Wednesday, August 29, 2012

အာပတ်နဲ့တကွ စုတေလျှင် (၄)

မန္တလေးရတနာပုံခေတ်မှာ ထင်ရှားခဲ့တဲ့ ကျီဝန်ဆရာတော်ကြီးက အာပတ်နဲ့စုတေရင် အပါယ်လားတယ်ဆိုတဲ့ အပေါ်မှာတင်ပြခဲ့သော သာရတ္ထဋီကာအဖွင့်ကို ပြောတဲ့အခါ မိုင်ကိုင်ဆရာတော်ကြီးက အဲဒီလိုတစ်ထစ်ချမုချပုံသေ မယူသင့်ကြောင်း အောက်ပါအကိုးကားများဖြင့် ပြန်လည်လျှောက်တင်ခဲ့ပါတယ်။

ပုဂ္ဂလပညတ်ပါဠိတော်မှာ ပဉ္စာနန္တရိယကံငါးပါးထိုက်သူနဲ့ နိယတမိစ္ဆာဒိဋ္ဌိအယူရှိသူတို့သာ သေသည်၏အခြား၌ လားရာဂတိ အမြဲရှိဖြစ်တယ်လို့ မြတ်ဗုဒ္ဓက မိန့်ကြားခဲ့ပါတယ်။ ဒါပြင် ပရိဝါပါဠိတော်တွင်လည်း ပဉ္စာနန္တရိယာနိယတာ၊ သေသာ အနိယတာ-ပဉ္စာနန္တိရိယကံငါးပါးကျုးလွန်သူသာ မြဲသောအာပတ်ရှိတယ်။ ကြွင်းတဲ့အပြစ်အာပတ်တို့သည် မမြဲကုန်လို့ ပါရှိတယ်။ တဖန် ဓု၀၀ိပါကဆိုတဲ့ မြဲသောအကျိုးပေးရာတို့ကို စီစစ်ကြည့်ရာတွင် ပဉ္စာနန္တရိယကံ၊ သမာပတ်ရှစ်ပါးနဲ့ နိယတမိစ္ဆာဒိဋ္ဌိတို့သည် မြဲ၏လို့ ဟောကြားချက်ရှိနေပြန်တယ်။

ဒါကြောင့် အာပတ်နဲ့တကွ စုတေလျှင် အပါယ်ကျရမည်ဟူသော စကားဟာ ပုံသေမုချမဟုတ်သဖြင့် သေခါနီးကာလတွင် အတွေးခေါင်ကာ ပူပင်သောကကြီးပြီး သိက္ခာချစရာမလိုကြောင့် ဆရာတော်ကြီးများက အထောက်အထားများနဲ့ ဖြေဆိုပေးထားခြင်း ဖြစ်ပါတယ်။ ဒီစာပေတွေကို နောက်လူတွေက လက်ဆင့်ကမ်းမဖြန့်ဖြူးနိုင်တဲ့အတွက် အာပတ်နဲ့တကွစုတေလျှင် အပါယ်သွားရတယ်ဆိုတာကို သံသယမကင်း ဖြစ်နေကြတာပါ။ အဲဒါကြောင့်လည်း ဦးဇင်းက မိမိဒေါက်တာကျမ်းအတွက်ရေးနေတဲ့ ရဟန်းသံဃာဆိုင်ရာတွေကို လေ့လာရှာဖွေရင်း တွေ့ရှိတာများကို အများသိအောင် လက်ဆင့်ကမ်းပေးခြင်း ဖြစ်ပါတယ်။ ဦးဇင်းကိုယ်တိုင်လည်း အရင်က ဟိုစကား ဒီစကားများကြားရတဲ့အခါ သံသယများစွာဖြစ်ခဲ့ရပါတယ်။ အဲဒါကြောင့် သိသင့်သိထိုက်တာများ မိမိတွေ့ရှိလာတဲ့အခါ အများလည်းသိရအောင်ဆိုပြီး ကိုယ့်အချိန်ထဲကနေ ဖဲ့ပြီးသကာလ တင်ပြပေးခြင်း ဖြစ်ပါတယ်။

