Tuesday, March 13, 2012

လောင်းကစားနဲ့ဓာရဏပရိတ်

မေး။ ။ အရှင်ဘုရား တပည့်တော် မေးမယ်မေးမယ်နဲ့ မမေးဖြစ်ခဲ့သေးတာကို အခုမေးပါရစေဘုရား။ တပည့်တော်သိချင်တာကတော့

၁၊။ တပည့်တော် ဒီနိုင်ငံမှာရှိတဲ့ တချို့လူတွေဟာ ဘုရားတရားတော့ လုပ်ပါတယ်။ ဒါပေမဲ့ ဖဲရိုက်တာရှိတယ်ဘုရား။ အဲဒါ ငါးပါးသီလထဲမှာ လောင်းကစားလုပ်တာ ပါဝင်ပါသလား ဘုရား။ နောက်တစ်ခုက နှစ်လုံးသုံးလုံးလောင်ကစားတွေကရော သီလနဲ့သက်ဆိုင်ပါသလားဘုရား။

၂။ တပည့်တော်နေ့တိုင်း ဓာရဏပရိတ် ရွတ်ဖတ်ပါတယ်ဘုရာ။ ဒါပေမဲ့ နှစ်တော်တော်ကြာတုန်းက ဓမ္မစေတီဆရာတော် အရှင်ဦးကောသလ္လဟောတဲ့ တရားတစ်ပုဒ်ထဲမှာ တချို့စာသားတွေ ဥပမာ-က္ကုလ္လိ၊ မိလ္လိ၊ တိလ္လိ၊ မိလ္လိဆိုတဲ့စာသားတွေက ပါဠိစာသားမဟုတ်တဲ့အတွက် ဘုရားဟောမဟုတ်ဘူးလို့ နာဖူးပါတယ်ဘုရား။ အဲဒီဟာ ဟုတ်ပါသလားဘုရား။ အရှင်ဘုရား အဆင်ပြေမဲ့အချိန်လေး ပြန် လည်းဖြေကြားပေးပါဘုရား။ အရှင်ဘုရား ကိုယ်စိတ်နှစ်ဖြာကျန်းမာ ချမ်းသာ၍ ကောင်းကျိုးလိုအင် ဆန္ဒပြည့်ဝပါစေ။

ဇော်ဇော်အောင်၊ ရန်ကုန်။

ဖြေ။ ။ လူသားတွေ မဖြစ်မနေစောင့်ထိန်းရမဲ့ ငါးပါးသီလထဲမှာ အဒိန္နာဒါနကံဆိုတာပါပေမဲ့ အဲဒီကံဟာ သူတစ်ပါးက ကိုယ်နှုတ်စိတ်တို့ဖြင့် မပေးတာကို ခိုးယူမှသာ ကံထိုက်ပါတယ်။ ဖဲရိုက်ခြင်းစတဲ့ လောင်းကစားလုပ်တဲ့အခါမှာ မိမိနိုင်သည်ဖြစ်စေ၊ ရှုံးသည်ဖြစ်စေ အစဦးဆုံးတော့ ရော့ အင့်ဆိုပြီး မိမိပိုက်ဆံကို အလယ်မှာပစ်ချပေးထားရတာကြောင့် စိတ်မပါဦးတောင်မှ ကိုယ်နှုတ်တစ်ခုခုနဲ့တော့ မိမိကအရင်ပေးပြီးသားမို့ နိုင်တဲ့သူမှာ အဒိန္နာဒါနကံ မထိုက်ဘူးဖြစ်နေပါတယ်။

ဒါပေမဲ့ လောင်းကစားလုပ်တဲ့လူအားလုံး ရှုံးတဲ့လူရော နိုင်တဲ့လူရောမှာပါ အောက်ပါအပြစ် များတော့ ဖြစ်ကြပါတယ်။

