Thursday, December 20, 2012

သီရိလင်္ကာနိုင်ငံဘုရားဖူးမှတ်တမ်းများ(၁)

ပထမဦးဆုံး မဟာစေတီအကြောင်းကို တင်ပြပေးချင်ပါတယ်။ မဟာစေတီအကြောင်းကိုတော့ ဗုဒ္ဓဘာသာစာပေ လေ့လာသူများအနေနဲ့ သိပြီးသားဖြစ်လိမ့်မယ် ထင်ပါတယ်။ သို့သော်လည်း မသိသေးသူများ ဗဟုသုတရစေရန် ဦးဇင်းတက်သိသလောက် အကျဉ်းချုပ် ရေးသားတင်ပြပေးပါမယ်။

မဟာစေတီကို သီရိလင်္ကာနိုင်ငံတွင် အုပ်ချုပ်ခဲ့တဲ့ ဒုဋ္ဌဂါမဏိမင်းကြီးက တည်ဆောက်လှူဒါန်းခဲ့တာပါ။ မင်းကြီးရဲ့အလှူဒါနများတွင် ဒီစေတီကြီးကို တည်ဆောက်လှူဒါန်းမှုဟာ အကြီးမားဆုံးဒါနကုသိုလ်လို့ ဆိုရပါမယ်။ စေတီတော်ကြီးကို (140 B.C.) ကဆုန်လပြည့်နေ့တွင် ပန္နက်ချပွဲကျင်းပခဲ့ပြီး ပြည်တွင်းမှ သံဃာတော်များသာမက အိန္ဒိယနိုင်ငံတစ်ဝှမ်းမှ ထင်ရှားတဲ့ ရဟန်းတော်များလည်း တက်ရောက်ခဲ့ကြပါတယ်။ ဒုဋ္ဌဂါမဏိမင်းကြီးရဲ့ ထူးခြားချက်တစ်ခုကတော့ ကျောင်းကန်ပုထိုးတွေ ဆောက်လုပ်လှူဒါန်းတိုင်း သူ့ကိုယ်ပိုင်ကုသိုလ်ဖြစ်စေရန် လုပ်အားပေးသူ မည်သူ့ကိုမဆို အဖိုးအခပေးရမယ်လို့ အမိန့်ထုတ်ပြန်ခြင်းပါ။ ဒုဋ္ဌဂါမဏိမင်းဟာ စေတီတော်ကြီးမပြီးမီ ကွယ်လွန်သွားတဲ့အတွက် ညီတော်သဒ္ဓါတိဿမင်းကနေ စေတီတော်ကို အပြီးသက်ပြီးစီးအောင် ပြုလုပ်ပေးခဲ့ပါတယ်။ မဟာစေတီတော်ကို ဒုဋ္ဌဂါမဏိမင်းနောက်က မင်းအဆက်ဆက်တို့ဟာ ထိန်းသိမ်းစောင့်ရှောက်ပေးခဲ့ကြတာ တွေ့ရပါတယ်။

မဟာစေတီဟာ ကမ္ဘာပေါ်မှာ ဓာတ်တော်အများဆုံးဌာပနာထားတဲ့ စေတီတော်အဖြစ် ထင်ရှားပြီး ထိုခေတ်က တည်ဆောက်ပြီးတဲ့ စေတီများတွင် အကြီးဆုံးဖြစ်တဲ့အတွက်ကြောင့် မဟာထူပါဆိုပြီး ခေါ်ဆိုခဲ့ကြပါတယ်။ မဟာဝံသနဲ့ထူပ၀ံသကျမ်းတို့မှာ မဟာစေတီဟာ မဟာဝိဟာရကျောင်းပိုင် စေတီတော်ကြီးဖြစ်တဲ့အတွက် အသေးစိပ်မှတ်တမ်းတင်ထားတာ တွေ့ရပါတယ်။ အဋ္ဌကထာများတွင်လည်း မဟာစေတီနဲ့ပက်သတ်တဲ့ ဇာတ်လမ်းတွေ အများကြီးပဲ။ မဟာစေတီကိုဖူးမျှော်ကာ ဗုဒ္ဓါနုဿတိဘာဝနာပွားများရင်း ရဟန္တာများစွာ ပေါ်ပေါက်ခဲ့တယ်လို့ သာရတ္ထပ္ပကာသနီက ဖော်ပြထားပါတယ်။