ဦးဇင်းကိုယ်တိုင် တက်သိလို့ရေးတာမဟုတ်ဘဲ ဆရာတော်များရဲ့ရေးသားချက်များကို တွေ့ရှိသည့်အလျောက်တင်ပြလိုက်ခြင်းဖြစ်တာကြောင့် မှားတာမှန်တာ လိုက်နာတာမလိုက်တာကတော့ ဦးဇင်းနဲ့မဆိုင်ပါဘူး။ မိမိသိတဲ့အသိပညာကို မြတ်ဗုဒ္ဓရဲ့ ၀ိဘဇ္ဇ၀ါဒအတိုင်း ခွဲခြားဝေဖန်နိုင်အောင် ဓမ္မဒေသနာအဖြစ် ကုသိုလ်ရအောင် စေတနာကောင်းစွာဖြင့် မျှဝေပေးလိုက်တာပါ။

အာပတ်ဟူသောစကားဟာ တကယ်တော့ လွန်ကျုးတဲ့အပြစ်ကို ဆိုလိုတာပါ။ အဲဒီလိုလွန်ကျုးတဲ့အပြစ်ကို မည်သည့်ဘာသာ၊ လူမျိုးမဆို မိမိတို့လွန်ကျုးတဲ့အပြစ်အလျောက် အသေးကြီးပေါ်မူတည်ပြီး ကောင်းကျိုးဆိုးမွေတွေကို ခံစားရပါတယ်။ အဲဒါကြောင့် မည်သည့်လူမျိုးဘာသာမဆို ပဉ္စာနန္တရိယကံနဲ့နိယတမိစ္ဆာဒိဋ္ဌိတွေရှိနေရင်တော့ မြဲမြံခိုင်ခန့်သေချာတဲ့ အပါယ်ကိုသွားရမှာဖြစ်ပြီး ရှောင်လွဲလို့မရပါဘူး။ အဲဒါကိုတော့ မိမိတို့ဘ၀တစ်လျှောက် သံသရာတစ်လျှောက်လုံး မမှားမိအောင် ယနေ့ကတည်းက စိတ်ထားမှန်ကန်စွာနဲ့ လေ့ကျင့်ပြီး အကျင့်ပါအောင် ပြုလုပ်ယူကြပေါ့လေ။

အထက်မှာဖော်ပြခဲ့တဲ့အတိုင်း မြတ်စွာဘုရားနဲ့ပစ္စေကဗုဒ္ဓါတို့သာ အာပတ်မှစင်ကြယ်ကြပြီး ကျန်ပုဂ္ဂိုလ်များ တစ်ခါတရံ အာပတ်မှမလွတ်နိုင်ဘူးလို့ဆိုထားတဲ့အတွက် သေးငယ်တဲ့အာပတ်များကို တွေးပြီးကြောက်နေစရာမလိုသလို သင့်ချင်သလောက် သင့်ပါစေဆိုတဲ့ စိတ်ဓာတ်များလည်း မရှိရပါ။ ကာယ၀ိညတ်၊ ၀စီဝိညတ်တို့ကို စောင့်ထိန်းနေလျက် မတော်တဆ မလွဲသာအခန့်မသင့်လို့ သေးငယ်တဲ့အာပတ်သင့်ပြီးသေရင် အပါယ်လားရမှာလားဆိုတဲ့ ကြောက်စိတ်တွေဖြစ်ပြီး သာသနာ့ဘောင်ကနေ အကြောင်းပြ ထွက်ခွာမသွားဖို့ပါ။