၁။ နိုင်ရင် ရန်ပွားသူများရှိတတ်၍ မိမိမှာ ရန်များခြင်း။

၂။ ရှုံးရင် ပူဆွေးရခြင်း။

၃။ ဥစ္စာပစ္စည်းများ ပုံမှန်ဝင်ငွေမဟုတ်၍ ဆုတ်ယုတ်ဘက်သို့ ရောက်တတ်ခြင်း။

၎။ လောင်းစကားသမားစကားဆိုရင် လူယုံကြည်မှု နည်းပါးခြင်း။

၅။ မိတ်ဆွေသူငယ်ချင်းများက ယုံကြည်မှုနည်းပါးကြ၍ အရေးမလုပ်၊ နေရာမပေးကြခြင်း။

၆။ သူတစ်ပါးသားသမီးကို လက်ထက်ယူလိုသောအခါ လောင်းကစားသမားဆို ဘယ်မိဘကမှ ယုံကြည်မှုမရှိကြခြင်းဆိုတဲ့ အပြစ်(၆)မျိုးကို ယခုဘ၀မှာပင် ခံရတတ်ပါတယ်။ အဲဒီတော့ လောင်းကစား လုပ်တာဟာ အများအမြင်မှာလည်းမကောင်းသလို မိမိအတွက်လည်း ကောင်းကျိုးထက်ဆိုးကျိုးက များနေတာမို့ ရှောင်ကြဉ်သင့်တဲ့အရာပါ။ နောက်ပြီး လောင်းကစားလုပ်တဲ့လူဟာ သူများတကာထက် ၀ိသမလောဘအားကြီးသူဖြစ်လာပြီး ခိုးမှု၊ သတ်မှု၊ လိမ်လည်မှုစတဲ့ မကောင်းမှုများကိုလည်း အလွယ်တကူကျုးလွန်လာနိုင်တာမို့ သံသရာအတွက်ပါ အန္တရာယ်များတာမို့ မပြုလုပ်ဖြစ်အောင် အထူးရှောင်ကြဉ်သင့်ပါတယ်။

ဓာရဏပရိတ်နဲ့ပတ်သတ်ပြီးပြောရမယ်ဆိုရင် ဓာရဏဆိုတာ ပါဠိစကားလုံးပါ။ မြန်မာလို ဆောင်ခြင်းလို့ အဓိပ္ပါယ်ရပါတယ်။ မင်္ဂလသုတ်စတဲ့ ပရိတ်ကြီးများလို မြတ်ဗုဒ္ဓသက်တော်ထင်ရှားရှိစဉ်က သီးသန့်ဟောကြားရွတ်ဆိုခဲ့တဲ့ ပရိတ်တော်မဟုတ်ပါဘူး။ ဓာရဏပရိတ်ထဲကပါတဲ့တရားတော်အားလုံး ကို မြတ်ဗုဒ္ဓက မင်္ဂလသုတ်လို တစ်စုတစည်းတော့ ဟောခဲ့တာ မဟုတ်တာတော့ မှန်ပါတယ်။ ဒါပေမဲ့ မြတ်ဗုဒ္ဓကလွဲရင် ဘယ်သူ့မှာမှမရှိတဲ့ ဂုဏ်တော်တွေကို ပေါင်းစပ်ထားတာဖြစ်ပြီး ဆောင်ထား သင့်တဲ့အရာတွေဆောင်ထားရင် အန္တရာယ်အပေါင်းကို ကာကွယ်ပေးနိုင်ခြင်းစတဲ့ အကျိုးကျေးဇူးတွေရအောင် ဓာရဏပရိတ်လို့ ရှေးဆရာတော်ကြီးများက စီစဉ်ထားခဲ့တဲ့ ပရိတ်တစ်ခု ဖြစ်ပါတယ်။ အဲဒါကြောင့်လည်း ရှေးဆရာတော်ကြီးများ စဉ်ဆက်ကတည်းက ယခုအချိန်ထိ ဦးဇင်းတို့သာသနာမှာ အသုံးဝင်နေခဲ့တာပါ။

