Sunday, September 2, 2012

အာပတ်နဲ့တကွ စုတေလျှင် (၅)

သေခါနီးလူရဲ့အနားမှာ သူလုပ်ခဲ့တဲ့ ကောင်းမှုတွေကိုပြန်အာရုံပြုနိုင်အောင် ပြောဆိုပေးနိုင်သူ၊ သူ့အတွက် ကောင်းမှုတစ်ခုခုလှူဒါန်းပေးပြီး အာရုံပြုနိုင်အောင် ပြုလုပ်ပေးနိုင်သူ၊ ဒီပစ္စည်လေးဟာ ခင်ဗျားအတွက် ဘုရားရှင်ဆီကိုလှူပေးတာ၊ ဒီကောင်းမှုလေးကို အာရုံပြုပေးပါလို့ ပြောဆိုပေးနိုင်သူ၊ တရားစကားများ ပြောပေးနိုင်သူ၊ တရားခွေများ ဖွင့်ပေးသူတို့သာလျှင် သေခါနီးလူရဲ့အနီးမှာ တစ်ယောက်လောက်ပဲ နေသင့်ပါတယ်။ လူများရင် သေခါနီးလူဟာ အဲဒီနဘေးလူတွေရဲ့ ၀မ်းနည်း၊ ငိုကြွေးတာ၊ သံယောဇဉ်တွယ်တာ၊ စိတ်မချတာစတဲ့ မကောင်းတာတွေကို အာရုံပြုမိပြီး မကောင်းနိမိတ်ထင်ကာ မကောင်းဘုံကိုရောက်သွားနိုင်ပါတယ်။ ဒါကြောင့် သေခါနီးလူရဲ့အနားမှာ သူ့အတွက် အကျိုးရှိအောင်လုပ်ပေးနိုင်သူသာ နေပေးရမယ်ဆိုတာ သတိထားကြပါလေ။

သေခါနီးမှ ကောင်းမှုလုပ်လိုက်လို့ ကောင်းတဲ့ဘုံကို အကျိုးပေးတဲ့ပုဂ္ဂိုလ်ဟာ အရင်က မကောင်းတာတွေပဲ လုပ်ခဲ့တဲ့ပုဂ္ဂိုလ်ဆိုရင်တော့ ခဏတာသာ ကောင်းတဲ့ဘုံကိုရောက်ပြီး သူမကောင်းကျိုးများကို ပြန်လည်ခံစားရပါမယ်။ ဥပမာ-သေခါနီးမှာ ကောင်းမှုလုပ်ပြီး ကောင်းတဲ့အာရုံကြောင့် လူပြည်ရောက်သွားသော်လည်း အဲဒီပုဂ္ဂိုလ်ဟာ အရင်က မကောင်းတာတွေပဲ လုပ်ခဲ့ရင် လူဖြစ်ပြီး လူချင်းမတူတဲ့ စွံ့အနားမကြား၊ ဒုက္ခိတ၊ ရောဂါများခြင်း၊ မွေးပြီးခဏသေခြင်း၊ ဆင်းရဲနုံခြာတဲ့ဘ၀ဖြစ်ခြင်း၊ ဉာဏ်ထိုင်မှိုင်ခြင်းစတဲ့ မကောင်းကျိုးများကို ခံစားရပါလိမ့်မယ်။ လူပြည်မဟုတ်ဘဲ နတ်ပြည် ရောက်သွားရင်လည်း နတ်ခြင်းမတူဘဲ စည်းစိမ်းနည်းပါးခြင်း၊ အခြံအရံနည်းပါးခြင်း၊ ရုပ်ရေနုံခြာခြင်းစတဲ့ မကောင်းကျိုးများကို ခံစားရပါမယ်။

