Thursday, November 17, 2011

အမွေးတိုင်ပူဇော်ခြင်းနဲ့ပတ်သတ်၍

          မေး။ ။ အရှင်ဘုရား မေးခွန်းနောက်တစ်ခုလောက် မေးပါရစေ။ ဖယောင်းတိုင်၊ အမွေးတိုင် ထွန်းတယ်ဆိုတာ လေထဲကို ကာဗွန်တိုင် အောက်ဆိုက်များစေတယ်။ လေထု ညစ်ညမ်းမှုသာဖြစ်စေပြီး ဘာမှထူးမှာမဟုတ်ဘူးဆိုတာ မှန်ပါသလားဘုရား။

          ဖြေ။ ။ အင်း ဒီမေးခွန်းဟာလည်း တကယ်သိသင့်တဲ့ မေးခွန်းလေးပါ။ မြတ်စွာဘုရားရှေ့မှာ အမွေးတိုင်ပူဇော်တယ်၊ ဆီးမီးပူဇော်တယ်၊ ပန်းပူဇော်တယ်ဆိုတာ ဘာကြောင့် ဘယ်လိုပူဇော်ရတယ်ဆိုတာကို မသိကြတာက များပါတယ်။

          တကယ်တော့ မြတ်ဗုဒ္ဓဟာ ကိလေသာအားလုံးကင်စင်ပြီးဖြစ်လို့ အမွေးနံ့သာ စသည်တို့ မလိုအပ်တော့ပါ။ မြတ်ဗုဒ္ဓခန္ဓာကိုယ်၌လည်း အညစ်အကြေးများမရှိဘဲ ကင်းစင်နေပါတယ်။ အဲဒီလို အမွေးနံ့သာစသည်တို့လည်း အလိုမရှိ၊ သူကိုယ်တိုင်၌လည်း အညစ်အကြေး ကင်းစင်နေတဲ့ မြတ်ဗုဒ္ဓဟာ အဘယ့်ကြောင့် အမွေးနံ့သာ ပူဇော်ခြင်း၊ ပန်းများပူဇော်ခြင်းတို့ကို လက်ခံရသလဲဆိုတာ သေချာစဉ်းစား ကြည့်သင့်ပါတယ်။

          မြတ်ဗုဒ္ဓဟာ စာရေးသူတို့ သတ္တ၀ါတွေအပေါ်မှာ မဟာကရုဏာတော်ရှင် ဖြစ်တယ်ဆိုတာ ဒီဟာကို ထောက်ဆကြည့်တာနဲ့ပင် အတော်လေး ကြည်ညိုစရာ လေးစားစရာ ကောင်းလှပါတယ်။ သူ့အတွက် မလိုအပ်တဲ့အရာတွေ သူတစ်ပါးက လာပြုလုပ်တာကို လက်ခံခြင်းဟာ မဟာကရုဏာရှင်မို့သာ တခြားမည်သူမျှ လက်ခံလိမ့်မည်မဟုတ်ပေ။

          စာရေးသူတို့ လူသားများတွင် တစ်စုံတစ်ယောက်ဟာ ရေမွှေးအကောင်းဆုံးတွေ သုံးထားတယ်ဆိုပါစို့၊ အဲဒီလူကို တစ်ယောက်ယောက်က သူ့ရေမွေးလောက် မကောင်းတဲ့အနံ့ဆိုးတဲ့ အနံ့တစ်ခုနဲ့ ဖြန့်ပက်ပေးမည်ဆိုရင် မဟာကရုဏာရှင်မဟုတ်တဲ့ စာရေးသူတို့လူသားများ သည်းခံခွင့်လွတ်မှာ မဟုတ်သလို အသာတကြည်နဲ့လည်း ခွင့်ပြုမှာ မဟုတ်ပါဘူး။

