Thursday, December 22, 2011

သတ္တ၀ါအသီးသီးတို့ကျင်လည်ရာ ဘုံဌာနနှင့်သက်တမ်းများ


မေး။ ။ အရှင်ဘုရား တပည့်တော်တို့ ကျင်လည်နေရာ ဘုံဌာနအသီးသီးနဲ့ ထိုကျင်လည်နေရာဘုံဌာနတို့ရဲ့ သက်တမ်းစသည်များကို သိချင်ပါတယ်ဘုရား။ အဲဒါ အရှင်ဘုရားအားတဲ့အချိန် ဖြေပေးစေချင်ပါဘုရား။
ခင်မျိုးသန္တာ၊ အမေရိကန်။

ဖြေ။ ။ ဒီမေးခွန်းကို ဦးဇင်း အရင်က ဖြေပြီးတင်ပေးခဲ့ပြီးသားပါ။ ဒါပေမဲ့ ပို့စ်တွေများနေတဲ့အတွက် ဦးဇင်းဆိုဒ်မှာလည်း အောက်ဆုံးကို ရောက်နေလို့ မဖတ်မိကြတာ ဖြစ်နိုင်ပါတယ်။ ဒါကြောင့် ပြန်လည်တင်ပေးလိုက်ရပါတယ်။ ယခုတည်ရှိနေတဲ့ လူသားတို့သက်တမ်းဟာ (၇၅)နှစ် သက်တမ်းပါ။ ယခုတည်ရှိနေတဲ့ (၇၅)နှစ်ကနေတဆင့်ချင်း သက်တမ်းဆုတ်ယုတ်သွားပါလိမ့်မယ်။ ဘယ်လောက်ထိ ဆုတ်ယုတ်သွားမလဲဆိုရင် (၁၀)နှစ် သက်တမ်းထိ ဆုတ်ယုတ်သွားပါလိမ့်မယ်။ အဲဒီလို လူတို့သက်တမ်းဆုတ်ယုတ်လာပြီး (၁၀)နှစ်တမ်းတွင် ကောင်းမှုကုသိုလ်များလည်း ဆုတ်ယုတ်လာကြကာ တစ်ယောက်နဲ့တစ်ယောက် မျက်နှာချင်းဆိုင်တွေ့ရင်ပင် သတ်ဖြတ်ခြင်းများ ပြုလုပ်ကြပါလိမ့်မယ်။

ဒီလို တစ်ယောက်နဲ့တစ်ယောက် သတ်ဖြတ်ခြင်းများပြုလုပ်လို့ လူသားများအကုသိုလ်များနေချိန်တွင် လူသားတို့ဟာ ထိတ်လန့်ကြောက်ရွံ့ခြင်းများဖြစ်ပြီး မြို့ရွာများတွင် မနေရဲဘဲ တောထဲတောင်ပေါ်များ တက်ရောက်ပုန်ခိုးနေကြတယ်။ ထိုသူများဟာ တောတောင်များထဲတွင် သီလစောင့် တရားများကျင့်ကြံကြသည့်အတွက် ထို(၁၀)နှစ်သက်တမ်းမိဘများမှ မွေးဖွားတဲ့သားသမီးများဟာ အနှစ်(၂၀) အသက်ရှည်လာမယ်။ အသက်(၂၀)မိဘများမှ မွေးဖွားတဲ့သားသမီးများဟာ အနှစ်(၄၀) အသက်ရှည်မယ်။ အဲဒီလို တစ်ဆင့်ချင်းတိုးပြီး အသင်္ချေယျကပ်သက်တမ်းထိ လူသားများ အသက်ပြန်လည်ရှည်သွားလိမ့်မယ်။

