Friday, December 6, 2013

အမျှဝေတာ သာဓုခေါ်ရင် ကုသိုလ်ရပါလျက် ဘာကြောင့်ကုသိုလ်လုပ်ရတာလဲ

မေး။ ။ ရိုသေစွာရှိခိုး ကန်တော့အပ်ပါတယ်ဘုန်းဘုန်း။ တပည့်တော်ကို သိချင်တာတစ်ခု ဖြေကြား ပေးတော်မူပါဘုရား။ တပည့်တော်ကို သားကမေးပါတယ်။ ဗုဒ္ဓဘာသာမှာ ကံကိုအဓိကထားတယ်။ ကိုယ်ပြုသမျှ ကုသိုလ် အကုသိုလ်ကံအကျိုး ကိုယ်ခံစားရမယ်လို့ ယုံကြည်ထားပါတယ်။ ဒါပေမဲ့ ကိုယ်လုပ်မှ ကိုယ်ရမယ်ဆိုပြီး ကိုယ့်ကုသိုလ်တွေကို မေတ္တာပို့အမျှဝေတော့ အခြားသတ္တဝါတွေ ပုဂ္ဂိုလ်တွေကိုယ်တိုင်မလုပ်ဘဲ အဲဒီကုသိုလ်တွေ ဘာလို့ရသလဲ၊ အဲဒီလို သူများအမျှဝေတာကို သာဓုခေါ်လို့ ကုသိုလ်ရတယ်ဆိုရင် ကိုယ်တိုင်မလုပ်ဘဲ သူများအမျှ ပေးတာကိုပဲ သာဓုခေါ်နေတော့မှာပေါ့လို့ မေးပါတယ်ဘုရား။ တပည့်တော် သူကျေနပ်လောက်အောင် မရှင်းပြနိုင်ပါဘူး။ အရှင်ဘုရား ရှင်းပြပေးပါရန်ရိုသေစွာ လျှောက်ထား အပ်ပါတယ်ဘုရား။

ဖြေ။ ။ ကိုယ်တိုင်လုပ်လို့ရတဲ့အရာနဲ့ သူတစ်ပါးပေးတဲ့ဟာ တန်ဖိုးထားမှုချင်း မတူညီကြပေ။ ဥပမာ-လမ်းပေါ်ကနေ ကောက်ရတဲ့ပိုက်ဆံဖြစ်စေ၊ သူတစ်ပါးဆီကနေ အလကားရလိုက်တဲ့ပိုက်ဆံဖြစ်စေ အဲဒီလို အချောင်ရလိုက်တဲ့ဟာဆို တန်ဖိုးထားမှု၊ မြတ်နိုးမှုမရှိဘဲ ဖြစ်သလိုသုံးစွဲပစ်ကြပြီး သိမ်းဆည်းထားခြင်း၊ မြတ်နိုးထားခြင်း မရှိကြပါဘူး။ ကိုယ်တိုင် ချွေးနည်းစာနဲ့လုပ်လို့ရတဲ့ဟာကျတော့ သတ္တဝါတိုင်းဟာ တန်ဖိုးထားနှစ်သက်ကြပါတယ်။ အဲဒီလို ကုသိုလ်လုပ်သူနဲ့ အမျှဝေသာဓုခေါ်ဆိုသူတို့ဟာ တန်ဖိုးထားတာခြင်း မတူညီခြင်းကြောင့် အကျိုးပေးတွေ ခြားနားသွားကြရပါတယ်။ ကိုယ်တိုင်ပြုလုပ်တဲ့ကုသိုလ်ကျတော့ ဝမ်းမြောက်ဝမ်းသာဖြစ်ပြီး အဲဒီအလှူဒါနကုသိုလ်ကို အမြဲတစေအောက်မေ့ သတိရနေသလို မပြုလုပ်ခင်ကလည်း တက်ကြွစွာဝမ်းမြောက်ပီတိတွေ ဖြစ်နေကြပါတယ်။ ဒါကြောင့် ကိုယ်တိုင် ကုသိုလ်ပြုလုပ်သူက သာဓုခေါ်ဆိုသူထက် အကျိုးပေးတိုးပွားမှုများစွာ ရရှိပါတယ်။
ဒါပြင် ဒါနကုသိုလ်တစ်ခုလုပ်တဲ့အခါ စေတနာသုံးတန်ပြည့်စုံဖို့ လိုပါတယ်။ အမျှဝေလို့ သာဓုခေါ်ရတဲ့ ကုသိုလ်ဟာ စေတနာသုံးတန် မပြည့်စုံပါဘူး။ (၁) ပုဗ္ဗစေတနာလို့ခေါ်တဲ့ မလှူမီရှေ့အဖို့မှာဖြစ်ရမဲ့ စေတနာဟာ သာဓုခေါ်လို့ကုသိုလ်ရသူမှာ မပြည့်စုံပါ။ (၂) မုဉ္စစေတနာလို့ခေါ်တဲ့ လှူစဉ်ပြုလုပ်စဉ်မှာပြည့်စုံရမဲ့ စေတနာကတော့ သာဓုခေါ်တဲ့အချိန်မှာ ဝမ်းမြောက်ဝမ်းသာနဲ့သာဓုခေါ်ရင် ပြည့်စုံပါတယ်။ (၃) အပရစေတနာလို့ခေါ်တဲ့ နောက်ပိုင်းမှာ မိမိပြုလုပ်ခဲ့တဲ့ကုသိုလ်ကို ထပ်ခါတလဲလဲ အမှတ်ရပြီး ဝမ်းမြောက်ဝမ်းသာ ကုသိုလ်ဖြစ်နေရမဲ့ စေတနာလည်း သာဓု ခေါ်သူမှာ မပြည့်စုံပါ။
ဒါကြောင့် အမျှဝေတာသာဓုခေါ်လို့ရတဲ့ ကုသိုလ်သည် မိမိကိုယ်တိုင်လုပ်ထားတာ မဟုတ်တဲ့အတွက် တန်ဖိုးထားမှုနည်းခြင်း၊ စေတနာသုံးတန်မပြည့်စုံခြင်းတို့ကြောင့် မိမိကိုယ်တိုင်လုပ်တဲ့ကုသိုလ်ဟာ မရှိမဖြစ် လိုအပ် ပါကြောင်း ဖြေဆိုပေးလိုက်ပါတယ်။
အရှင်ကောမလ ဆန်နီနေမင်း

0 comments:

Post a Comment

Powered by Blogger.