          အင်း မြတ်ဗုဒ္ဓကတော့ မဟာကရုဏာရှင်ဖြစ်တဲ့အတွက် သူ့ပင်ကိုယ်သဘာဝလောက် အမွေးနံ့သာမရှိတဲ့ အမွေးတိုင်၊ ပန်းများ သူနားမှာ ပူဇော်ခြင်းကို လက်ခံထားပေးတယ်။ ဒါဟာ ဘာဖြစ်လို့လဲဆိုတော့ သတ္တ၀ါတွေကို သနားငဲ့ညာပြီး တရားထူး မြန်မြန်ရစေချင်လို့ပါ။

          အမွေးတိုင် ပူဇော်တယ်၊ ပန်းပူဇော်တယ်ဆိုတာ တကယ်တော့ အဲဒီအမွေးတိုင်၊ ပန်းပွင့်တို့ရဲ့ ဖြစ်ပျက်ကို ရှု့မြင်ပြီး မိမိရဲ့ခန္ဓကိုယ်ကိုလည်း ရှု့တတ်အောင်လို့ပါ။ အမွေးတိုင်လေး ကို ကြည့်လိုက်ရင် တစ်စတစ်စနဲ့ လောင်းမြိုက်ကုန်ဆုံးပြီး ပြာဖြစ်ကာ မြေကြီးထဲ ရောက်သွားပါတယ်။ အဲဒီလိုပဲ မိမိရဲ့ ခန္ဓာကိုယ်ကြီးဟာ မွေးလာပြီးကနေ တစ်ရက်တစ်ရက်နဲ့ ကုန်ဆုံးကာ နောက်ဆုံးပျက်စီးပြီး မြေကြီးဖြစ်သွားပါတယ်။ ဘယ်လောက်ပင် မိမိတို့က မာန်မာနတွေတက်ပြီး ပြုပြင်စေကာမှု ခန္ဓာကိုယ်ကြီးကတော့ ပျက်စီးရင်း ပျက်စီးလျက်ပါ။ ဒီလို အမြဲတမ်းပျက်စီးနေတဲ့ ခန္ဓာကိုယ်ကြီးအတွက် ရှာဖွေကျွေးမွေးရ၊ ပြုပြင်ပေးရနဲ့ မိမိမှာနေ့စဉ် လောဘ၊ ဒေါသ၊ မောဟစတဲ့ ကိလေသာတွေ ဖြစ်နေပါတယ်။ တချို့ဆို သာမာန်လုပ်ရိုးလုပ်စဉ် လောဘ၊ ဒေါသသာမကဘဲ သူများထက်သာလွန်တဲ့ မတရားမှု လောဘ ဒေါသတွေဖြစ်ပြီး ငါးပါးသီလတွေ ကျုးလွန်းကြကာ မကောင်းမှုများကို သူများထက်ပိုလွန်၍ ပြုလုပ်နေကြပါတယ်။

          မိမိခန္ဓာကိုယ်ကြီးဟာ အမွေးတိုင်လိုပဲ တစ်ရက်တစ်ရက်နဲ့ ကုန်ဆုံးကာ ပျက်စီးသွားမည်ဆိုတာကို နေ့စဉ်နဲ့အမျှ သတိရှိနေမယ်ဆိုရင် သာမာန်ထက်ပိုတဲ့ ကိလေသာမကောင်းမှုများ မိမိသန္တာန်မှာမဖြစ်ဘဲ ကောင်းမှုကုသိုလ်များကို နေ့စဉ်နဲ့အမျှ ပြုလုပ်နေမှာ သေချာပါတယ်။ ဒါကြောင့် မိမိတို့ဟာ ကောင်းမှုကုသိုလ်များပြုလုပ်ပေးရင်းနဲ့ မိမိသန္တာန်မှာရှိတဲ့ ကိလေသာများကို နည်းနည်းချင်းပတ်သတ်သွားရမှာပါ။

