Monday, December 24, 2012

ရွှေတိဂုံဘုရားပေါ် လင်းလငှက် ဘာဖြစ်လို့ နားရတာလဲ

မေး။ ။ အရှင်ဘုရား ခု ရွှေတိဂုံဘုရားပေါ်မှာ လင်းတငှက်များ နားနေပုံနဲ့ပတ်သတ်ပြီး လူတော်တော်များများ ပြောနေကြတာ မကောင်းတဲ့နိမိတ်လို့ ပြောကြတယ်ဘုရား။ အဲဒါ အရှင်ဘုရားတို့ ပိဋကတ်မှာ လင်းတနဲ့ပတ်သတ်ပြီး ဘယ်လိုအကြောင်းအရာတွေများ ရှိသလဲဆိုတာ ပြောပြပေးပါလားဘုရား။

ဖြေ။ ။ အဲဒီလို ထင်မြင်ယူဆစေတာဟာ ဗေဒင်ယတြာယုံကြည်တဲ့သူတွေက လင်းတငှက်ဟာ မကောင်းတဲ့သတ္တ၀ါလို့မြင်နေကြလို့ လင်းတနားတာဟာ မကောင်းတဲ့နိမိတ်လို့ မြင်နေကြတာပါ။ လင်းတငှက်က မကောင်းတဲ့အရာတွေ စားသောက်လို့ မကောင်းတဲ့ငှက်ဆို လူတွေ ခုခေတ်မှာ ခွေးတွေ မွေးထားကြတာရော မကောင်းတဲ့သတ္တဝါမို့ မကောင်းတဲ့နိမိတ် မဖြစ်ဘူးလား။ ခွေးလည်း မကောင်းတဲ့အရာ စားသောက်တဲ့သတ္တ၀ါပဲလေ။ ဖွတ်သတ္တ၀ါကျတော့ နာမည်ကကိုက ဖွတ်ဖြစ်နေလို့ ဖွတ်တတ်ရင် ဖွတ်ဖြစ်တယ်လို့ ယူဆကြတယ်လေ။ တကယ်တမ်းသာ နာမည်အတိုင်းဖြစ်နေပါက အားလုံးရဲ့နာမည်တွေဟာ ချမ်းသာ၊ သုခ၊ လိမ်မာ၊ သူတော်ကောင်း၊ ကျန်းမာချမ်းသာဆိုတဲ့ နာမည်တွေပဲ ပေးခေါ်ကြမှာပေါ့နော်။

ခု လင်းတငှက် ဘုရားပေါ်နားတာ ဘာများဆန်းလို့လဲနော်။ သူတို့ပျံသန်းရတာ မောပန်းသွားလို့ နီးစပ်ရာကို အနားယူတာပဲ ဖြစ်မယ်လို့ ဦးဇင်းက မြင်တယ်။ ဘာဖြစ်လို့လဲဆိုတော့ လင်းတငှက်တွေဟာ သူတို့ပျံသန်းနိုင်မှုစွမ်းအားထက် ပိုမိုပျံသန်းမိရင် ခန္ဓာကိုယ်အပိုင်းပိုင်းပြတ်ပြီး သေရတတ်ပါတယ်။ ဒီအကြောင်းအရာကိုတော့ ဦးဇင်း ဇာတကအဋ္ဌကထာ၊ တတိယအုပ်၊ စာမျက်နှာ(၂၄၀) မိဂါလောပဇာတ်အကြောင်းမှာ တွေ့ဖူးထားလို့ပါ။ အဲဒီဇာတ်တော်ထဲမှာ ဘုရားလောင်း လင်းတမင်းက သူ့သားဖြစ်သူ လင်းတငှက်ကို မိမိပျံသန်းနိုင်တဲ့ စွမ်းအားထက် ပိုမိုမပျံသန်းဖို့ရာ ပြောထားပေမဲ့ သားဖြစ်သူ လင်းတငှက်ဟာ ဆုံးမစကားနားမထောင်ဘဲ ကောင်းကင်ပေါ်မှာ မြင့်သထက်မြင့်အောင် ပျံသန်းတဲ့အတွက် လေထုထဲမှာ ခန္ဓာကိုယ် အပိုင်းပိုင်းပြတ်ကာ သေခဲ့ရကြောင်း တွေ့ရှိရတဲ့အတွက် ယခု ရွှေတိဂုံဘုရားပေါ်မှာ လင်းတငှက်များ နားနေတာဟာ သူတို့ပျံသန်းရင်း မောပန်းလို့ အနားယူတာပဲ ဖြစ်လိမ့်မယ်လို့ ထင်မိပါကြောင်း ဖြေဆိုပေးလိုက်ပါတယ်။

0 comments:

Post a Comment

Powered by Blogger.