ထိုအသေင်္ချေယျကပ်သက်တမ်းမှ လူသားများဟာ မကောင်းမှုများပြုလုပ် လာကြပြန်သဖြင့် တဖန်ပြန်လည်ပြီး သက်တမ်းတဖြည်းဖြည်းချင်း ဆုတ်ယုတ်သွားပြန်ရော။ ဒီလို အသေင်္ချယျကပ်သက်တမ်းမှ လူသားတို့သက်တမ်း ဆုတ်ယုတ်လာရာ လူသားတို့သက်တမ်း(၈၀၀၀၀)တွင် အရိမေတ္တေယျဘုရားရှင် ပွင့်ထွန်းပေါ်ပေါက်ပါလိမ့်မယ်။ အရိမေတ္တေယျဘုရားရှင်လက်ထက်တွင် လူသားအားလုံးဟာ နတ်သားနတ်သမီးများကဲ့သို့ ချောမောလှပပြီး အနာရောဂါများ အကုန်ကင်းရှင်းကြလိမ့်မယ်။ ဘုရားရှင်ရဲ့ ရောင်ခြည်တော်ကြောင့် နေ့ညခွဲမရအောင် လင်းထိန်းနေပေလိမ့်မယ်။ ကြက်တွန်းသံကို အမှတ်အသားပြုပြီး နေ့ညခွဲကြရမယ်။

အရိမေတ္တေယျဘုရားရှင်လက်ထက်တွင် လူသားတို့ စားစရာ၊ ၀တ်စရာ၊ နေစရာများ ပြည့်စုံနေလို့ ပင်းပန်းစွာ အလုပ်မလုပ်ရပေ။ လူသားတို့တွင် လောဘကာမစိတ်ဖြစ်ခြင်း၊ အိုမင်ရင့်ရော်ခြင်း၊ ဆာလောင်ခြင်းဟူသော အချက်သုံးချက်ကိုသာ ရောဂါဟု သတ်မှတ်ကြပါတယ်။ ဒါကြောင့် နောင်ပွင့်မည့်ဘုရားရှင်လက်ထက်အခါတွင် လူသားဖြစ်ပြီး မြတ်နိဗ္ဗာန်ကိုပြုနိုင်အောင် ယခုကတည်းက ကောင်းမှုများနဲ့ မွေ့လျော်နေဖို့ လိုပါတယ်။

ဒါပြင် သတ္တ၀ါအသီးသီးတို့ ကျင်လည်ရာ (၃၁)ဘုံနဲ့ပတ်သတ်ပြီး ရှင်းပြရမယ်ဆိုရင်
(၁) ငရဲ၊ ပြိတ္တာ၊ အသူရကာယ်တို့တွင် သတ်မှတ်ထားတဲ့ သက်တမ်းမရှိပါဘူး။ မိမိတို့ကံအလျှောက် သက်တမ်းအရှည်အတို ဖြစ်ကြပါတယ်။ တိရစ္ဆာန်များမှာ အမျိုးပေါင်းမရေတွက်နိုင်တာကြောင့် အမျိုးဇာတ်အလိုက် သက်တမ်းများ ကွာခြားကြတယ်။

(၂) လူသားတို့သက်တမ်းမှာ အရှေ့ကျွန်းသားတို့တွင် သက်တမ်း(၇၀၀)၊ အနောက်ကျွန်းသားတို့တွင် သက်တမ်း(၅၀၀)၊ မြောက်ကျွန်းသားတို့တွင် သက်တမ်း (၁၀၀၀) ပုံမှန်ကန့်သတ်ချက်ရှိသော်လည်း တောင်ကျွန်းသားတို့မှာ သက်တမ်းပုံသေမရှိပါ။ အသင်္ချေယျတမ်းမှ ဆယ်နှစ်တမ်း၊ တစ်ဖန်  ဆယ်နှစ်တန်းမှ အသင်္ချေယျတမ်းထိ ဆုတ်လိုက်တက်လိုက် ဖြစ်နေပါတယ်။

