Friday, September 28, 2012

ပုထုဇ္ဇနော ဥမ္မတ္တကောနဲ့ပတ်သတ်၍

ပုထုဇဉ်မှန်သမျှ အရူးတွေပဲလို့ အရှင်ဘုရားတို့ မြတ်ဗုဒ္ဓက ဟောကြားခဲ့တာဆိုတော့ ပုထုဇဉ်ရဟန်း တော်တွေမှန်သမျှဟာ အရူးတွေပဲမို့ အရှင်ဘုရားတို့သံဃာတွေရဲ့ ပြောဆိုဟောကြား ချက်တွေကို တပည့်တော်က ဘယ်လိုလုပ် ယုံရမလဲဘုရားတဲ့။

အဲဒီလိုပြောလာတဲ့အတွက် ဦးဇင်းက ကျမ်းဂန်ပေါင်းစုံကို ရှာဖွေကြည့်တဲ့အခါ ပုထုဇ္ဇနော ဥမ္မတ္တကောလို့ မြတ်ဗုဒ္ဓဟောကြားခဲ့တဲ့ ပါဠိတော်စာအုပ်များမှာ မတွေ့ရဘဲ ပါဠိတော်များကို အကျယ်ဖွင့်ဆိုရေးသားသော အဋ္ဌကထာ၊ ဋီကာ ဆရာတော်များရဲ့ ဥပမာပေးဖွင့်ဆိုချက်တွေမှာသာ "ဥမ္မတ္တကော ၀ိယ ဟိ ပုထုဇ္ဇနော။ ဥမ္မတ္တကော ၀ိယ ဗာလပုထုဇ္ဇနော"လို့ တွေ့ရပါတယ်။

မူလပဏ္ဏာသ၊ အဋ္ဌကထာ၊ အတွဲ(၁)၊ စာမျက်နှာ(၂၇)မှာ "ဥမ္မတ္တကော ၀ိယ ဟိ ပုထုဇ္ဇနောဆိုတဲ့ ဖွင့်ဆိုချက်ကို စစ်ဆေးကြည့်တဲ့အခါ အဋ္ဌကထာဆရာက ပုထုဇဉ်တွေဟာ မမြဲတဲ့တရားတွေကို မြဲတယ်ထင်ပြီး တဏှာ၊ မာန၊ ဒိဋ္ဌိတွေ ဖြစ်နေကြတယ်။ ပထ၀ီဆိုတဲ့ မြေကြီးကိုလည်း မာသဘော၊ ပျော့သဘောလေးသာရှိတာမို့ ဖောက်ပြန်ပျက်စီးတတ်တယ်လို့ မသိဘဲနဲ့ ဒါက ငါ့မြေ၊ ဒါက သူ့မြေဆိုပြီး ဖောက်ပြန်တဲ့မှားယွင်းတဲ့ အမြင်တွေ ရှိနေကြတယ်။ ဘာနဲ့တူသလဲဆိုရင် အရူးဟာ အမှန်တရားကို အမှန်တိုင်း မသိမြင်သလို ပုထဇဉ်တွေဟာ အဲဒီလိုကိလေသာတရားတွေဖြစ်နေတဲ့အတွက် အရူးနဲ့တူတယ်လို့ ရှင်းလင်းအောင် အဓိပ္ပါယ်ဖွင့်ဆိုပေးထားတာကို တွေ့ရပါတယ်။

နောက်ပြီး ဆံပင်ကောင်းတဲ့လူကလည်း ငါ့ဆံပင်လေးက ကောင်းတယ်၊ လှတယ်လို့ တဏှာနဲ့နှလုံးသွင်းကြသလို အခြားပုဂ္ဂိုလ်တွေကလည်း ဆံပင်ကောင်းသူကိုမြင်ရင် သူ့ဆံပင်လေးက လှလိုက်တာစသည်ဖြင့် တဏှာဒိဋ္ဌိတွေ ဖြစ်ကြတယ်။ တကယ်တော့ ဆံပင်၊ မျက်စိ၊ သွားစတဲ့ သတ္တ၀ါတိုင်းရဲ့ ခန္ဓာကိုယ်က (၃၂)ပါးသော ကောဋ္ဌာသတွေဟာ ပုတ်သိုးယိုးစီးကာ အချိန်နဲ့အမျှ ပျက်စီးနေတယ်ဆိုတာကို မသိကြလို့ပါ။ အဲဒီလို အမှန်ကို အမှန်တိုင်း မသိမြင်တဲ့အချိန်ဟာ အရူးနဲ့တူတဲ့ချိန်လို့ သတ်မှတ်ရပါမယ်။

ဒါပြင် အရူးနဲ့တူတဲ့ပုထုဇဉ်ဆိုတာ ဒါက ယုတ္တိရှိတယ်၊ မရှိဘူးဆိုတာကို မစဉ်းစားမဆင်ခြင်ဘဲနဲ့ တစ်ခုခုသော ကောင်းမှုကိုပြုလုပ်ရင် ဥပါဒါန်အစွဲနဲ့ ဘ၀တွေကို တောင်းတတတ်ကြတယ်။ ဒါဟာ ဘာနဲ့တူသလဲဆိုတော့ အရူးဟာ ကောင်းမကောင်းကို မစဉ်းစားမဆင်ခြင်တတ်သလို ကောင်းမှုလုပ်ရင် နိဗ္ဗာန်ကိုဆုမတောင်းဘဲ နတ်ချမ်းသာ၊ လူချမ်းသာတွေကို တောင်းတကြတဲ့လူတွေကို ဆိုလိုပါတယ်။ တကယ်တော့ ကောင်းမှုလုပ်ရင် နိဗ္ဗာန်ချမ်းသာတစ်ခုကိုပဲ အာရုံပြုရင် ပြည့်စုံပါပြီ။ လူချမ်းသာ၊ နတ်ချမ်းသာတွေကို တောင်းတစရာ မလိုပါဘူး။

