဲ ပေးကမ်းကြဖို့ လိုအပ်ပါတယ်။ အဲဒါမှသာ မိမိတို့ဟာ မြတ်ဗုဒ္ဓရဲ့ နည်းလမ်းကို လိုက်နာရာလည်း ရောက်မှာပါ။

မြတ်ဗုဒ္ဓဟာ After you စိတ်ဓာတ်ရှိလို့သာလျှင် လေးသင်္ချေနှင့်ကမ္ဘာတစ်သိန်းကာလပတ်လုံး သူတစ်ပါးကောင်းစားရေးအတွက် ခန္ဓကိုယ်မှာရှိတဲ့အရာရော၊ အပြင်မှာရှိတဲ့ ပစ္စည်းဥစ္စာ၊ ဇနီးမယားသားသမီးများကိုပါ ပေးကမ်းခဲ့တာပါ။ မြတ်ဗုဒ္ဓဖြစ်တဲ့အချိန်မှာလည်း သူတစ်ပါးအတွက် တစ်ရက်ကို (၂၄)နာရီရှိရာက (၂၂)နာရီခန့် မနားမနေ အလုပ်လုပ်ပေးခဲ့ပါတယ်။ ဒီလိုတွေပြုလုပ်ပေးတာဟာ မြတ်ဗုဒ္ဓသည် After you စိတ်ဓာတ် ဖြစ်ပါတယ်။ ဒါကြောင့် မိမိတို့သည် အသက်ရှင်သမျှကာလပတ်လုံး After you စိတ်ဓာတ်ကို လက်ကိုင်ကျင့်သုံးရမှာပါ။ ဒါမှသာ မိမိတို့သည် မျက်မှောက်သံသရာမှာ ပြီးပြည့်စုံသော ပုဂ္ဂိုလ်တစ်ယောက်ဖြစ်ပြီး ချမ်းသာသုခအစစ်မှန်ကို ခံစားကြရပါလိမ့်မယ်။

အဲဒီလို ကလေးတွေကိုပြောပြပေးပြီး သူတို့လေးတွေ ဦးနှောက်ထဲမှာ မှတ်မိတာတွေ များပေမဲ့လည်း စာမေးပွဲဖြေချိန်ကို ငဲ့ညာပြီး စာရွက်(၂)မျက်နှာခန့် ဖြေဆိုခိုင်းလိုက်ပါတယ်။

ကိုင်း-ဒီလောက်ဆိုရင်တော့ ဦးဇင်းစာဖတ်ပရိသတ်များလည်း ကလေးတွေလို ဗဟုသုတအသိပညာများ တိုးပွားပြီးမို့ လိုက်နာကျင့်သုံးနိုင်လောက်ပြီ ထင်ပါတယ်။ မိမိတို့နဲ့ နီးစပ်ရာကလေးများကိုလည်း တဆင့်ပြန်လည် သင်ပေးကြပေါ့လေ။

စာဖတ်ပရိသတ်များ အသိပညာဗဟုသုတကြွယ်ဝပြီး အများအကျိုး ဆောင်ရွက်နိုင်ကြပါစေလို့ ဆန္ဒပြုလျက်......။

အရှင်ကောမလ ဆန်နီနေမင်း
သာသနတက္ကသီလ ဓမ္မာစရိယ
B.A (Buddhism), M.A (Sri Lanka)
Ph.D (Thesis) (သီရိလင်္ကာ)
ဖုန်း။ 09-33079721. 09-420064265











ယဉ်ကျေးမှုကဗျာများ

“ကျောင်းပိတ်ရက်”

