Sunday, February 16, 2014

နိုင်ငံခြားသားများနဲ့ အမေးအဖြေ (၄)

  မေး။ ။ နိုင်ငံခြားသားတစ်ယောက်က မဟာယာနဗုဒ္ဓဘာသာက ဘုရားလောင်းဖြစ်အောင် ကြိုးစားကြတယ်။ ထေရဝါဒဗုဒ္ဓဘာသာက ကိုယ့်လွတ်ရုန်း တစ်ကိုယ်ကောင်းဆန်ပြီး ကိုယ့်လွတ်မြောက်ဖို့ပဲ ကြိုးစားကြတယ်။ ထေရဝါဒက တစ်ကောင်းဆန်တဲ့ဘာသာ ဖြစ်မနေဘူးလားလို့ မေးလာတယ်။
ဖြေ။ ။ ဒါနဲ့ ထေရဝါဒဗုဒ္ဓဘာသာအယူဝါဒက တစ်ကိုယ်ကောင်းဆန်တဲ့ ဝါဒဟုတ်မဟုတ် သေချာ သိရှိနားလည်အောင် ဥပမာလေးနဲ့ ရှင်းပြပေးလိုက်ပါတယ်။ ကမ္ဘာပေါ်ရှိတဲ့ လူအားလုံးဟာ သမ္မတဖြစ်ချင်ပေမဲ့ မဖြစ်နိုင်ကြပါဘူး။ သမ္မတဖြစ်ဖို့အတွက် လိုအပ်တဲ့အရည်အချင်း ပါရမီစတာတွေ ပြည့်စုံမှ ဖြစ်ကြရပါတယ်။ အဲဒီလိုပြည့်စုံဖြစ်နိုင်ဖို့ကလည်း အလွန်ခက်ခဲပါတယ်။
အဲဒီလိုပဲ ဘုရားတစ်ဆူဖြစ်ဖို့ရန် ဖြည့်ကျင့်ရမဲ့ ပါရမီအလုပ်တွေ။ အချိန်ကာလတွေဟာ မရေတွက်နိုင်ဘူး။ ဒါကြောင့် အဲဒါတွေကို ဖြည့်ကျင့်ပြီး ပြည့်စုံမှ ဘုရားဖြစ်ကာ နိဗ္ဗာန်ချမ်းသာကို ရယူမယ်ဆိုရင် မလွယ်ကူသလို ဖြစ်ဖို့လည်း မသေချာဘူး။ အဲဒီလို မသေချာတဲ့ ဘုရားဖြစ်မှ ငြိမ်းအေးခြင်းချမ်းသာအမှန် မြတ်နိဗ္ဗာန်ကို ရရှိအောင် ပြုလုပ်မယ်ဆိုရင် အဲဒီလူဟာ သံသရာဒုက္ခတွေကနေ မလွတ်မြောက်ဘဲ ဆင်းရဲဒုက္ခတွေပဲ သံသရာမှာ အချိန်ကြာမြင့်စွာ ကျင်လည်ရဦးမှာပါ။ ဒါကြောင့် မဖြစ်နိုင်တာကို မျှော်လင့်နေပြီး ပင်းပန်းခံမနေဘဲ သေချာရေးရာတဲ့ မြတ်နိဗ္ဗာန်ရောက်ကြောင်းတွေကိုပဲ အရင်ကျင့်ကြံဖို့ လိုပါတယ်။
တကယ်လို့များ လူတိုင်းဟာ သမ္မတဖြစ်နေရင် လက်အောက်ငယ်သား မရှိရင် အုပ်ချုပ်ဖို့လည်း မလိုတော့ဘူးဆိုတော့ သမ္မတဖြစ်နေတာ အလကားဖြစ်နေမှာပါ။ အဲဒီလိုပဲ သတ္တဝါတိုင်းဘုရားဖြစ်နေရင် တပည့်သာဝက ဘယ်ရှိတော့မလဲ။ တရားဟောစရာ ဘယ်ရှိတော့မလဲ။ ကိုယ့်ကျင့်တဲ့တရား ဘယ်သူ့ဟောရမလဲ။ ကိုယ်က ဒီဘဝမှာ နိဗ္ဗာန်ချမ်းသာမြတ်ကို ရရှိနိုင်တဲ့ သာသနာနဲ့ကြုံနေချိန်၊ လူ့ဘဝရနေချိန်၊ သူတော်ကောင်းစိတ်ရှိနေချိန်မှာမှ နိဗ္ဗာန်ရောက်အောင်မလုပ်ဘဲ နေလိုက်မယ်ဆိုရင် ကိုယ့်လက်ထဲရောက်နေတာကို လက်လွတ် ဆုံးရှုံးသလို ဖြစ်သွားမှာပေါ့လေ။
တစ်ခါတလေ ကိုယ်မရနိုင် ကိုယ်မဖြစ်နိုင်တဲ့အရာတစ်ခုကို ဖြစ်ကိုဖြစ်ရမှ၊ မဖြစ်လို့မဖြစ်ဘူး ဆိုပြီး တောင်းတနေမယ်၊ ပြုလုပ်နေမယ်ဆိုရင် အဲဒီသူဟာ အရူးပမာ ဖြစ်နေမှာပါ။ အဲဒီတော့ ကိုယ်ဖြစ်နိုင်မဲ့အရာကိုပဲ လက်လွတ်ဆုံးရုံးမှု မဖြစ်ရအောင် ကြိုးစားဖို့က အလွန်အင်မတန် အရေးကြီးပါတယ်။ မိမိတို့ အလုပ်လုပ်တဲ့အခါတောင်မှ သေချာရေးရာတဲ့အရာနဲ့ မသေချာမရေးရာတဲ့အရာဆိုရင် သေချာရေးရာတာကိုပဲ ဦးစားပေးပြုလုပ်ကြတာ မဟုတ်ပါလား။
ကျန်ရှိနေတဲ့ ဗဟုသုတရဖွယ်ရာ အမေးအဖြေများ ဆက်လက်ရေးသားပေးပါဦးမယ်။ စာဖတ်သူများအားလုံး ကိုယ်စိတ်နှစ်ပါးချမ်းသာပြီး လိုရာဆန္ဒပြည့်ဝကြပါစေလို့ ဆန္ဒပြုလျက်……။
အရှင်ကောမလ ဆန်နီနေမင်း

0 comments:

Post a Comment

Powered by Blogger.