လူကောင်းတစ်ယောက်ပြည့်စုံရမည့် အင်္ဂါများမှာ အကျဉ်းအားဖြင့် (၇)ပါးရှိပါသည်။ `၎င်းတို့မှာ..........
၁။ သဒ္ဓါ-ရတနာသုံးပါး ဂုဏ်ကျေးဇူးနှင့် ကံ ကံ၏အကျိုးကို ယုံကြည်သော သဒ္ဓါတရားရှိရမည်။
၂။ သီလ-ငါးပါးသီလကို ခါးဝတ်ပုဆိုးကဲ့သို့ အမြဲမပြတ်လုံခြုံအောင် စောင့်ထိန်းရမည်။
၃။ ဟိရီ-မကောင်းမှုဒုစရိုက်တို့ကို မပြုလုပ်ဖို့ရန် ရှက်သောစိတ် ရှိရမည်။
၎။ သြတ္တပ္ပ-မကောင်းမှုဒုစရိုက်တို့ကို မပြုလုပ်ဖို့ရန် ကြောက်သောစိတ် ရှိရမည်။
၅။ သုတ-ကောင်းသော အကြားအမြင် ဗဟုသုတနှင့်ပြည့်စုံရမည်။
၆။ စာဂ-စေတနာသုံးတန် ပြဋ္ဌာန်းသောစိတ်ဖြင့် ပေးကမ်းစွန့်ကြဲ လှူဒါန်းတတ်ရမည်။
၇။ ပညာ-သံသရာမှ ထွက်မြောက်ကြောင်းဖြစ်သော လောကုတ္တရာပညာတို့နှင့် ပြည့်စုံရမည်။
ဤကဲ့သို့သော အချက်များနှင့် ပြည့်စုံသောသူကိုသာ သူတော်ကောင်း (သို့မဟုတ်) လူကောင်းဟု သတ်မှတ်ရပါမည်။
မြတ်စွာဘုရားရှင်သည် လူသားတိုင်းကို “လူကောင်း”များဖြစ်ရန်အတွက် “လူကောင်း”နှင့်ပတ်သတ်သော တရားတော်များ၊ ကျင့်စဉ်များ၊ လိုက်နာရမည့် အချက်အလက်များကို အပြည့်အစုံ ဟောကြားထားပါသည်။
သို့သော်လည်း “လူကောင်း”တစ်ယောက်တွင် မရှိမဖြစ် ပြည့်စုံရမည့် အထက်၌ ဖော်ပြခဲ့သော(၇)ပါးကို ပြည့်စုံစွာသိရှိပြီး လိုက်နာစောင့်ထိန်းကျင့်ကြံလျှင်ပင် “လူကောင်း” တစ်ယောက်ဟု သတ်မှတ်နိုင်သောကြောင့် ထို(၇)ပါး၏ အကျယ်အဓိပ္ပါယ်ကို ရေးသားတင်ပြပေးသွားပါမည်။
၁။ သဒ္ဓါ၏ လက္ခဏာ
သဒ္ဓါဆိုသည်မှာ မြတ်စွာဘုရား၏ ဂုဏ်တော်ကျေးဇူးတော်တို့ကိုလည်းကောင်း၊ တရားတော်၏ ဂုဏ်ကျေးဇူးကိုလည်းကောင်း၊ သံဃာတော်အပေါင်း၏ ဂုဏ်ကျေးဇူးတို့ကိုလည်းကောင်း၊ ကုသိုလ် အကုသိုလ်၊ ကောင်းမှု မကောင်းမှုတို့၏ အကျိုးပေးသည်ကိုလည်းကောင်း၊ ဘ၀သံသရာ၏ ကျင်လည်နေသော သဘောတရားတို့ကိုလည်းကောင်း ယုံကြည်သော စိတ်ရှိခြင်းကို သဒ္ဓါဟုခေါ်ပါသည်။ ယုံကြည်သည်ဆိုရာ၌ “ယုံနှင့်ကြည်”သည် အဓိပ္ပါယ်တစ်မျိုးစီ ရပါသည်။