ဦးဇင်းငယ်စဉ်က အဲဒီလိုအကြောင်းတွေပြပြီး သံဃာကြီးငယ်မရွေး လူဘောင်ကူးသွားကြတာကို မြင်တွေ့ခဲ့ရလို့ပါ။ အဲဒီအခါစဉ်က မိမိမှာ အသိပညာမကြွယ်ဝသေးတော့ ဘယ်လိုမှရှင်းမပြနိုင်တာကြောင့် သာသနာအတွက် ဉာဏ်ပညာတော်တဲ့သံဃာများပါ ဆုံးရှုံးခဲ့ရလို့ စိတ်မကောင်းများစွာ ဖြစ်ခဲ့ရပါတယ်။ ဒါကြောင့် အခုလို မိမိသိလာတဲ့အခါ အများသူငှာလည်း သိရအောင်ဖြန့်ဝေပေးနေတာပါ။

မြတ်ဗုဒ္ဓပညတ်ခဲ့တဲ့ အာပတ်များကို မြတ်ဗုဒ္ဓမိန့်ကြားခဲ့တဲ့အတိုင်း မမေ့မလျော့အားထုတ်ပြီး နေထိုင်သွားပြီးသကာလ သာသနာ့အကျိုး၊ မိမိအကျိုးကို သယ်ဆောင်နိုင်အောင် ကြိုးစားရပါမယ်။ မိမိက မြတ်ဗုဒ္ဓပညတ်ခဲ့တဲ့ သိက္ခာပုဒ်ကို သီးသန့်ကြီး စော်ကားချင်တဲ့ စိတ်ဆန္ဒမရှိဘူး။ မလွဲသာမရှောင်သာ အခန့်မသင့်လို့ သင့်ရောက်သွားမယ်ဆိုရင် ဒါဟာ စိတ်စေတနာဆိုးရွားမှုမရှိတဲ့အတွက် အပြစ်လည်းသိပ်ကြီးကျယ် သွားတာတော့ မဟုတ်ပါဘူး။ ဒါပြင် မြတ်ဗုဒ္ဓလက်ထက်က အာပတ်သင့်မှန်းသိရက်နဲ့ကို အာပတ်သင့်ခံပြီး ရဟန္တာဖြစ်အောင် ကြိုးစားသွားခဲ့တဲ့ ရဟန္တာတွေရှိခဲ့တယ် ဆိုတာကို ထောက်ဆကြည့်မယ်ဆိုရင် မိမိက အခြေအနေတစ်ခုခုကြောင့် သင့်ရောက်တာဖြစ်ပြီး အဲဒီသင့်ရောက်တဲ့အပြစ်များကို စင်ကြယ်အောင်ပြုလုပ်ခြင်း၊ သင့်ရောက်တဲ့ အပြစ်များထက် အကျိုးများမဲ့အရာကို ပြုလုပ်ပါက အပြစ်က ကျေမွန်တယ်ဆိုတာ အာပတ်သင့်ခံပြီး ရဟန္တာဖြစ်သွားတဲ့မထေရ်တွေရဲ့ လုပ်ရပ်ကိုထောက်ဆကြည့်ရင် သိနိုင်ပါတယ်။ နောက်ပိုင်းမှာ အာပတ်သင့်လျက် ရဟန္တာဖြစ်သွားတဲ့မထေရ်တွေအကြောင်းကို စုစည်းတင်ပြပေးပါဦးမယ်။