တချို့က အထင်မှားနေကြတဲ့အယူလေးတွေလည်း ရှိပါသေးတယ်။ ဘာဖြစ်လို့ သေခါနီးမှလုပ်တဲ့ကုသိုလ်က အရင်အကျိုးပေးသလဲ၊ သေခါနီးမှ ကောင်းမှုလုပ်ရင် အဲဒီပုဂ္ဂိုလ်ဟာ ကောင်းတဲ့ဘုံရောက်တယ်ဆိုတော့ သေခါနီးမှလုပ်မယ်လို့ စိတ်ကူးကြသူများလည်း တွေ့ရပါတယ်။ သေခါနီးမှ ကောင်းမှုလုပ်လို့ ကောင်းတဲ့ဘုံကိုအကျိုးပေးသော်လည်း မိမိသေခါနီး တွင် ကောင်းမှုလုပ်ဖို့ရန် ဘယ်လိုသေခြင်းမျိုးနဲ့ သေမလဲဆိုတာ မသိနိုင်ပါ။ ဥပမာ-ရုတ်တရက် သေသွားနိုင်တဲ့ သေခြင်းများနဲ့သေသွားရင် ဘယ်မှာကောင်းမှုလုပ်နိုင်မလဲ၊ မိမိဘယ်ချိန် ဘယ်နေရာ ဘယ်လိုလူမျိုးတွေရှေ့မှာ သေရမယ်ဆိုတာရော ဘယ်သူကကြိုတင်သိနိုင်မလဲ ဆိုတာတွေ ရှိသေးသည့်အတွက် မသေခင် အသက်ရှင်နေတုန်းမှာ ကောင်းမှုများကို နေ့စဉ်လုပ်ပြီး မိမိစိတ်မှာ ကုသိုလ်အာရုံများဖြင့် ပျော်မွေ့နေအောင် လုပ်ပေးရပါမယ်။

မိမိတို့ဟာ ယခုလူ့ဘ၀ရနေလို့ ယခုဘ၀အတွက် သိပ်ပူပန်စရာမလိုတော့ပါ။ အနာဂတ်ဖြစ်လာမဲ့ ဘ၀တွေကောင်းဖို့ကိုသာ အဓိကထားလုပ်ပေးရပါမယ်။ မျက်မှောက်တစ်ဘ၀ ကောင်းစားဖို့နဲ့ ရှေ့ဆက်ဖြစ်ရမဲ့ဘ၀ပေါင်းများစွာ ကောင်းစားဖို့တို့ကို နှိုင်းယှဉ်ကြည့်ကာ ဘယ်အရာက ပိုအရေးပါသလဲ ဘယ်အတွက်ကို အဓိကထားလုပ်ပေးရမလဲဆိုတာ စဉ်းစားပြီး မကောင်းမှုများကို ဒီဘ၀အတွက်နဲ့တော့ မလုပ်ဘဲနဲ့ကောင်းမှုများကိုသာ အနာဂတ်ဘ၀ များစွာအတွက် ကောင်းဖို့ရန် လုပ်ပေးကြဖို့ အဓိကလိုအပ်ပါပေတယ်။

နောက်ဆုံးသေခါနီးမှပြုလုပ်တဲ့ကုသိုလ်ဟာ အဘယ့်ကြောင့်အရင်အကျိုးပေးသလဲဆိုရင် သေခါနီးပုဂ္ဂိုလ်ရဲ့စိတ်ဟာ ယုံကြည်မှုအပြည့်နဲ့ပြုလုပ်တဲ့အတွက်ကြောင့် ဖြစ်ပါတယ်။ ထို့ပြင် သဘာဝတရားနဲ့ကြည့်မယ်ဆိုရင်လည်း နောက်မှလုပ်တဲ့အလုပ်ဟာ အရင်အကျိုးပေးတတ်တဲ့ သဘောကြောင့်လည်း ပါပါတယ်။