“ယုံ”ဟူသော စကား၏ အဓိပ္ပါယ်
“ယုံ”ဆိုသည်မှာ ပုဂ္ဂိုလ်သတ္တ၀ါဟူသမျှတို့သည် မိမိပြုလုပ်သော ကောင်းမှုကံ မကောင်းမှုကံတို့၏ အကျိုးကို မိမိကိုယ်တိုင် ခံစားရမည်ဟု ကံ၏ ကောင်းကျိုး ဆိုးကျိုးတို့ကို ယုံခြင်း၊ အတိတ်ကဖြစ်ခဲ့သော ဘ၀ဟောင်းရှိ၏။ ယခုဘ၀မှ သေလျှင် လောဘစသော ကိလေသာ တဏှာများကင်းစင်သော ရဟန္တာမဖြစ်ပါက နောက်ထပ်ဖြစ်ရမည့် ဘ၀ရှိ၏ဟုယုံခြင်း၊ ငရဲ တိရစ္ဆာန် ပြိတ္တာ အသူရကာယ်ဟူသော အပါယ်လေးဘုံ၊ လူ့ဘုံ၊ နတ်ဘုံ၊ ဗြဟ္မာဘုံအစရှိသော သတ္တ၀ါတို့ ကျင်လည်ရာ သုံးဆယ့်တစ်ဘုံရှိ၏ဟုယုံခြင်း၊ ဒါန သီလ ဘာဝနာအစရှိသော ကောင်းမှု မကောင်းမှုတို့ကို ကိုယ်တိုင်သိအောင် အားထုတ်ပြီး သူတစ်ပါးတို့အား ဟောပြောပေးနိုင်သော လူဘုရား၊ တရား၊ သံဃာရှိ၏ဟု ယုံခြင်း၊ မိဘဆရာသမားတို့၏ ဂုဏ်ကျေးဇူးရှိ၏ဟု ယုံခြင်းအစရှိသည်တို့ကို အမှန်စင်စစ်ယုံကြည်သော သဘောတရားကို “သဒ္ဓါ”ဟု ခေါ်ပါသည်။ ထိုကဲ့သို့ ယုံသော သဒ္ဓါကို “သဒ္ဓါမောက္ခ-ယုံသောအားဖြင့် ဆုံးဖြတ်ခြင်းသဘော”ဟု ကျမ်းဂန်တို့၌ ပြဆိုပါသည်။
အထက်၌ဖော်ပြခဲ့သော ယုံခြင်းမျိုးဖြင့် ပေးလှူသောသူသည်သာ သဒ္ဓါအစစ် ဖြစ်နိုင်ပေသည်။ ထိုကဲ့သို့ ယုံသောသဘောမျိုးမရှိသော အခြားသောဘာသာဝင်တို့သည်လည်း ပေးကမ်းစွန့်ကြဲခြင်း ရှိပါသည်။ သို့သော် ထိုသူများသည် အထက်ပါအချက်အလက်တို့ကို ယုံသောသဘောဖြင့် ပေးကမ်းခြင်းမဟုတ်သောကြောင့် သဒ္ဓါအစစ် မဖြစ်နိုင်ပါ။ အခြားသော ဘာသာဝင်တို့သည်လည်းကောင်း၊ မိရိုးဖလာဗုဒ္ဓဘာသာဝင်တို့သည် လည်းကောင်း အထက်၌ဖော်ပြခဲ့သော ယုံခြင်းကို အမှန်တကယ် နားမလည်ပါက ပေးကမ်းစွန့်ကြဲသော်လည်း အကျိုးပေးရာ၌ ထိုက်တန်သော အကျိုးတရားတို့ကို မရနိုင်ပေ။
ထို့ကြောင့် အယူမှားနေသော သူတို့သည်လည်းကောင်း၊ ယုံခြင်းဟူသော အချက်အလက်တို့ကို တိကျမှန်ကန်စွာ နားမလည်သေးသော ဗုဒ္ဓဘာသာဝင်တို့သည်လည်းကောင်း “လူကောင်း”တစ်ယောက်ဖြစ်ရန်နှင့် ထိုက်တန်သော အကျိုးကိုရရှိရန် အထက်ပါအချက်အလက်တို့ကို သေချာကျနစွာသိအောင် ကြိုးစားသင့်ပေသည်။