အောက်ပါမြင်တွေ့ရမဲ့ မဟာစေတီတော်ကို ယခုနောက်ပိုင်းတွင် သုမနသာရမထေရ် ဦးဆောင်ပြီး (၁၈၉၃) ခုနှစ်မှစတင်ပြင်ဆင်ခဲ့ရာ (၁၉၄၀)ခုနှစ်မှာ အပြီးသက်နိုင်ခဲ့ပါတယ်။ နောက်ပိုင်းပြင်ဆင်တဲ့အခါ စိန်ဖူးတော်ကြီးကို မြန်မာနိုင်ငံ၊ မိုးကုတ်မြို့၊ မိုးကုတ်ဆရာတော်ကြီးဦးဆောင်တဲ့ဒကာ၊ ဒကာမများစုပေါင်းလှူဒါန်းခဲ့ကြပြီး စိန်ဖူးတော်တင်ပွဲကိုလည်း ခမ်းနားစွာ ကျင်းပခဲ့ကြပါတယ်။ သီရိလင်္ကာနိုင်ငံတွင် မြန်မာကျောင်းတိုက်(၅)ခု တည်ထောင်တော်မူခဲ့တဲ့ ဆရာတော်ကြီးဘဒ္ဒန္တ၀ိနယာလင်္ကာရ အဓိကဦးဆောင်ပြီး စီစဉ်ပေးခဲ့တယ်လို့ သိရပါတယ်။ မြန်မာနိုင်ငံက လှူဒါန်းတဲ့ စိန်ဖူးတော်ကြီးတွင် ရွှေ(၃)ပိဿာ၊ ဘော်ငွေ (၄၁)ပိဿာခွဲနဲ့သွင်းလုပ်ခဲ့ပြီး ပတ္တမြား (၃၆၂၈)လုံး၊ နီလာ (၇၀၂)လုံး၊ န၀ရတ်ကိုးသွယ် (၉)စုံ၊ ပန်းရေဖြောင့် (၁၂)၊ စုစုပေါင်းရတနာပစ္စည်း (၄၃၅၀)ခုတို့နဲ့ စီခြယ်ထားပါတယ်။ ထိပ်ဆုံးတွင် စီခြယ်ထားခဲ့တဲ့ ပတ္တမြားမှာ (၁၅)ရတီရှိပြီး ထိုတစ်ခုတည်းနဲ့ပင် ထိုစဉ်က မြန်မာငွေ (၁၂၀၀၀)ကျော် တန်ကြေးရှိတယ်လို့ ဆိုပါတယ်။ ရတနာမျိုးစုံပါဝင်တဲ့ ထီးတော်ကြီးတစ်ခုလုံးရဲ့တန်းဖိုးမှာ မြန်မာငွေ (၁)သိန်းကျော် တန်ကြေးရှိပါတယ်။ မြန်မာပြည်သူများ လှူဒါန်းထားတဲ့ကုသိုလ်ကောင်းမှုကို သီရိလင်္ကာပြည်သူများက ယနေ့တိုင် အမှတ်တရ ရှိနေကြဆဲပါ။

စေတီရင်ပြင်တော်ပေါ်တွင် စေတီတော်လှူဒါန်းသူ ဒုဋ္ဌဂါမဏိမင်းကြီးက စေတီတော်ကိုလက်အုပ်ချီနေတဲ့ ရုပ်တုတော်၊ ကျောက်သားနဲ့ထွင်းထုထားတဲ့ မဟာစေတီပုံစံငယ်အစရှိတဲ့ ရှေးဟောင်းလက်ရာများလည်း လေ့လာနိုင်ပါတယ်။ မဟာစေတီတော်ကြီးကို မြန်မာများက မဟာစေတီလို့ သိကြသော်လည်း သီရိလင်္ကာလူမျိုးတို့ကတော့ ရုဝဏ်ဝေလိစယ (Ruwanwelisaya)ခေါ်ကြပြီး မဟာစေတီလို့လည်းကောင်း၊ မဟာထူပါလို့လည်းကောင်း၊ ရတနမာလီလို့လည်းကောင်း ခေါ်ဝေါ်ကြပါသေးတယ်။ မဟာစေတီရဲ့လက်ရှိဉာဏ်တော်အမြင့်မှာ (၃၀၀)ပေရှိပြီး လုံးပတ်တော်မှာ (၂၉၈)ပေရှိပါတယ်။

