Saturday, November 12, 2011

တန်ဖိုးရှိတဲ့ ဘ၀လေးများ ဖြစ်စေချင် အပိုင်း(၁)

လောကဇာတ်ခုံပေါ်မှာ အဖုံဖုံလှည့်ကြ၊ ကကြရတဲ့ သတ္တ၀ါတွေရဲ့ ဘ၀ရပ်တည်မှုတွေဟာ ပုံစံအမျိုးမျိုးနဲ့ပါ။ လူ့ဘ၀ကိုရလာတဲ့လူသားများကျတော့ လူရဲ့တာဝန်များကို ပြလုပ်ရမှာဖြစ်သလို အသက်ဆက်လက်ရှင်သန်ရန်အတွက်လည်း ၀မ်းစာဖြည့်ဖို့ ရှာဖွေစားသောက်ပေးရမဲ့ တာဝန်က လည်း ရှိလာပါတယ်။ အဓိကမိန်းဖြစ်တဲ့ လက်တစ်ဝါးစာလောက် ၀မ်းလေးတစ်လုံးအတွက် အလုပ်လုပ်နေလိုက်ကြရတာ မိုးလင်းမှ မိုးချုပ်တဲ့အထိ။ တော်သေးတာပေါ့။ လူတစ်ယောက်မှာ ၀မ်းဗိုက်တစ်ခုပဲ ပါလို့သာ။ ဒီဝမ်းဗိုက်လေး တစ်ခုအတွက်ကိုပင် လူတွေဒီလောက်မနေမနား လုပ်နေရတယ်ဆိုရင် ၀မ်းဗိုက်သုံးလေးခုများပါရင် မလွယ်လှပါလား။

တချို့ကျတော့လည်း ကိုယ့်ဝမ်းဗိုက်အတွက်ထက် သူများဝမ်းဗိုက်အတွက်ပြည့်အောင်၊ သူများလှပစွာဝတ်စားဆင်ယင်နိုင်အောင်ဆိုပြီး ရရာအလုပ်ကို လုပ်ကိုင်ရှာဖွေပေးနေရတယ်။ ဘယ်လိုနည်းနဲ့ပဲရှာဖွေနေပါစေ မိမိရှာဖွေတဲ့အလုပ်ဟာ ရိုသားဖို့၊ သမ္မာအာဇီဝကျဖို့တော့ လိုပါတယ်။ ရိုးသားစွာ ရှာဖွေစားသောက်ရတဲ့အတွက် ဆင်းရဲချင်ဆင်းရဲမယ်။ နိမ့်ကျချင် နိမ့်ကျပါလိမ့်မယ်။ ဒါပေမဲ့ “ရိုးသားမှုဂုဏ် စားမကုန်”ဆိုတဲ့ စကားပုံအတိုင်း ရိုးသားစွာနဲ့ အသက်မွေးဝမ်းကြောင်းပြုရင် ရေရှည်တစ်သက်လုံး စားလို့မကုန်နိုင်ပါဘူး။ လူဆိုတာ အရှက်ဂုဏ်သိက္ခာကို တန်ဖိုးထားရမှာဖြစ်တဲ့အတွက် ရိုးသားမှုဂုဏ်ဟာ တန်ဖိုးကြီးပြီး စားလို့မကုန်ဘူးဟု ရှေးလူကြီးများက ဆိုခဲ့ကြတာပါ။ မရိုးသားတဲ့နည်းနဲ့ရတဲ့ ငွေကြေးဟာ မိမိအတွက် ခဏတာပဲစားသောက်ရပြီး ကျဆင်းသွားတဲ့ဂုဏ်သိက္ခာကတော့ တစ်သက်လုံးပဲ အမာရွတ်ထင်နေပါတယ်။ ရိုးသားစွာနဲ့နေထိုင်တဲ့ပုဂ္ဂိုလ်ဆိုရင် လူအများရဲ့ ချစ်ခင်မှုကိုလည်း ခံစရစမြဲပါ။ ရိုးသားတဲ့လူဟာ နေရာတကာမှာ မျက်နှာပန်းပွင့်ကာ တစ်သက်လုံးအေးချမ်းစွာနဲ့ နေထိုင်သွားလာနိုင်ပါတယ်။ ကိုယ်ကျင့်စာရိတ္တကောင်းလို့ လူချစ်လူခင် ပေါများတာကသာ ရေရှည်ချစ်ခင်မှုကို ရရှိတာပါ။ ပိုက်ဆံရှိလို့ ကပ်ဖားရပ်ဖားချစ်ခင်တဲ့ လူများဆိုတာကတော့ ခဏတာပိုက်ဆံရှိတဲ့အချိန်ပါပဲ။ မိမိမှာ ပိုက်ဆံမရှိတော့တဲ့ချိန်ဆို ချစ်ခင်ဖို့နေသာသာ နှုတ်ဆက်ဖော်တောင် မရကြတော့ပါဘူး။ မတရားတဲ့နည်းနဲ့ ရှာဖွေစားသောက်ရတာဟာ သံရည်ပူ မျိုရခြင်းထက် ပိုဆိုးတာကို လူတိုင်းသိမယ်ထင်ပါတယ်။ သူများမျက်ရည်ပေါက်ကျထားရတဲ့ ငွေကို မိမိက မြိုန်ရှက်စွာစားသောက်နိုင်တယ်ဆိုရင်လည်း အဲဒီလူဟာ တော်တော်မိုက်ရူးရဲတဲ့လူပဲ ဖြစ်ပါလိမ့်မယ်။ စာရိတ္တပျက်ယွင်းစွာနဲ့ ရှာဖွေစားသောက် နေထိုင်ခြင်းဟာ ယခုဘ၀တင်မကဘဲ နောင်ဘ၀များထိပါ ကိုယ့်ကိုပြန်လည် ဒုက္ခပေးတတ်ဆိုတာကိုလည်း သတိတရားထားရှိဖို့ လိုပါတယ်။

