Tuesday, June 25, 2013

သေခါနီးမှာ ဖြစ်ပေါ်လာသော အာရုံ(၃)မျိုး

မေး။ ။ အရှင်ဘုရား တပည့်တော် သေခါနီးမှာ ဖြစ်ပေါ်လာတဲ့ အာရုံများရဲ့ အကြောင်းအရာကို သေချာကျနစွာ မသိသေးသဖြင့် အရှင်မြတ်အချိန်ရရင် ရေးသားပေးစေချင်ပါတယ်ဘုရား။ ကျေးဇူးတင်စွာဖြင့် ရိုသေစွာ အဝေးကနေ ရှိခိုးလိုက်ပါတယ်ဘုရား။

ဦးဇင်းလည်း မြန်မာပြည်မှာ ကွန်ပျုတာနဲ့ အွန်လိုင်းသုံးရဖို့ အခြေအနေ မပေးတာကြောင့် အမေးအဖြေများကို မရေးနိုင်ဘဲ အကြွေးတွေ များနေပါတယ်။ အလုပ်ကလည်း တစ်ယောက်တည်းကို ခေါင်းမူးအောင် ရှုပ်နေတာမို့ ဘာစာကိုမှ မရေးဖြစ်ဘူး ဖြစ်နေတယ်။ ခုတော့ ရန်ကုန်ရောက်တုန်း အင်တာနက်လိုင်းကောင်းတာနဲ့ အမေးအဖြေလေးတွေကို တက်နိုင်သမျှ ဖြေပေးလိုက်ပါတယ်။

ဖြေ။ ။ သက်ရှိသတ္တ၀ါတိုင်းရဲ့ သေခါနီးသော်လည်းကောင်း၊ ပဋိသန္ဓေနေဆဲ၌လည်းကောင်း ဖြစ်ပေါ်လာတဲ့ အာရုံ(၃)ပါး ရှိပါတယ်။

(၁) ကံ-မိမိပြုလုပ်အားထုတ်ခဲ့တဲ့ ကောင်းတဲ့လုပ်ရပ်စေတနာများ၊ မကောင်းတဲ့လုပ်ရပ် စေတနာစိတ်များ ပေါ်လာခြင်း။ မိမိစိတ်ကောင်းရှိခဲ့တာလေးတွေ၊ စိတ်ကောင်းမရှိခဲ့တာလေးတွေကို စိတ်ထဲမှာမြင်ယောင်မိလာတာကို ဆိုလိုပါတယ်။

(၂) ကမ္မနိမိတ်-မိမိလှူဒါန်းပေးကမ်းခဲ့တဲ့ အရာဝတ္ထုပစ္စည်းများ အာရုံပြု၍ ပေါ်လာခြင်း၊ ဥပမာ-ကောင်းတာနဲ့ပတ်သတ်ပြီး သူတစ်ပါးကို ပေးကမ်းခဲ့တာ တစ်ခုခုကိုဖြစ်စေ၊ သူတစ်ပါးအတွက် အဆောက်အဦး ဆောက်လုပ်ပေးခဲ့တာဖြစ်စေ မိမိစိတ်အာရုံမှာ ပေါ်လာပါတယ်။ မကောင်းတာပြုလုပ်ခဲ့တဲ့သူဆိုရင် သူတစ်ပါးအသက် သတ်ခဲ့တာ၊ ခိုးခဲ့တာ၊ ကာမေသုမိစ္ဆာစာရကံ ကျုးလွန်ခဲ့တာစတဲ့ မကောင်းမှုလုပ်ရပ်တစ်ခုခု ပေါ်လာခြင်းများကို ဆိုလိုပါတယ်။

(၃) ဂတိနိမိတ်-မိမိအနာဂတ်ဘ၀ဖြစ်ရမဲ့ ဘုံဘ၀၊ ခန္ဓာကိုယ်၊ ရုပ်ဆင်းသဏ္ဍာန်တို့ ပေါ်လာခြင်း၊ ဥပမာ-ကောင်းတာလုပ်ခဲ့သူဟာ ကောင်းရာဘ၀ဖြစ်တဲ့ လူ့ဘ၀ခန္ဓာကိုယ်၊ နတ်ဘ၀ခန္ဓာကိုယ်များ ထင်မြင်လာပြီး မကောင်းတာလုပ်ခဲ့သူကတော့ မကောင်းရာဘ၀ဖြစ်တဲ့ အပါယ်လေးဘုံသား သတ္တ၀ါတို့ရဲ့ ဘုံဌာနတွေ၊ ငရဲခန္ဓာ၊ တိရစ္ဆာန်ခန္ဓာ၊ ပြိတ္တာခန္ဓာ၊ အသူရကာယ်ခန္ဓာများ ပေါ်လာကြပါတယ်။

ယခု ဖော်ပြခဲ့တဲ့ အချက်(၃)ခုထဲက တစ်ခုခုကိုတော့ သက်ရှိသတ္တ၀ါတိုင်း ကြုံတွေ့ရမှာမို့ မိမိတို့ရဲ့ အနာဂတ်ဘ၀ဟာ ဘယ်လိုဘယ်ပုံဖြစ်မဲ့ဆိုတာ မိမိကိုယ်တိုင် သေခါနီးဖြစ်စေ၊ နောက်ဘ၀ခန္ဓာဖြစ်ခါနီးဖြစ်စေ မြင်တွေ့ရမှာဆိုတော့ မိမိမသေခင်ကတည်းက ကောင်းတာလေးမြင်ချင်ရင် ကောင်းတာများပြုလုပ်ဖို့ လိုတယ်ဆိုတာ မမေ့ကြပါနဲ့လေ။

ဒီလောက် အကျဉ်းချုပ်ဖြေပြလိုက်ရင် နားလည်သဘောက်မယ်ထင်တာမို့ ဒီမျှနဲ့ပဲ နိဂုံးချုပ်လိုက်ပါရစေ။ ဦးဇင်း မြန်မာပြည်ရောက်နေတုန်း ဟောကြားပေးခဲ့သမျှ တရားတွေထဲမှ သင်္ကြန်တွင်းတုန်းက မေတ္တာရှင် (ရွှေပြည်သာ)ဆရာတော်ကျောင်းရိပ်သာမှာ အမေးအဖြေပြုလုပ်ပေးခဲ့တဲ့ တရားပုဒ်ရေ (၉)ခွေကိုလည်း တစ်ခွေတည်းဖြစ်အောင် ပြုလုပ်ထားပြီးပါပြီ၊ အဲဒီခွေကို ဦးဇင်းသီရိလင်္ကာ မပြန်ခင် တက်နိုင်သမျှ ဗုဒ္ဓဘာသာဝင်များ ဗဟုသုတတိုးပွားစေဖို့အတွက် ဖြန့်ဝေပေးနိုင်အောင် ကြိုးစားပေးပါဦးမယ်လေ။

စာဖတ်သူများ ကိုယ်စိတ်နှစ်ပါးချမ်းသာပြီး လိုရာဆန္ဒပြည့်ဝကြပါစေလို့ ဆန္ဒပြုလျက်......။

အရှင်ကောမလ ဆန်နီနေမင်း

0 comments:

Post a Comment

Powered by Blogger.