(၃) နတ်ပြည်ခြောက်ထပ်တွင် အောက်စတုမဟာရာဇ်နတ်များဖြစ်ကြတဲ့ ဘီလူး၊ ဘုမ္မစိုးနတ်တို့တွင် သက်တမ်းမရှိကြပေ။ အချို့ဘုမ္မစိုးနတ်တို့ဟာ ခုနှစ်ရက်မျှသာအသက်ရှည်ကြပြီး အချို့မှာ အာယုကပ်ပတ်လုံး အသက်ရှည်ကြတယ်။ အထက်စတုမဟာရာဇ်နတ်တို့၏သက်တမ်းမှာ အနှစ်(၅၀၀) ရှိကြတယ်။ လူတို့နှစ်နဲ့ ရေတွက်ရင် အနှစ် (၉)သန်း  အသက်ရှည်ကြတယ်။ စတုမဟာရာဇ်နတ်တို့ရဲ့ တစ်ရက်ဟာ လူတို့အနှစ် (၅၀)နှင့် ညီမျှတယ်။

(၄) တာဝတိံသာ နတ်များဟာ အနှစ်(၁၀၀၀)သက်တမ်း ရှိတယ်။ လူတို့ အနှစ်တစ်ရာဟာ တာဝတိံသာနတ်တို့ တစ်ရက်နဲ့ညီမျှတယ်။ တာဝတိံသာ နတ်တို့ရဲ့ သက်တမ်းကို လူတို့နှစ်နဲ့ ရေတွက်သော် နှစ်ပေါင်းသုံးကုဋေခြောက်သန်း ရှိတယ်။

(၅) ယာမာနတ်များ အနှစ်(၂၀၀၀)သက်တမ်း ရှိတယ်။ လူတို့အနှစ် (၂၀၀)ဟာ ယာမာနတ်တို့ တစ်ရက်နဲ့ညီမျှတယ်။ ယာမာနတ်တို့ရဲ့ သက်တမ်းကို လူတို့နှစ်နဲ့ ရေတွက်သော် နှစ်ပေါင်း(၁၄)ကုဋေလေးသန်း ရှိတယ်။

(၆) တုသိတာနတ်တို့ဟာ အနှစ်(၄၀၀၀)သက်တမ်း ရှိတယ်။ လူတို့ အနှစ်(၄၀၀)ဟာ တုသိတာနတ်တို့ တစ်ရက်နဲ့ ညီမျှတယ်။ တုသိတာနတ်တို့ရဲ့ သက်တမ်းကို လူတို့နှစ်နဲ့ရေတွက်သော် နှစ်ပေါင်း(၅၇)ကုဋေနှင့်ခြောက်သန်း ရှိတယ်။

(၇) နိမ္မာနရတီနတ်များဟာ အနှစ်(၈၀၀၀)သက်တမ်း ရှိတယ်။ လူတို့ နှစ်(၈၀၀)ဟာ နိမ္မာနရတီနတ်တို့ တစ်ရက်နဲ့ ညီမျှတယ်။ နိမ္မာနရတီနတ်တို့ရဲ့ သက်တမ်းကို လူတို့နှစ်နဲ့ရေတွက်သော် နှစ်ပေါင်း(၂၃၀)ကုဋေ လေးသန်းရှိတယ်။

(၈) ပရနိမ္မိတ၀သ၀တ္တီနတ်များဟာ အနှစ်(၁၆၀၀)သက်တမ်း ရှိတယ်။ လူတို့ နှစ်(၁၆၀၀)ဟာ ပရနိမ္မိတ၀သ၀တ္တီနတ်တို့ တစ်ရက်နဲ့ညီမျှတယ်။ ပရနိမ္မိတ၀သ၀တ္တီနတ်တို့ရဲ့ သက်တမ်းကို လူတို့နှစ်နဲ့ရေတွက်သော် နှစ်ပေါင်း  (၉၂၁)ကုဋေခြောက်သန်း ရှိတယ်။