မြတ်ဗုဒ္ဓမှာ ဘယ်သူမှ အန္တရာယ်မပြနိုင်တဲ့ ဂုဏ်(၄)ပါးရှိပါတယ်။ အဲဒီဂုဏ်(၄)ပါးကို ဓာရဏပရိတ်ရဲ့ အစဦးပိုင်းမှာ ထည့်သွင်းထားပါတယ်။ အလယ်မှာတော့ မြတ်ဗုဒ္ဓသာရှိတဲ့ ဂုဏ်တော်(၁၈)ပါးကို ထည့်ထားတာ တွေ့ရပါတယ်။ အဆုံးမှာတော့ ဘုရား(၇)ဆူကို ရှိခိုးဆုတောင်းအဓိဋ္ဌာန်ထားတာ ကို တွေ့ရပါတယ်။ တချို့ဆရာတော်တွေရွတ်တဲ့ ဓာရဏပရိတ်မှာ အစနဲ့အဆုံး ထည့်ရွတ်တာခြင်း မတူတာကိုလည်း တွေ့ဖူးပါတယ်။ ဘာဖြစ်လို့လဲဆိုတော့ တချို့ဆရာတော်တွေက အစဦးဆုံး ဘုရားဂုဏ်(၄)ပါးမထည့်ဘဲ နောက်ဆုံးမှာ ဆုတောင်းတွေပိုထည့်ထားတဲ့အတွက်ကြောင့် မတူကြတာပါ။ သို့ပေမဲ့ အဓိကကျတာကတော့ မြတ်ဗုဒ္ဓရဲ့အာဝေဏိကဂုဏ်တော်(၁၈)ပါးကို ရွတ်ဆိုလျှင်ပင် အကျိုးများပြီးမို့ အဲဒီ(၁၈)ပါးသာ ပါအောင်ရွတ်ဖို့ လိုပါတယ်။

ဒီတော့ကား မြတ်ဗုဒ္ဓနဲ့မသက်ဆိုင်၊ ပိဋကတ်တော်ထဲမှာမပါတဲ့ အခြားပါဠိယောင်များကိုသာ မရွတ်မိဖို့ အရေးကြီးပါတယ်။ မြတ်ဗုဒ္ဓတိုက်ရိုက်ဟောမထားပေမဲ့ မြတ်ဗုဒ္ဓနဲ့သက်ဆိုင်တဲ့ တရားတော် များ၊ မြတ်ဗုဒ္ဓဟောကြားခဲ့တဲ့ ပိဋကတ်သုံးပုံထဲက မည်သည့်တရားတော်များမဆို မရွတ်ကောင်းတာမရှိဘဲ မည်သူမဆို ရွတ်လျှင်ရွတ်ဖတ်တဲ့ ဓမ္မဒေသနာကုသိုလ်တော့ ရရှိတာမို့ မိမိလက်လွတ်ရတဲ့ တရားတော်ကိုဖြစ်စေ၊ စာအုပ်ဖတ်၍ဖြစ်စေ အချိန်အားလျှင်အားတဲ့အခါတိုင်း ရွတ်ဖတ်ပေးဖို့သာ အဓိကလိုအပ်တယ်ဆိုတာ သိထားဖို့ပါပဲ။
အရှင်ကောမလ(ခ)ဆန်နီနေမင်း

2 comments:

ရာဇာထွေး said...

ပို့စ်လေးဖတ်ပြီး မှတ်သားသွားပါတယ် ဘုရား....
အခုလိုရှင်းလင်းတင်ပြပေးလို့ကျေးဇူးတင်ပါတယ် ဘုရား...
ရိုသေလေးစားစွာဖြင့်
ရာဇာထွေး

Unknown said...

ဗုဒွအဆုံးအမများကို လူအများနားလည်သဘောပေါက်အောင်
ရှင်းလင်းတင်ပြပေးသော ဆရာတော့်ကျေးဇူးကြီးမားလှပါတယ်
သာဓု သာဓု သာဓုပါဘုရား...

Post a Comment

Powered by Blogger.