ဘ၀ကူးကောင်းဖို့အတွက် အရေးကြီးတာက အာသန္နကံလို့ခေါ်တဲ့ သေခါနီးမှာ ဖြစ်လာမဲ့ ကံ၊ ကမ္မနိမိတ်၊ ဂတိနိမိတ်တို့ပဲ ဖြစ်ပါတယ်။ အဲဒါက မိမိသေခါနီးမှာ ဖြစ်ပေါ်လာမဲ့ကံ(၃)မျိုးပါ။ အဲဒီကံ(၃)မျိုးထဲက တစ်မျိုးမျိုးပေါ်လာပြီး ဘ၀ကိုကူးပြောင်းကြရပါတယ်။ မိမိက ကောင်းတဲ့နိမိတ်မြင်ရင် ကောင်းတဲ့ဘုံကို ရောက်မှာဖြစ်ပြီး မကောင်းတဲ့နိမိတ်မြင်ရင် မကောင်းတဲ့ဘုံကို ရောက်ပါလိမ့်မယ်။ ဘ၀ကူးပြီး ကူးတဲ့ဘ၀မှာ သက်ရှည်၊ ဆင်းလှ၊ ချမ်းသာစတာတွေကတော့ မိမိတို့ အတိတ်ဘ၀က ပြုလုပ်ခဲ့တဲ့ ကောင်းမှု မကောင်းမှုတွေက ဆက်လက်အကျိုးပေးပါလိမ့်မယ်။ သေခါနီးမှာ ကောင်းတဲ့နိမိတ်၊ မကောင်းတဲ့နိမိတ်မြင်ဖို့အတွက်ကတော့ မိမိနေ့စဉ်လုပ်ခဲ့တဲ့ အလုပ်ကိုင်တွေပေါ်မှာ မူတည်ပါလိမ့်မယ်။

မိမိက ကောင်းတာတွေနေ့စဉ်လုပ်နေရင် ကောင်းတဲ့နိမိတ်တွေမြင်မှာမြင်ပြီး မကောင်းတာတွေလုပ်နေရင် မကောင်းတဲ့နိမိတ်တွေ ပေါ်လာပါလိမ့်မယ်။ တချို့က သေခါနီးမှာ မကောင်းတဲ့ဟာကိုအာရုံပြုမိလို့ မကောင်းတဲ့ဘုံကိုရောက်သွားပေမဲ့ ကောင်းမှုများတဲ့သူဆိုရင် မကောင်းတဲ့ဘုံမှာ ခဏပဲအကျိုးပေးပြီး ကောင်းရာဘုံကို ပြန်လည်ရောက်ရှိပါတယ်။

ဥပမာ-မြတ်ဗုဒ္ဓလက်ထက် အရှင်တိဿမထေရ်လိုမျိုးပေါ့။ အရှင်တိဿမထေရ်ဟာ ဒါန၊ သီလ၊ ဘာဝနာတွေရှိခဲ့ပါတယ်။ ဒါပေမဲ့ သေခါနီးမှာ သင်္ကန်းကိုစွဲလမ်းတဲ့ လောဘစိတ်ကြောင့် သန်းပြိတ္တာဆိုတဲ့ အပါယ်ဘ၀ကို ရောက်ခဲ့ရပါတယ်။ သို့သော်လည်း ကောင်းမှုများတဲ့သူမို့ (၇)ရက်သာ အပါယ်မှာနေခဲ့ရပါတယ်။ ဒါကြောင့် မိမိတို့မှာ ကောင်းမှုများထားမယ်ဆိုရင်တော့ သေခါနီးမှာ အာရုံမှားလို့ အပါယ်သွားခဲ့ရရင်တောင် ခဏတာပဲ ခံရမှာပါ။ အဲဒီလို ခဏတာမျှ မခံစားရအောင်ကတော့ မိမိတို့သေခါနီးမှာ ကောင်းတဲ့အာရုံနိမိတ်လေးမြင်ဖို့အတွက် နေ့စဉ်ကောင်းမှုလေးတွေ အာရုံပြုလုပ်မိအောင် လေ့ကျင့်ထားကြပေါ့လေ။