(၉) ဗြဟ္မာတို့၏သက်တမ်းများဟာ အလွန်ရှည်လျားကြသည့်အတွက် အသင်္ချေယျကပ်၊ မဟာကပ်တို့နဲ့ တိုင်းတာရတယ်။ ထိုကပ်တို့ဟာ (၁) အာယုကပ်၊ (၂) အန္တရကပ်၊ (၃) အသင်္ချေယျကပ်၊ (၄) မဟာကပ်ဆိုပြိး လေးပါးရှိတယ်။

ထိုလေးပါးတို့တွင် သတ္တ၀ါတို့ရဲ့သက်တမ်း အသီးသီးကို အာယုကပ်ဟုခေါ်သည်။ လူတို့အသင်္ချေယျတမ်းမှ ဆယ်နှစ်တမ်း၊ ဆယ်နှစ်တန်းမှ အသင်္ချေယျတမ်းအထိ ရှည်ကြာသောကာလကို အန္တရကပ်တစ်ခုဟု ခေါ်တယ်။ အန္တရကပ် (၆၄)ကပ်ဟာ အသင်္ချေယျကပ် တစ်ကပ်နဲ့ညီမျှတယ်။ အသင်္ချေယျကပ်(၄)ကပ်ဟာ မဟာကပ်တစ်ကပ် (တနည်း) တစ်ကမ္ဘာနဲ့ညီမျှတယ်။ အသင်္ချေယျကပ်ကို လေးမျိုးခွဲခြားပြန်တယ်။

(က) သံဝဋ္ဋ္ဋကပ်-ကမ္ဘာကြီးစပျက်သည်မှ လုံးဝပျက်သုဉ်းသွားတဲ့အထိ ရှည်ကြာတဲ့ အသင်္ချေယျကပ်။
(ခ) သံဝဋ္ဋဌာယီကပ်-ကမ္ဘာကြီးပျက်သုဉ်းပြီး ပျက်ပြီးသည့်အတိုင်း တည်နေတဲ့ အသင်္ချေယျကပ်။
(ဂ) ၀ိဝဋ္ဋကပ်-ကမ္ဘာပြုမိုးစရွာသည့် အချိန်မှစပြီး ကမ္ဘာကြီးအပြည့်အစုံ ဖြစ်ပေါ်လာတဲ့အထိ ရှည်ကြာတဲ့ အသင်္ချေယျကပ်။
(ဃ) ၀ိဝဋ္ဋဌာယီကပ်-ကမ္ဘာကြီးအပြည့်အစုံဖြစ်ပြီးသည်မှ ထိုအတိုင်းတည်နေတဲ့ အသင်္ချေယျကပ်ဆိုပြီး အသင်္ချေယျကပ်(၄)မျိုး ရှိတယ်။

ထိုကဲ့သို့ သတ္တ၀ါတို့ ကျင်လည်ရာ နေရာဌာနအလိုက် သက်တမ်းများလည်း အမျိုးမျိုးရှိကြပေရာ သတ္တ၀ါများဟာ သံသရာမှမလွတ်မြောက်သရွေ့ အထက်ဖော်ပြပါ နေရာဌာနများတွင် သွားလာလှုပ်ရှား ရုန်းကန်နေကြမှာ အမှန်ပါ။

ဒါကြောင့် လူသားအားလုံးဟာ ရခဲလှတဲ့ လူ့ဘ၀ကောင်းလေး ရရှိနေချိန်မှာ သံသရာမှ အပြီးအပိုင် လွတ်မြှောက်အောင် မလုပ်နိုင်စေကာမှု နောက်ဖြစ်လေရာဘ၀များတွင် ချမ်းသာသုခပြည့်စုံအောင် သံသရာမှလည်း အမြန်လွတ်မြှောက်ဖို့ရန် ဒါန၊ သီလ၊ ဘာဝနာများကို နေ့စဉ်မပြတ် ပြုလုပ်ကြပါလို့ တိုက်တွန်းရင်း နိဂုံးချုပ်လိုက်ပါပေတယ်။

0 comments:

Post a Comment

Powered by Blogger.