ဥပမာ-မန္တလေးကနေ ရန်ကုန်ကို သွားတဲ့လူဟာ လမ်းမှာဖြတ်သန်းသွားရမဲ့ နေပြည်တော်၊ ပဲခူးစတဲ့ မြို့တွေကို ရောက်ရပါလို၏လို့ ဆုတောင်းစရာ မလိုပါဘူး။ ကိုယ်က ရန်ကုန်ကိုသွားနေတယ်ဆိုမှတော့ အလယ်ကမြို့တွေဟာ မရောက်ချင်လည်း ရောက်ရမှာပါ။ ဒါကြောင့် မိမိက နိဗ္ဗာန်ကိုဆုတောင်းလိုက်ရင် မိမိနိဗ္ဗာန်မရောက်မချင်း လူချမ်းသာ၊ နတ်ချမ်းသာတွေဆိုတာ ဖြစ်နေရဦးမှာပါ။ 

ပုထုဇဉ်တွေဟာ အရိယာပုဂ္ဂိုလ်တွေနဲ့နှိုင်းယှဉ်လိုက်ရင် အရူးနဲ့တူတယ်လို့ ဖွင့်ဆိုပြခြင်းပါ။ အရိယာပုဂ္ဂိုလ်တွေဟာ အမှန်ကိုအမှန်လို့သိတဲ့အတွက် တက်မက်စရာတွေ၊ ဒေါသဖြစ်စရာတွေကို အကုသိုလ်မဖြစ်အောင် ထိန်းချုပ်နိုင်တာက ပုထုဇဉ်တွေထက် အများကြီးသာလွန်ပါတယ်။ ပုထုဇဉ်တွေဟာ မမြဲတဲ့ရုပ်တရားကို မြဲတယ်ထင်ပြီး နှစ်သက်တာတွေ၊ မုန်းတီးတာတွေ၊ တွေးဝေမှုတွေ ဖြစ်ကြပါတယ်။ အဲဒီလို ပုထုဇဉ်နဲ့အရိယာတို့ဟာ တရားသဘောနဲ့ပတ်သတ်ပြီး အမှန်ကို အမှန်တိုင်းမမြင်တဲ့အတွက် အရူးနဲ့တူတယ်လို့ ဆိုလိုခြင်းတာပါ။ အရူးဟာ ကောင်းတာဆိုးတာ မခွဲခြားနိုင်သလို ပုထုဇဉ်တွေကလည်း မမြဲတာတွေကို မြဲတယ်ထင်ပြီး လောဘ၊ ဒေါသဖြစ်ကြပါတယ်။ ဒါကြောင့် ပုထုဇဉ်နဲ့အရိယာတို့ကို နှိုင်းယှဉ်ပြရာမှာ ပုထုဇဉ်ဟာ အရူးနဲ့တူတယ်လို့ ဖွင့်ဆိုပြခြင်း ဖြစ်ပါတယ်။

ဒီတော့ ပုထုဇဉ်တွေဟာ တရားနဲ့ပတ်သတ်တဲ့ အမှန်ကို အမှန်တိုင်း မမြင်တဲ့နေရာမှာသာ အရူးနဲ့တူတာပါ။ မိမိတို့က မမြဲတဲ့အရာတွေကို မြဲတယ်ထင်ပြီး လောဘ၊ ဒေါသတွေဖြစ်ကြမယ်ဆိုရင်တော့ အဲဒီလောဘ၊ ဒေါသ ဖြစ်နေတဲ့အချိန်ဟာ အရူးဖြစ်ချိန်လို့ မှတ်ရပါမယ်။ ကျန်တဲ့ သူတော်ကောင်းတရားတွေ ဖြစ်နေချိန်မှာတော့ အရူးမဟုတ်ပါကြောင်း ပြန်လည်ဖြေကြားပေးခဲ့ပါတယ်။

ဥမ္မတ္တကော ၀ိယ ဟိ ပုထုဇ္ဇနောလို့ (အဘိ၊ ဋ္ဌ၊ ၂၊ ၁၇၆)။ (မ၊ ဋ္ဌ၊ ၁၊ ၂၇)။ (ပဋိသံ၊ ဋ္ဌ၊ ၂၊ ၅၆)တို့မှာ ဖွင့်ဆိုပြထားသလို ဥမ္မတ္တကော ၀ိယ ဗာလပုထုဇ္ဇနောလို့ (သံ၊ ဋ္ဌ၊ ၂၊ ၃၉)။ (သာရတ္ထ၊ ဋီ၊ ၃၊ ၁၃၉)တို့မှာ ဖွင့်ဆိုပြထားပါတယ်။

ဦးဇင်းဆီမှာ ပိဋကတ်သုံးပုံစီဒီခွေ၊ အွန်လိုင်းတိပိဋက၊ ပါဠိတော်၊ မြန်မာပြန် PDF ဖိုင်များသာရှိပြီး အဋ္ဌကထာ၊ ဋီကာများရဲ့ မြန်မာပြန်၊ နိဿယများ မရှိတဲ့အတွက် မိမိတက်သိသမျှလေးနဲ့သာ အဋ္ဌကထာ၊ ဋီကာများကို မြန်မာပြန်ပေးလိုက်တာမို့ အားနည်းချက်၊ လိုအပ်ချက်များရှိပါက နားလည်ပေးကြပါလေ။ စာဖတ်ပရိသတ်အားလုံး အသိပညာတိုးပွားပြီး အရူးဖြစ်နေချိန် နည်းပါးပါစေလို့ ဆန္ဒပြုလျက်.....။

0 comments:

Post a Comment

Powered by Blogger.