သတ္တ၀ါတစ်ဦး သေခါနီးကာလမှာ ကံနိမိတ်၊ ကမ္မနိမိတ်၊ ဂတိနိမိတ်(၃)မျိုးထဲက တစ်မျိုးမျိုးတော့ ပေါ်လာကြပါတယ်။ မိမိပေါ်လာတဲ့နိမိတ်အတိုင်း ဘ၀ကူးပြောင်းခြင်းအကျိုးကို ခံစားရပါတယ်။ နိမိတ်(၃)မျိုးတွင် ကံနိတ်မိတ်ဆိုသည်မှာ မိမိပြုလုပ်ခဲ့တဲ့ ကောင်းမှုကုသိုလ်များကို ပြန်လည်အာရုံပြုမိနေတာ၊ မေတ္တာပို့မိနေတာ၊ ဘုရားဂုဏ်တော်ပွားများမိနေတာ၊ ၀ိပဿနာအားထုတ်နေမိတာစတဲ့ ကုသိုလ်အာရုံများ ပေါ်နေနိုင်သလို ပစ္စည်းဥစ္စာအပေါ် စွဲလမ်းနေတာ၊ သားသမီးစတဲ့ သံယောဇဉ်များပေါ် စွဲလမ်းနေမိတာစတဲ့ အကုသိုလ်စိတ်များလည်း ဖြစ်ပေါ်နိုင်ပါတယ်။

ကမ္မနိမိတ်ဆိုတာက မိမိမျက်မှောက်မှာဖြစ်စေ၊ အတိတ်ကဖြစ်စေ ပြုလုပ်ခဲ့တဲ့ သက်ရှိ၊ သက်မဲ့အရာဝတ္ထုတွေကို မြင်မိတာပါ။ ဥပမာ-မိမိပြုလုပ်ခဲ့တဲ့ ကျောင်းအလှူ၊ တံတားအလှူ၊ ဘုရားစေတီအလှူစတဲ့ ကုသိုလ်နိမိတ်တွေဖြစ်ပေါ်နိုင်သလို သူတစ်ပါးအသက်ကို သတ်ခဲ့တာ၊ သူတစ်ပါးကို ညှင်းပန်းနှိပ်စက်ခဲ့တာ၊ သူတစ်ပါးပစ္စည်းကို ခိုးခဲ့တာ၊ သူတစ်ပါးသားမယားကို ပြစ်မှားမိခဲ့တာစတဲ့ အကုသိုလ်နိမိတ်တွေ ပေါ်ပါတယ်။

ဂတိနိမိတ်ဆိုတာကတော့ မိမိဘ၀ကူးတဲ့အခါ ရောက်ရှိခံစားရမဲ့ ဘုံဌာနသတ္တ၀ါတွေကို အာရုံထင်တာပါ။ ဥပမာ-လူ့ဘ၀ရောက်မဲ့သူဆို မိခင်ဝမ်းတွင်း၊ တိရစ္ဆာန်ဖြစ်မဲ့သူဆို တိရစ္ဆာန်အကောင်ပုံ၊ နတ်ဖြစ်မဲ့သူဆို နတ်ဘုံနတ်သား၊ ငရဲကျမဲ့သူဆို ငရဲဘုံဆင်းရဲများ၊ ပြိတ္တာအသူရကာယ်ဖြစ်မဲ့သူဆို တောတောင်ချိုင့်ဝှမ်းတွေ ပြိတ္တာပုံစံတွေကို မိမိအာရုံမှာ လာပေါ်နေပါလိမ့်မယ်။

ပုဂ္ဂိုလ်တစ်ဦးတစ်ယောက်ဟာ သေခါနီးမှာ နိမိတ်(၃)မျိုးထဲက တစ်ခုခုကိုမြင်ပြီး သူမြင်ရာအလိုက် ဘ၀ပြောင်းလဲ ဖြစ်သွားရပါတယ်။ ကုသိုလ်နိမိတ်တစ်ခုခုကိုမြင်ရရင်တော့ အဲဒီလူဟာ ကောင်းတဲ့လူပြည်၊ နတ်ပြည်၊ ဗြဟ္မာ့ပြည်ကို ရောက်ရှိမှာ သေချာပါတယ်။ မကောင်းတဲ့နိမိတ်မြင်ရရင်တော့ အဲဒီလူဟာ မကောင်းတဲ့ အပါယ်လေးပါးကို ကျရောက်မှာ သေချာပါတယ်။