ဥပမာ-နွားခြံထဲမှာ နွားသွင်းတဲ့အခါ ငယ်ရွယ်ပြီးခွန်အားရှိတဲ့ နွားကလေးများဟာ အိုမင်းရင့်ရော်နေတဲ့ နွားကြီးများကို တိုးဝှေ့ပြီး ရှေ့ကနေ အရင်ဝင်နေကြတဲ့အခါ နွားအိုကြီးများဟာ နောက်ဆုံးမှဝင်ရတာကြောင့် နွားခြံတံခါးဝသာ နေရာရတတ်ပါတယ်။ သို့သော် နွားခြံအပြင်သို့ ထွက်ရတဲ့အခါ နောက်မှဝင်ရတဲ့ နွားအိုကြီးများက အရင်ထွက်ကြရပါတယ်။ အဲဒီဥပမာလိုပဲ ဘ၀ဟောင်းမှ ဘ၀သစ်သို့ ပြောင်းလဲတော့မဲ့အချိန်တွင် သေခါနီးမှလုပ်တဲ့ ကုသိုလ်က ရှေးကနေအရင် အကျိုးပေးလိုက်တာပါ။

တချို့က အဖေမုဆိုးသားသတ်သမားကြီးကို သားဖြစ်သူရဟန္တာက ကောင်းမှုလုပ်ပေးလို့ မုဆိုးကြီးနတ်ပြည်ရောက်သွားတဲ့ တရားဇာတ်လမ်းဖတ်ပြီး သံသယဖြစ်နေကြတာ တွေ့ရပါတယ်။ မုဆိုးကြီးဟာ သေခါနီး(၁)လလောက်အလိုမှ သားဖြစ်သူရဟန္တာမထေရ်ထံ ရောက်လာပြီး ရဟန်းဝတ်ကာ တရားအားထုတ်ခဲ့ပါတယ်။ သေခါနီးနောင်တတရားရလို့ တရားအားထုတ်သော်လည်း သူလုပ်ခဲ့တဲ့ အကုသိုလ်တွေများတာကြောင့် အဲဒီအကုသိုလ်တွေကိုပဲ စိတ်ကအာရုံ ရောက်ပြီး အကုသိုလ်တရားတွေက သူကိုလာခြောက်နေသလိုဖြစ်နေတဲ့အတွက် မုဆိုးရဟန်းကြီး တရားအားထုတ်လို့ မရရှာပါဘူး။

ဒီလိုနဲ့ သေခါနီးလည်းရောက်ရော မုဆိုးကြီးဟာ မကောင်းတဲ့နိမိတ်ဖြစ်တဲ့ ခွေးဆွဲတာတွေ ခွေးကြီးတွေလိုက်နေတာတွေမြင်ပြီး အော်ဟစ်နေပါတယ်။ အဲဒီအခါမှာ သားဖြစ်သူရဟန်းက အင်း-ငါ့ခမည်းတော်တော့ သူလုပ်ခဲ့တဲ့မကောင်းမှုအကုသိုလ်တွေကြောင့် မကောင်းတဲ့နိမိတ် တွေမြင်ကာ အပါယ်ကိုသွားရတော့မှာပဲ။ ငါလို သားရဟန်းတစ်ပါးရှေ့မှာ ဒီလိုမကောင်းတဲ့ နိမိတ်တွေမြင်ပြီး အပါယ်ကိုမသွားရအောင် ငါလုပ်ပေးမှဖြစ်မယ်ဆိုပြီး သားရဟန်းက သူဖခင်မုဆိုးကြီးကို စေတီရင်ပေါ်သို့မရွေ့ပြီး ပန်းများရှာပေးကာ ဖခင် ဒီပန်းများဟာ ဖခင်အတွက် ပူဇော်ပေးခြင်းဖြစ်ပါတယ်။ ဖခင် ပန်းများကို မြတ်ဗုဒ္ဓအား ပူဇော်နေတယ်လို့ အာရုံပြုပေးပါလို့ ပြောလိုက်တဲ့အခါ မုဆိုးကြီးအာရုံပြုလုပ်တဲ့အတွက်ကြောင့် ကုသိုလ်စိတ်ဖြစ်ကာ နတ်ပြည်မှ နတ်သမီးလာခေါ်တဲ့ ကောင်းတဲ့နိမိတ်မြင်ပြီး နတ်သားသွားဖြစ်ပါတယ်။