          အမွေးတိုင်နည်းတူ ပန်းပွင့်တို့ ဖယောင်းမီးတို့ ပူဇော်ခိုင်းခြင်းဟာလည်း အခုလို အဖြစ်အပျက်များကို ကျောင်းမှာလာခိုက်၊ ဘုရားရှေ့မှာရှိနေခိုက်တွင် တရားရှု့မှတ် တတ်အောင်နှင့် တရားရှု့မှတ်ရန် ပူဇော်ခိုင်းခြင်း၊ ခွင့်ပြုခြင်းဖြစ်ပါတယ်။ ဖယောင်မီးလှူလို့ အသိဉာဏ်ကောင်းခြင်းစတဲ့ အကျိုးတွေရရှိတာတော့ မှန်ပါတယ်။ ဒါပေမဲ့ ထိုအကျိုးများဟာ သာမညအရာသာဖြစ်ပြီး တရားရှု့မှတ်ဖို့ရန်သာ အဓိကအချက်ဖြစ်ပါတယ်။

          မိမိတို့လူသားများက အမွေးတိုင်ပူဇော်ရခြင်း၊ ပန်းပူဇော်ရခြင်း၊ ဆီးမီးပူဇော်ရခြင်းများရဲ့ အဓိကအဓိပ္ပါယ်ကို သေချာကျနစွာမသိတဲ့အတွက် ဖြစ်သလိုတွေးကာ ဖြစ်သလိုလုပ်နေကြတာပါ။ ဘုရားစေတီ၊ ဆင်းတုတော်ရှေ့တွင် ဆီးမီးထွန်းပူဇော်ရင် တချို့က ဘုရားကို မီးပူတိုက်သလိုဖြစ်အောင် ဘုရားနားကပ်ကာ ပူဇော်သူများကိုလည်း စာရေးသူတွေ့ဖူးပါတယ်။ သို့သော် စာရေးသူ ပါးစပ်နဲ့ပြောရင် အပြစ်တင်ခံရမှာမို့ စာနဲ့ပဲ ပြောလိုက်ရခြင်းပါ။ ဆီးမီးပူဇော်ခြင်း၊ အမွေးတိုင်လှူခြင်းများဟာ မိမိအတွက်သာ အဓိကဖြစ်ပြီး ဘုရားနားကပ်ထားရန် မလိုပေ။ ဘုရားရှေ့ဝယ် မိမိမြင်လောက်တဲ့ နေရာဆိုရင် ရပါတယ်။

          ယခုခေတ် ဆီးမီးပူဇော်ရာဝယ် လျှပ်စစ်မီးများနဲ့ ပူဇော်ကြတာကို တွေ့ရပါတယ်။ အဲဒီလို လျှပ်စစ်မီးနဲ့ ပူဇော်ခြင်းဟာ မိမိတို့အဓိကလုပ်ရမဲ့ တရားရှု့မှတ်ရန် မဖြစ်နိုင်တဲ့အတွက် အဓိကအကျိုးတော့ ရရှိတော့မှာမဟုတ်ပေ။ လျှပ်စစ်မီးပူဇော်တဲ့ အကျိုးသာ ရရှိပါလိမ့်မယ်။ တကယ်တော့ မြတ်ဗုဒ္ဓဟာ ခြောက်ပါးသောရောင်ခြည်တော်များနဲ့ ပြည့်စုံသူဖြစ်တဲ့အတွက် မည်သည့်အလင်းရောင်ကမျှ မထိုးဖောက်နိုင်ပါ။ သို့သော် သတ္တ၀ါများအတွက် တရားရှု့မှတ်နိုင်ရန် မြတ်ဗုဒ္ဓက သူ့ရှေ့မှာ ဆီးမီးပူဇော်ခွင့် ပေးခဲ့ခြင်းဖြစ်ပါတယ်။

          နိဂုံးချုပ်အနေနဲ့ အမွေးတိုင်ကဲ့သို့ တစ်စတစ်စနဲ့ ပျက်စီးနေတဲ့ ခန္ဓာကိုယ်ကြီးမပျက်စီးခင် မာန်မာနလောဘစတဲ့ မကောင်းမှုများမှရှောင်ကြဉ်ကာ ခန္ဓာကိုယ်ကြီးကို တရားသဘောနဲ့နေ့စဉ်ရှု့မှတ်ပြီး ကောင်းမှုများပြုလုပ်နိုင်ကြပါစေလို့ ဆန္ဒပြုလျက်..............။

0 comments:

Post a Comment

Powered by Blogger.