ကျောင်းပိတ်ရက်ဝယ် အိမ်မှာနားတော့။
ဆော့ကစားလို့ မနေသင့်တယ်။
နိုင်တဲ့ဝန်ကို ပါဝင်ထမ်းလို့။
တတ်စွမ်းသမျှ ကူကြကွယ်။
ကိုယ့်အိမ်ကိုယ့်ယာ သန့်သန့်ရှင်းနဲ့။
အမှိုက်လှည်းကျင်းနေရမယ်။
အားလပ်ချိန်မှာ စာကိုဖတ်တော့။
မှတ်စုမှတ်ရာ သုတကြွယ်။
စည်းကမ်းရိုသေ ယဉ်ယဉ်ကျေးနဲ့။
လိမ္မာရေးခြား တို့လူငယ်။
နောင်တစ်ခေတ်မှာ ခေါင်းဆောင်ဖြစ်တော့။
စည်းစနစ်က အခြေခံတယ်။
ကြိုးစားကွယ် တိုးပွားမယ်။ ။ ။

(ကဗျာဆရာ အောင်သန်းဦး (ရေနံ့သာ)၊
ဓမ္မကျောင်းတော် အခြေခံဗုဒ္ဓဘာသာယဉ်ကျေးမှုသင်ခန်းစာ အပိုင်း(၁) စာအုပ်မှ)

”မြန်မာမလေး မသိင်္ဂီ”

မြန်မာမလေး မသိင်္ဂီ၊ စိတ်ထားမွန်မြတ်သည်။
ဖြောင့်မတ်တည်ကြည်၊ ဖြူစင်သည့်။
သစ္စာစောင့်သိ၊ သိက္ခာရှိ။
မိမိဇာတိ၊ မြတ်နိုးကာ။
ထုံတမ်းစဉ်လာ၊ လေးစားတာ။
မြန်မာ့ရိုးရာ၊ ဓလေ့များ။
ပျော်မွေ့တန်ဖိုးထား။
သနပ်ခါးနဲ့ ပါးကွက်ခြယ်၊ တစ်ပွင့်ပန်းနဲ့ ယဉ်ကျေးတယ်။
အလိမ္မာကြွယ်၊ လှပဂေး။
မြန်မာ့သမီးလေး။ ။ ။

(ရေနံ့သာ မောင်ကျော်ညွှန့်၊
ဓမ္မကျောင်းတော် အခြေခံဗုဒ္ဓဘာသာယဉ်ကျေးမှုသင်ခန်းစာ အပိုင်း(၁) စာအုပ်မှ)

“ညီကျင့်ဝတ်”

မဟုတ်မမှန်၊ လိမ်ညာစကားကို။
မပြောကြားနဲ့ ညီထွေးရယ်။
ပိုးကောင်လေးတွေ၊ ကြင်နာသနားလို့။
သွားမသတ်နဲ့ ညီညီရယ်။
သူ့ပစ္စည်းကို မသိဘဲပေါ့။
ခိုးဝှက်ယူဆော့ မပြုနဲ့ကွယ်။
ဒီလိုမှကွယ်၊ လူတွေချစ်လို့။
ကိုလေးကလည်း ပိုချစ်မယ်။
ညီထွေးရယ်၊ မှတ်သားကွယ်။ ။ ။

(ဓမ္မကျောင်းတော် အခြေခံဗုဒ္ဓဘာသာယဉ်ကျေးမှုသင်ခန်းစာ အပိုင်း(၁) စာအုပ်မှ)

“ရှုတိုင်းယဉ်”

အဖေ အမေ မြန်မာသွေးမို့၊ မြန်မာမလေး အစစ်ပါရှင့်။
မြန်မာဆန်အောင် တမင်ရွေးလို့၊ စံပယ်လေးလို့ နာမည်တွင်။
မြန်မာ့အမြင် ရှုမငြီးအောင်၊ ကြက်တောင်စည်နဲ့ အလှပြင်။
မြန်မာ့ရိုးရာ သနပ်ခါးနဲ့၊ ပါးကွက်ကျားလေး ပါးမှာတင်။
ရင်ဖုံးအင်္ကျီ ချိတ်ထမီလှနဲ့၊ မြန်မာပီသ ဝတ်စားဆင်။
သူများဟန်ပန် ဘယ်မတုနဲ့၊ ကိုယ့်ယဉ်ကျေးမှု ကိုယ်ချစ်ခင်။
ရှုတိုင်းယဉ် ရှုတိုင်းယဉ်။ ။ ။