ခဏတာဘုရားလှူတဲ့ အာရုံလေးပြုမိတာနဲ့ ကောင်းတဲ့နတ်ပြည်ကိုရောက်သွားတဲ့ မုဆိုးကြီးကိုကြည့်ပြီး လူတချို့က ကောင်းကံမကောင်းကံတို့ရဲ့ အကျိုးပေးကို သံသယမရှင်း ဖြစ်နေကြတာပါ။ အဲဒါကို ရှင်းပြပေးချင်လို့လည်း ဒီပို့စ်ကို ပြီးအောင် ရေးလိုက်တာ။ တကယ်တော့ မုဆိုးကြီးဟာ နောက်ဆုံးပြုလုပ်တဲ့ ကောင်းမှုကံလေးကြောင့် နတ်ပြည်ကိုရောက်သွားတာ မှန်ပါတယ်။ ဒါဟာလည်း အထက်က နွားခြံဥပမာလို သဘာဝတရားအတိုင်း ဘ၀တစ်ခုရဲ့ နောက်ဆုံးကုသိုလ်က အရင်အကျိုးပေးလိုက်လို့ပါ။

မုဆိုးကြီးနတ်ပြည်ရောက်သွားပေမဲ့ နတ်ပြည်မှာ ကြာကြာအသက်ရှည်ဖို့ စိည်းစိမ်ချမ်းသာ ပြည့်စုံဖို့မရှိပါဘူး။ ခဏနေပြီးရင် သူ့ဟာနတ်သက်ကြွေရမှာပါ။ ဒါကို သားဖြစ်သူရဟန်းကသိလို့ သူ့ဖခင်ရှိရာ နတ်ပြည်သို့သွားပြီး တရားဟောပေးလိုက်တဲ့အခါ မုဆိုးကြီး သောတာပန် အရိယာဖြစ်သွားပါတယ်။ ဦးဇင်းကသာ ယခုဘ၀ဟာ လူ့ဘ၀ကိုရနေပြီးမို့ ဒီဘ၀အတွက်အဓိကမထားဘဲ နောက်ဘ၀များစွာအတွက် အဓိကထားလုပ်ပါလို့ ပြောဆိုပေးနေပေမဲ့ တချို့က လူ့ဘ၀ဆိုတာရဖို့ မလွယ်ဘူး။ ဒါကြောင့် လူဖြစ်တုန်းလေး ကိုယ်နေချင်သလို နေလိုက်မယ်ဆိုတဲ့ ပုဂ္ဂိုလ်တွေကိုလည်း တွေ့ရပါတယ်။ လူ့ဘ၀ကို ကောင်းမှုကုသိုလ်လုပ်တဲ့ပုဂ္ဂိုလ်ဟာ ပြန်လည်ရရှိနိုင်ပါတယ်။