သာသနာဆုတ်ယုတ်ကွယ်လွန်တဲ့အခါ စကြာဝဠာအနန္တမှာရှိသမျှ မြတ်ဗုဒ္ဓရဲ့ဓာတ်တော်၊ မွေတော်တွေဟာ သီရိလင်္ကာနိုင်ငံရှိ မဟာစေတီမှာ စုပေါင်းကြပါမယ်။ ထို့နောက် နာဂဒီပကျွန်းက လင်းလွန်းပင်စေတီသို့ ပြောင်းရွေ့ကြပြီး မဟာဗောဓိပင်ရောက်တဲ့အခါ မြတ်ဗုဒ္ဓသက်တော်ထင်ရှား ထက်ဝယ်ဖွဲ့ခွေနေတဲ့ ပုံစံကို ပြတော်မူလိမ့်မယ်။ နောက်ပြီး တန်ခိုးပြာဋိဟာရေမီးအစုံ ပြတော်မူမယ်။ ရောင်ခြည်တော်ခြောက်ပါးဟာ စကြာဝဠာတစ်သောင်းကို ပျံ့နှံ့ပေမဲ့ လူသားတွေကတော့ မဖူးမြင်ရဘဲ နတ်ဗြဟ္မာတွေသာ ဖူးမြင်ခွင့်ရပြီး ယနေ့အမှန် သာသနာကွယ်ပြီ၊ လောက၀ယ် အမိုက်အတိသာဖြစ်တော့မယ်လို့ နတ်တွေဟာ ပူဆွေးငိုကြွေးကြပါလိမ့်မယ်။ ဒီလိုနဲ့ ဓာတ်တော်ကနေ မီးထွက်ပြီး ဓာတ်တော်အားလုံး မီးလောင်းကျွမ်းကာ မီးလျှံများဟာ ဗြဟ္မာ့ပြည်တိုင်အောင် တက်သွားပါလိမ့်မယ်။ နတ်ဗြဟ္မာတွေလည်း နောင်အခါပွင့်တော်မူမဲ့ ဘုရားရှင်ကိုဖူးတွေ့ရပါစေလို့ ဆုတောင်းပြီး မိမိတို့နေရာ ပြန်သွားကြလိမ့်မယ်လို့ သာသနာလင်္ကာရစာတမ်းမှာ ဖော်ပြထားပါတယ်။

ဒါကတော့ သီရိလင်္ကာဘုရားဖူးခရီးစဉ်တွင်ပါတဲ့ မဟာစေတီအကြောင်းပါ။ အောက်ကဓာတ်ပုံတွေကတော့ ဦးဇင်း သီရိလင်္ကာတွင် ပညာသင်နေစဉ်အတွင်း ဘုရားဖူးလာရောက်ဖို့ရန် လျှောက်ထားတာကို ဆရာတော် မေတ္တာရှင်(ရွှေပြည်သာ)လာရောက်တဲ့အခါ ဘုရားဖူးလျှောက်ဖို့ရင်း ဒုဋ္ဌဂါမဏိမင်းရုပ်တုနားမှာ မှတ်တမ်းတင်ထားတဲ့ ဓာတ်ပုံနဲ့ မဟာစေတီတော်ပုံ ဖြစ်ပါတယ်။ သီရိလင်္ကာလူမျိုးများက စေတီတော်၊ ရုပ်ပွားတော်တွေ နောက်ခံထားပြီး ဓာတ်ပုံရိုက်တာ ခွင့်မပြုကြပါဘူး။ တချို့နေရာများတွင် နောက်ကျောပေး ဓာတ်ပုံမရိုက်ရလို့ အတိအလင်း စာရေးထားကြပြီး စာမရေးတဲ့နေရာတွေမှာလည်း နောက်ခံထားဓာတ်ပုံရိုက်တာမြင်ရင် တားမြစ်လေ့ရှိကြပါတယ်။ မြန်မာလူမျိုးများနဲ့ ကွာခြားချက်ကတော့ ဘုရားကိုနောက်ခံထားတာနဲ့ မထားတာဟာ အတော်လေး ကွာတယ်လို့ ပြောရပါမယ်။ မြန်မာပြည်မှာက ဓာတ်ပုံရိုက်ရင် ဘုရားကိုနောက်ခံထားရိုက်ကြတာ များပါတယ်။ သီရိလင်္ကာလူမျိုးများကတော့ ဘုရားကို နောက်ကျောပေးတာဟာ ရိုင်းစိုင်းတဲ့အမှုအရာဖြစ်တယ်လို့ သတ်မှတ်ကြတာကြောင့် မည်သူကိုမျှ ခွင့်မပြုကြပေ။ ဒါကြောင့် သီရိလင်္ကာဘုရားဖူးဓာတ်ပုံများတွင် ဘုရားကိုနောက်ခံမထားဘဲ ဘေးကနေ လက်အုပ်ချီပုံများသာ ရိုက်ကြရပါတယ်။

ဆက်လက်ပြီး သီရိလင်္ကာဘုရားဖူးခရီးစဉ်တွင်ပါရှိတဲ့ ဘုရားသမိုင်း၊ ကျောင်းသမိုင်းစတာတွေကို မှတ်တမ်းဓာတ်ပုံများနဲ့ ပူးတွဲတင်ပြပေးပါဦးမယ်။ စာဖတ်ပရိသတ်များ ဗဟုသုတတိုးပွားပြီး ကိုယ်စိတ်နှစ်ပါးချမ်းသာကြပါစေလို့ ဆန္ဒပြုလျက်…..။

အရှင်ကောမလ ဆန်နီနေမင်း

0 comments:

Post a Comment

Powered by Blogger.