ဝမ်းတစ်လုံးအပြင် ခါးလှစေရန်အတွက် ပြင်ဆင်တဲ့နေရာမှာလည်း မိမိတို့ရရှိလာတဲ့ ၀င်ငွေပေါ်တွင်မူတည်ပြီး ၀င်ငွေအနည်းအများအလိုက် မိမိတို့ရဲ့ဘ၀ကို ပုံဖော်တတ်အောင် လေ့ကျင့်ပေးရပါမယ်။ ကိုယ်က အလုပ်မလုပ်ဘဲနေလို့လည်းကောင်း၊ အလုပ်လုပ်သော်လည်း ရှေးကံမကောင်းခဲ့လို့ အလုပ်အဆင်မပြေရင်လည်းကောင်း ဆင်းရဲမှုဒဏ်ကိုခံရရင် အဲဒီဆင်းရဲမှု လောကဓံကို ခံနိုင်ရည်ရှိအောင် ဖြစ်သလိုနေ၊ ဖြစ်သလိုစားတတ်ဖို့ ရောင်ရဲနိုင်ဖို့ လိုပါတယ်။ ဘယ်သူမဆို စားကောင်းသောက်ကောင်းများစားချင်ခြင်း၊ အ၀တ်လှလှဝတ်ဆင်လိုခြင်း၊ အဆင့်တန်းမြင့်မြင့် သုံးစွဲလိုခြင်းစတာတွေ ပြည့်စုံစေချင်ကြတာပါပဲ။ အဲဒီလို မပြည့်စုံတာ ကိုယ့်မှလားလို့ စဉ်းစားကြည့်သင့်ပါတယ်။ ဒုက္ခပင်လယ်ထဲကြီးဖြစ်တဲ့ ဒီသံသရာကြီးထဲကနေ ရုန်းမထွက်နိုင်သေးရင်တော့ ပြည့်စုံတယ်ဆိုတာ ဘယ်သူမှာမှ မရှိတဲ့အတွက် ဘယ်သူမဆို သူ့ဒုက္ခနဲ့သူ့လောဘနဲ့တော့ ရှိနေကြမှာပါ။ ဒါကိုပဲ မိမိက အသိတရားထားရှိပြီး ရတာလေးနဲ့ ရောင်းရဲနေထိုင်တတ်ဖို့ လိုတာပါ။ အဲဒီလို ရောင်ရဲတတ်ဖို့အတွက် “ရတာလေးနဲ့ လောက်အောင်စား” “ရှိတာလေးနဲ့ လှအောင်ဝတ်”ဆိုပြီး စကားပုံလေးနဲ့ သွန်သင်ဆုံးမမှုတွေ ရှေးလူကြီးများက ပေးခဲ့ကြတာပါ။ ဒီစကားပုံဟာ ချိုးခြံဖို့မဟုတ်တောင် ရောင့်ရဲတတ်ဖို့ထားရှိခဲ့တဲ့ စကားပုံလေးဆိုတာ လူတိုင်းသိမယ်ထင်ပါတယ်။ တင်းတိမ်ရောင့်ရဲခြင်းဟာလည်း မိမိကိုယ်ကို သုခဖြစ်စေတဲ့အတွက် ကောင်းမွန်တဲ့ စရိုက်တစ်ခုလို့ ဆိုနိုင်ပါတယ်။ မိမိလုပ်နိုင်သမျှ လုပ်အားခလေးနဲ့ စားနိုင်သောက်နိုင်သလောက်ကို ရောင်းရဲနိုင်မှု မရှိဘဲ ဖြစ်ချင်ရာဖြစ်ဆိုပြီး လောကကြီးကို အရွဲ့တိုက်မယ်ဆိုရင် ကိုယ့်ပဲ မျက်မှောက်တမလွန် နှစ်ဘ၀လုံးမှာ ဒုက္ခစပါယ်ရှယ် ခံစားရမှာပါ။