ဒီဘ၀ပဲ ပျော်အောင်နေတော့မယ်လို့ စိတ်ကူးထားပြီး ကောင်းမှုမလုပ်ဘဲ မကောင်းမှုများကိုပဲလုပ်တာကမှ အပါယ်လေးပါးမှလွတ်ဖို့ ခဲယဉ်းသွားပါမယ်။ လူ့ဘ၀မှာ ဒါနရော သီလရော ၀ိပဿနာပါလုပ်မယ်ဆိုရင် လူ့ဘ၀ကိုရဖို့က အလွယ်လေးပါ။ မိမိမှာသာ အယူမှားခြင်း၊ အမိသတ်၊ အဖသတ်၊ ဘုရားပြစ်မှား၊ ရဟန္တာသတ်တာ၊ ရဟန်းတွေသင်းကွဲအောင်လုပ်တာဆိုတဲ့ ကုသိုလ်နဲ့ချေဖျောက်လို့မရတဲ့ ဒီအပြစ်တွေမရှိဘူးဆိုရင် ဒီဘ၀နဲ့ နိဗ္ဗာန်ရောက်အောင်ထိ လုပ်လို့ရပါတယ်။ ကျန်တဲ့ လူ့ပြည် နတ်ပြည်ဆိုတာကတော့ ပိုတောင်လွယ်ပါသေးတယ်။ တကယ်လို့ မိမိအရင်က မသိတတ်နားမလည် လို့ဖြစ်စေ၊ နားလည်ပြီး မိုက်မဲခဲ့လို့ဖြစ်စေ မကောင်းမှုများ လုပ်မိခဲ့သည်ရှိသော် ထိုမကောင်းမှုများကို မိမိသိတတ်နားလည်ချိန်၊ တရားသဘောသိချိန်တွင် ကောင်းမှုလုပ်ကာ ချေဖျက်ရင် ရပါတယ်။ ရေများရေနိုင် မီးများ မီးနိုင်ဆိုသလို မကောင်းမှုရှိခဲ့ရင် အဲဒီမကောင်းမှုထက် ကောင်းမှုများအောင် လုပ်ပေးပေါ့လေ။

အထက်ဖော်ပြခဲ့ပါ မုဆိုးကြီးဟာလည်း မကောင်းမှုများလုပ်ခဲ့ပါတယ်။ သို့သော် သူလုပ်ခဲ့တဲ့မကောင်းမှု များဟာ အပြစ်ကြီးမားပြီး ချေဖျက်လို့မရတဲ့ အပြစ်များမဟုတ်လို့ အရိယာမဂ်ကုသိုလ်နဲ့ ပယ်သတ်ခဲ့ခြင်း ဖြစ်ပါတယ်။ ဒါကြောင့် မိမိတို့လူသားများလည်း အထက်ဖော်ပြပါ ချေဖျက်လို့မရတဲ့ အပြစ်(၆)မျိုးမရှိပါက ၀ိပဿနာအားထုတ်ခြင်းဖြင့် ရိုးရိုးအကုသိုလ်များကို ချေဖျက်လို့ ရပါတယ်။ အဲဒါကြောင့် ကြုံခဲလှတဲ့ ဘုရားသာသနာ၊ ရခဲလှတဲ့ လူ့ဘ၀၊ ရှိခဲလှတဲ့ဗုဒ္ဓအသိဉာဏ်ရှိချိန် အသက်ရှင်စဉ်လေးမှာ ဒီဘ၀လေးခဏတာ ကောင်းစားရေး ကိုကြည့်ပြီး မကောင်းမှုများကိုမလုပ်ဘဲ ကောင်းမှုများလုပ်ကာ အအေးချမ်းဆုံးဖြစ်တဲ့ နိဗ္ဗာန်ကို လျင်မြန်စွာရရှိအောင် ဆောင်ရွက်နိုင်ကြဖို့ လိုပါတယ်။

ဆက်လက်ရေးသားပါဦးမယ်။

1 comments:

moezawzaw said...

ဘုန်းဘုန်း
ခင်ပွန်းကြီး(၁၀)ပါးကို ပြစ်မှားမိရင်တော့
မလွတ်နိုင်ဘူးပေါ့နော်။
ဖတ်လိုက်ရတာ တန်ဖိုးအရမ်းရှိပါတယ်
နွားခြံထဲမှာ..............
ဥပမာလေးကောင်းပါတယ် နားလည်လွယ် မှတ်သားမိပါတယ်
လိုက်နာနိုင်အောင် ကြိုးစားပါ့မယ်။
ဘုန်းဘုန်း ချမ်းမြေ့ပါစေ

အမိုး

Post a Comment

Powered by Blogger.