(ကဗျာဆရာမြေလတ်-မောင်မြင့်သူ
ဓမ္မကျောင်းတော် အခြေခံဗုဒ္ဓဘာသာယဉ်ကျေးမှုသင်ခန်းစာ အပိုင်း(၁) စာအုပ်မှ)

မနက်ဖြန် (၁၇.၃.၂၀၁၄) ရက်ဆို မြဝတီမြို့နယ်၊ ရွှေကုက္ကိုမြိုင်ရွာမှာ ယဉ်ကျေးမှုလိမ္မာသင်တန်း သင်ပေးတာ (၁၀)ရက်ပြည့်ပြီ။ မိမိလုပ်ပေးစရာ တာဝန်တွေက တခြားနေရာတွေမှာ တခြားစာမေးပွဲတွေ၊ သင်တန်းတွေလုပ်ပေးဖို့ တာဝန်ယူထားသေးတာဆိုတော့ ယခုနှစ်တော့ (၁၀)ရက်ပဲ အားတာမို့ ဒီလောက်နဲ့ပဲ သင်တန်းသိမ်းပေးမယ်ဆိုပြီး ရွာက လူကြီးတွေကို ပြောလိုက်ရတယ်။

ကလေးတွေကို မိမိသင်ပေးသမျှ ဦးနှောက်ထဲရောက်အောင် ယနေ့ (၁၀)ရက်ပြည့်တဲ့နေ့မှာပဲ သင်သမျှအလွတ်ရအောင် ကျက်ခိုင်း၊ ရေးခိုင်း၊ ဆိုခိုင်းလုပ်ပေးလိုက်တာ (၄)နာရီကျော် ကြာသွားတယ်။ မနက်ဖြန်စာမေးပွဲမှာတော့ အပေါ်က ကဗျာများထဲက တစ်ခုကို ဖြေခိုင်းဖို့ မေးခွန်းထုတ်နေတယ်။ ကျန်တဲ့မေးခွန်းတွေလည်း ဦးဇင်းစာဖတ်ပရိသတ် လူကြီး၊ လူလတ်များ ကလေးတွေလောက် အသိပညာ ဗဟုသုတ ရှိမရှိသိရအောင် မနက်ဖြန်ကျရင် ဖြေခိုင်းကြည့်ဦးမှထင်တယ်။

Thursday, March 13, 2014

ယဉ်ကျေးလိမ္မာသင်တန်း ပုံရိပ်များ

 လွန်ခဲ့သော တစ်လကျော်က မြဝတီမြို့နှင့် ရွှေကုက္ကိုမြိုင်ရွာသို့ တရားဟောကြွရင်း ကလေးများကျောင်းပိတ်ရင် ယဉ်ကျေးလိမ္မာသင်တန်းဖွင့်ပြီး သင်ပေးချင်တယ်။ ဒီရွာက လူကြီးတွေ ဖြစ်မြောက်အောင် ကူညီပေးကြပါလို့ ပြောဆိုခဲ့တယ်။ ယခုတော့ ရွှေကုက္ကိုမြိုင်ရွာလူကြီးတွေက ကူညီပေးကြတာနဲ့ ယဉ်ကျေးလိမ္မာသင်တန်း ဖွင့်ဖြစ်လို့ သွားရောက်သင်ပေးခဲ့တယ်။ ကလေးတွေများတာနဲ့ သူငယ်တန်းကနေ စတုတ္ထတန်းထိကိုတော့ တခြားခွဲသင်ခိုင်းလိုက်ပြီး မိမိကတော့ ပဉ္စမတန်းမှ နဝမတန်းထိ ကလေးများကိုသာ သင်ပေးလိုက်တယ်။ ကလေးတွေ သင်တန်းတတ်ချင်အောင် အင်္ဂလိပ်လိုပါ ဘာသာရေးစာပေများ ရေးခိုင်းကျက်ခိုင်းပေးလိုက်တယ်။