”ကြည်”ဟူသော စကားလုံး၏ အဓိပ္ပါယ်
ကြည်သည်ဆိုသည်မှာ စွန့်ကြဲပေးကမ်းလှူဒါန်းနေသောအခါ၊ သီလဆောက်တည်နေသောအခါ၊ တရား အားထုတ်နေသောအခါ အစရှိသော ကောင်းမှုကုသိုလ်တို့ကို ပြုလုပ်နေစဉ် စိတ်၌ကြည်လင်နေခြင်းကို ဆိုလိုပါသည်။
ဥပမာ..........နောက်ကျူနေသောရေ၌ ပတ္တမြားရတနာ ထည့်လိုက်သောအခါ အနယ်အမှုန်တွေ အောက်ကျ၍ ရေသည်ကြည်လင်လာသကဲ့သို့ စိတ်၌ပတ္တမြားရတနာနဲ့တူသော သဒ္ဓါတရား ဖြစ်ပေါ်လာသောအခါ စိတ်ပျံ့လွင့်ခြင်း၊ စိတ်ထိုင်းမှိုင်းခြင်း၊ စိတ်မတည်ငြိမ်ခြင်း၊ ၀ိစိကိစ္ဆာအစရှိသော ကိလေသာ အနောက်အကျူများကို ပယ်ရှားနိုင်သော တရားသည် သဒ္ဓါပင် ဖြစ်ပါသည်။
ထို့ကြောင့် တစ်ချို့တိရစ္ဆာန်များနှင့် ကလေးသူငယ်စသူတို့မှာ ကံ ကံ၏အကျိုးကို နားမလည်၍ “ယုံသဒ္ဓါ”ဖြစ်ရန် ခဲယဉ်းသော်လည်း လူကြီးများပြုလုပ်နေပုံကို အတုယူကာ ဘုရား၊ တရား၊ သံဃာကို ရှိခိုးနေသောအခါ၊ သူတစ်ပါးကို ပေးကမ်းစွန့်ကြဲနေသောအခါ၊ သူတစ်ပါးအကျိုးကို ဆောင်ရွက်နေသောအခါများ၌ စိတ်ကိုကြည်လင်စေနိုင်သော ”ကြည်သဒ္ဓါ”တော့ ဖြစ်ကြပါသည်။
ယုံသဒ္ဓါကို နားမလည် မသိကြသော ဗုဒ္ဓဘာသာမှတစ်ပါးသော အခြားဘာသာဝင်များသည်လည်း ဆေးရုံ အတွက်၊ ဘိုးဘွားရိပ်သာအတွက်၊ နူနာရုံအတွက်၊ မိဘမဲ့ဂေဟာ၌ရှိသော ကလေးများအတွက်၊ ပညာရေး ကျောင်းများအတွက်၊ ဒုက္ခရောက်နေသူများအတွက် ပေးကမ်းစွန့်ကြဲရာ၌ “ကြည်သဒ္ဓါ”အစစ်ဖြစ်ကြသောကြောင့် ထိုက်တန်သော ကုသိုလ်အကျိုးကို ရရှိကြပါသည်။
သဒ္ဓါရှိသည်ဆိုသည်မှာလည်း သဒ္ဓါအစစ်ရှိမှု၊ သဒ္ဓါအတုရှိမှုဟု နှစ်မျိုးရှိပါသည်။ ထို့ကြောင့် သဒ္ဓါအစစ်ဖြင့် ပေးလှူခြင်း၊ သဒ္ဓါအတုဖြင့် ပေးလှူခြင်းတို့ကို ခွဲခြားပြီးသိရန် လိုပါသည်။ သို့ဖြစ်၍ သဒ္ဓါအစစ်နှင့် သဒ္ဓါအတုတို့ကို ခွဲခြားတတ်ရန် ရေးသားတင်ပြလိုက်ပါသည်။
နောက်တစ်ပါတ်မှ ဆက်လက်ရေးသား တင်ပြပေးပါမည်။
0 comments:
Post a Comment