သေခါနီးကာလမှာ များသောအားဖြင့် နောက်ဆုံးပြုလုပ်တဲ့ ကောင်းမှု၊မကောင်းမှုကို အာရုံထင်ကြတာ များပါတယ်။ ကုသိုလ်နေ့စဉ်ပြုလုပ်သောပုဂ္ဂိုလ်ဟာ ကုသိုလ်ဆိုင်ရာနိမိတ်များ မြင်တတ်သလို မကောင်းမှုတွေ အမြဲပြုလုပ်ပြီး မကောင်းမှုကိုပဲ အာရုံစိုက်ခဲ့တဲ့ပုဂ္ဂိုလ်ကတော့ မကောင်းတဲ့နိမိတ်တွေကို မြင်လာမိမှာ သေချာပါတယ်။

ဒါပေမဲ့ အသက်ထွက်ရန် အချိန်အနည်းငယ်ရတဲ့ပုဂ္ဂိုလ်ကို သူ့အနီးအနားမှာရှိတဲ့ ပုဂ္ဂိုလ်များက မကောင်းတဲ့နိမိတ်မထင်ဖို့ရန် ကောင်းမှုလေးပြုပေးကာ ကောင်းတဲ့စိတ်ဖြစ်အောင် လုပ်ပေးလို့ ရပါတယ်။ ဥပမာ-အသက်ထွက်ခါနီးလူရှေ့မှာ ဘုရားစာရွတ်ပေးတာ၊ တရားနာခိုင်းတာ၊ ကောင်းမှုလုပ်ပြီး ဒါဟာ မင့်အတွက် လုပ်ပေးတာမို့ သာဓုခေါ်ကာ ၀မ်းမြှောက်ပေးပါ၊ ဒါလေးကို အာရုံပြုပြီး လှူပေးပါ။ စိတ်ထဲမှာ မကောင်းတာကို အာရုံမပြုဘဲနဲ့ ကောင်းတဲ့အာရုံကိုပဲ ပြုပေးပါစတာတွေ ပြောဆိုလုပ်ကိုင်ပေးမည်ဆိုရင် အသက်ထွက်ခါနီး ပုဂ္ဂိုလ်ဟာ ထိုကောင်းမှုစိတ်လေး အာရုံပြုရင်းသေသွားပါက ကောင်းတဲ့ဘုံ ရောက်သွား နိုင်ပါတယ်။

ဒါကြောင့် သေခါနီးလူတစ်ယောက်ရဲ့အနားမှာ သေခါနီးလူအတွက် ကောင်းကျိုးဖြစ်အောင် ပြုလုပ်ပေးနိုင်မဲ့လူမှတစ်ပါး ကျန်သူတွေ မနေသင့်ပါဘူး။ များသောအားဖြင့် လူတွေဟာ သေခါနီးပုဂ္ဂိုလ် ဘ၀ကူးကောင်းအောင်လုပ်ပေးတာနည်းပြီး မကောင်းတာအာရုံပြုမိအောင် ပြုလုပ်ပေးနေသလိုဖြစ်နေကြ တာ များပါတယ်။ သေခါနီးလူရဲ့ အနားမှာ မိဘဆွေမျိုးမောင်နှမသားချင်းများက ၀မ်းနည်းတာ၊ ငိုကြွေးတာ၊ ဘယ်သူနဲ့နေခဲ့ရမလဲစတာတွေကို မပြောဆိုမပြုလုပ်ရပါဘူး။ အဲဒီမိမိတို့ပြုလုပ်တာတွေကို သေခါနီးလူက အာရုံစွဲသေမယ်ဆိုရင် မကောင်းတဲ့အာရုံဖြစ်တာကြောင့် မကောင်းတဲ့ဘုံကို သွားရမှာသေချာနေပါတယ်။

ဆက်လက်ရေးသားပါဦးမယ်။ 

0 comments:

Post a Comment

Powered by Blogger.