ကလေးများ  မိမိဘာသာတရားအကြောင်း အဓိကလိုက်နာရမဲ့အချက်များ သေချာသိထားဖို့၊ တခြားဘာသာများအကြောင်း ဗဟုသုတရှိထားဖို့၊ သရဏဂုံသုံးပါးမြဲဖို့၊ ငါးပါးသီလ နေ့စဉ်စောင့်ထိန်းလျှင် အကျိုးများမှန်းသိဖို့၊ ဝိပဿနာအားထုတ်ခြင်းသည် မျက်မှောက်ဘဝမှာ တကယ့်ချမ်းသာစစ်အမှန်ကို ရရှိတယ်ဆိုတာသိပြီး ဆက်လက်ကျင့်ကြံနေထိုင်ချင်စိတ်ဖြစ်ဖို့ ပြောဆိုသင်ပေးတယ်။ ဒီအချက်တွေသာ သူတို့လေးတွေ ပြည့်စုံနေမယ်ဆိုရင် ဒီဘဝတွင် တောင်းစားရတဲ့ ဘဝရောက်နေပါစေ မျက်မှောက်တမလွန်မှာ စိတ်ချမ်းသာမှုတော့ ရရှိနေမှာပါ။

အရှင်ကောမလ ဆန်နီနေမင်း
(၁၃.၃.၂၀၁၄)





Monday, March 10, 2014

ဒါနပြုတာခြင်းတူပါလျက် ဓမ္မဒါနက ပိုမြတ်ရခြင်း

အပေါ်က ခေါင်းစဉ်လေးကို စာရေးသူ ခဏခဏ အမေးခံရလွန်းလို့ မေးဖြေတွေမှာ ဖြေဆိုပေးခဲ့တာ မနည်းတော့ပါဘူး။ ခုတော့ စာရေးသူရဲ့ ရဟန်းဒါယကာ၊ ရဟန်းဒါယိကာမတို့ကို မေတ္တာရှင်(ရွှေပြည်သာ)ဆရာတော်မှ အလှူဒါနတွင် ဓမ္မဒါနပြုလုပ်ပေးခြင်းက ပိုမိုကောင်းမွန်ကြောင်း မိန့်ကြားပေးတာလေးကို စာဖတ်သူများလည်း သိရှိနားလည်ပြီး အကျိုးများအောင် ပြုလုပ်တတ်ဖို့ရန် ရေးသားတင်ပြပေးလိုက်ပါတယ်။
စာရေးသူရဲ့ ရဟန်းဒါယကာ၊ ဒါယိကာမတို့ဟာ နှစ်စဉ်နှစ်တိုင်း ပဲခူးမြို့က ဆင်းရဲသော ရပ်ကွက်တစ်ခုမှာနေထိုင်ကြတဲ့ ရှင်ပြုဖို့ရန် အခက်အခဲဖြစ်နေသော ကလေးများကို နွေရာသီမှာ ရှင်ပြုပေးခြင်း ကုသိုလ်ပြုလုပ်ပေးကြပါတယ်။ အဲဒီလိုပြုလုပ်ပေးနေတာကို မေတ္တာရှင်ဆရာတော်ကို လျှောက်ကြလေတော့ ဆရာတော်က ရှင်ပြုပေးတယ်ဆိုတာ ကောင်းမွန်တဲ့ကုသိုလ်ပါ။ သို့သော် မိမိရှင်ပြုပေးတဲ့ ကလေးများသည် ရှင်ပြုပြီး သူတို့အသိဉာဏ်ထဲမှာ ရတနာသုံးပါးအကြောင်း၊ ဗုဒ္ဓဘာသာအကြောင်း နားလည်မှုမရှိခဲ့ကြဘူးဆိုရင် မိမိတို့ရှင်ပြုပေးခြင်းသည် မိမိတို့အတွက် အကျိုးများသော်လည်း ရှင်ပြုကြတဲ့ ကလေးတွေမှာ အကျိုးနည်းတဲ့အတွက် နှစ်ဦးနှစ်ဘက်လုံး အကျိုးများအောင် နှလုံးသားဝယ်ဘုရားတည် စာမေးပွဲကျင်းပပေးရင် ပိုကောင်းလိမ့်မယ်။ ဒကာ၊ ဒကာမတို့ ရှင်ပြုပေးရင် ဘယ်လောက်ကုန်ကျသလဲလို့မေးတော့ သိန်း(၃၀)လောက် ကုန်ကျပါတယ်ဆိုတာနဲ့ ဆရာတော်မှ အဲဒီကုန်ကျစရိတ်ကို ကလေးတွေ စာမေးပွဲဖြေနိုင်အောင် စီစဉ်ပေးလိုက်ပါ။
ဒါဆို ကလေးတွေရဲ့ အသိဉာဏ်ထဲမှာ စာပေတွေ သိရှိလာမယ်။ ဗုဒ္ဓဘာသာအကြောင်း နားလည်လာမယ်။ ပထမဦးဆုံး ကလေးတွေသိဖို့ရန် အရေးကြီးတဲ့ သရဏဂုံအကြောင်းနှင့် ငါးပါးသီလအကြောင်းကို ဆရာတော်ရေးထားတဲ့ သရဏဂုံအစွမ်းအံ့မခန်းစာအုပ်နှင့် သီလအစွမ်းအံ့မခန်းစာအုပ်တို့ကို စာမေးပွဲကျင်းပပေးပါ။ စာမေးပွဲဖြေတဲ့အခါ စာအုပ်ကြည့်ဖြေခွင့်ပေးလိုက်ပါ။
မည်သူမဆို စာမေးပွဲဖြေရင် လက်လွတ်ဖြေရမယ်ဆိုပါက စာကြည့်ချင်စိတ်မရှိတော့ဘဲ စာအုပ်ကိုပါ မဖတ်ဖြစ်တော့ပါ။ စာအုပ်ကိုကြည့်ဖြေရမယ်ဆိုရင် လွယ်ပါတယ်ကွာဆိုပြီး စာအုပ်ကို အနည်းဆုံး တစ်ခေါက်လောက်တော့ ဖတ်ဖြစ်ကြလိမ့်မယ်။ တစ်ခေါက်ဖတ်ဖြစ်ရင်ကို သူတို့စိတ်ထဲမှာ သရဏဂုံအစွမ်း၊ သီလအစွမ်းတွေ သိမြင်သွားရင် သူတို့ရဲ့မျက်မှောက် တမလွန်ဘဝအတွက် အကျိုးများသွားပါပြီ။
စာရေးသူကိုလည်း သိက္ခာထပ်ပြီး ဘာလှူပေးရမလဲလို့မေးတဲ့အခါ အများအတွက် အကျိုးများအောင် ဦးဇင်းဟောကြားပေးထားတဲ့ အမေးအဖြေတရားပေါင်း(၁၀)ခွေကို တစ်ခွေတည်းပေါင်းထားတဲ့ မေးဖြေတရားခွေနှင့် တရားသီးသန့်ဟောကြားထားတဲ့ တရားခွေတွေကို ဖြန့်ဝေပေးလိုက်ပါလို့ ပြောဆိုပေးလိုက်ပါတယ်။ စာရေးသူဟောကြားထားတဲ့ တရားခွေတွေဟာ ဟောတိုင်းမစုဆောင်းထားတဲ့အတွက် သုံးလေးခွေသာ မိမိလက်ထဲ ရှိနေတာလေးကိုပဲ ဖြန့်ဝေပေးရအောင်ဆိုပြီး ပေးလိုက်ပါတယ်။ တရားဓမ္မများကို ဖြန့်ဝေပေးခြင်းဟာလည်း အများအတွက် အကျိုးဗဟုသုတများစေလို့ ဓမ္မဒါနကုသိုလ်ပါပဲ။
မိမိတို့ ဗုဒ္ဓဘာသာဝင်တွေဟာ အလှူဒါနနဲ့ပတ်သတ်ရင် လှူဖို့တန်ဖို့ အားသန်ကြတာ များပါတယ်။ သို့သော် ဘယ်လိုအလှူလှူရင် အလှူခံသူမှာ ပိုအကျိုးများမယ်၊ မိမိတို့လှူဒါန်းသူမှာလည်း ကောင်းကျိုးပိုရမယ်ဆိုတာကိုတော့ မစဉ်းစားမိကြတာ များပါတယ်။ ဒါဟာလည်း မိမိတို့မြန်မာလူမျိုးတွေဟာ စဉ်းစားတွေးခေါ်မှုမှာ အားနည်းခဲ့ကြတဲ့ အစဉ်လာကြောင့်ရယ်၊ သူများလှူရင် အလွယ်တကူပဲ မစဉ်းစားဘဲ လှူဒါန်းလိုက်ကြတာ ဝါသနာဖြစ်နေလို့ပါ။
ဒါကြောင့် မိမိတို့ အလှူဒါနပြုလုပ်မယ်ဆိုလျှင် မိမိနာမည်ကြီးဖို့၊ မိမိလှူရဖို့၊ မိမိကုသိုလ်ရဖို့အတွက်ပဲ မကြည့်ဘဲနဲ့ ဘယ်အရာကိုလှူရင် အလှူခံပုဂ္ဂိုလ်အတွက် အကျိုးရှိမယ်၊ အကျိုးများမယ်ဆိုတဲ့ အချက်များကိုပါကြည့်ပြီး လှူဒါန်းမှသာလျှင် ကုသိုလ်လည်းရ အကျိုးလည်းများသော အလှူဒါနဖြစ်အောင် ပြုလုပ်လှူဒါန်းကြပါ။
ဦးဇင်း မကြာမီက ဟောကြားခဲ့တဲ့ တရားခွေများကို အောက်ဖော်ပြပါ လိပ်စာများတွင် အခမဲ့ ဝင်ရောက်ယူကြပါလေ။
          ၁။ Channel
          Digital Inkjet Printing & Advertising
          No.583, သံသုမာလမ်း၊ ကမ္ဗောဇဘဏ်အနီး၊ တောင်ဥက္ကလာ။
          ၂။ Channel
          Digital Inkjet Printing & Advertising
          No.91, အနော်ရထာလမ်း၊ ကျောက်တံတားမြို့နယ်။
          ၃။ Channel
          Digital Inkjet Printing & Advertising
          No.73, ပြည်လမ်း၊ တက်ကြည်းကုန်း၊ မှော်ဘီမြို့။
          ၄။ Channel
          Digital Inkjet Printing & Advertising
          No. 249,31 လမ်း၊ ရုံကြီးရပ်၊ ပဲခူးမြို့။
အထက်ပါ ဓာတ်ပုံနှင့်ဗွီနိုင်းဆိုင်များသည် ဦးဇင်းရဲ့ ရဟန်းဒါယိကာ-ကိုအောင်ကိုနိုင်+ ရဟန်းဒါယိကာမ-မအေးသီတာတို့ရဲ့ ဆိုင်များဖြစ်ပြီး ၎င်းတို့မှ ဓမ္မဒါနပြုလုပ်ထားခြင်း ဖြစ်ပါသဖြင့် လွတ်လပ်စွာ အားနာခြင်းမရှိဘဲ ဝင်ရောက်ယူနိုင်ကြပါတယ်။








Saturday, March 1, 2014

မသိမသာ

လောကတွင် ပြောဆိုနေကြသော “မသိမသာ”ဆိုသည်မှာ လူမသိ သူမသိ မထင်ရှားသောပုဂ္ဂိုလ် သေဆုံးသွားလျှင် ထိုမသာကိစ္စကို မည်သူကမျှ မသိလိုက်သောကြောင့် လူမသိသော မသာကို ဆိုလိုခြင်းဖြစ်သည်။ ထိုကဲ့သို့ လူသိနည်းသော မသာသည် အများကောင်းကျိုး မပြုလုပ်သူဖြစ်၍သာ လူမသိရခြင်းဖြစ်သည်။ သေသောအခါတွင်လည်း သူ့အတွက် ဝမ်းနည်းမည့်သူပင် မရှိလေသောကြောင့် မသာကိစ္စတွင် လူနည်းစုဖြင့်သာ ကိစ္စပြီးသွားရလေသည်။
Powered by Blogger.