မိမိဉာဏ်အား၊ လုံ့လအား၊ ကံအစွမ်းအားလေးနဲ့ရတာကို လုံလောက်မှုရှိတယ်လို့ မခံစားရဘဲနဲ့ လောဘအားကြီးလာပြီးဆိုရင်တော့ နဂိုရှိတာထက်ပိုပြီး ၀တ်ချင်၊ စားချင်၊ သုံးချင်လာကာ ရိုးသားစွာရှာဖွေထားတဲ့ငွေများဟာ လုံလောက်ခြင်းမရှိတော့ဘဲ ဖြစ်လာပါတယ်။ အထူးသဖြင့် အမျိုးသမီးလေးများက ပိုဆိုးပါတယ်။ ဘာဖြစ်လို့လဲဆိုတော့ မိန်းကလေးဆိုတာ တစ်ယောက်နဲ့တစ်ယောက် ပြိုင်ဆိုင်ချင်တဲ့ မာန်မာနတွေ ရှိတတ်ကြတဲ့ မျိုးရိုးဗီဇပါနေလို့ပါ။ အဲဒီလို သဘာဝကပါလာတဲ့ မျိုးရိုးဗီဇကို မိမိက သတိတရား၊ ဆင်ခြင်မှုတရားနဲ့ မထိန်းချုပ်ဘူး ဆိုရင် အဲဒီမျိုးရိုးဗီဇကြောင့် မိမိဖြစ်ချင်တာကိုပဲ ရှေးတန်းတင်ကာ ဘ၀ကိုဖြစ်သလို ဖြတ်သန်း မိတတ်ကြပါတယ်။

လောဘဆိုတာကြီးကလည်း ခက်သားပဲ။ မိမိကသာ ဆင်ခြင်မှုတရားနဲ့မထိန်းချုပ်ဘူးဆိုရင် လောဘတရားက သာမန်ဝင်ငွေနဲ့မသုံးနိုင်တဲ့ အနေအထားများကို သွားရည်ကျလာတယ်။ အဲဒီအခါ စာရိတ္တပျက်ယွင်းစေတဲ့ အလုပ်များကို လုပ်ကိုင်လာပြီး “ဘယ်သူသေသေ ငတေမာပြီးရော” စိတ်ဓါတ်များဝင်လာတယ်။ မိမိဖြစ်ချင်တာ တစ်ခုတည်းသာကြည့်မိပြီး သူများမျက်ခုံးမွှေးပေါ် စင်္ကြလျှောက်ကာ ဘယ်သူကိုမှ ထည့်မတွက်တော့တဲ့ အခြေအနေထိ ဖြစ်သွားကြတယ်။။ မိမိကြောင့် တစ်ပါးသူများ ထိခိုက်သွားမယ်ဆိုတာကို မစဉ်းစားဘဲ အဲဒီလို မတရားရှာဖွေလို့ရတဲ့ဝင်ငွေများကို စိတ်ကြိုက်သုံးစွဲကာ ကိုယ့်ဘ၀ကို အကောင်းဆုံးဆိုတာတွေနဲ့ ပုံဖော်ကြတယ်။ လူကုံထံ အသိုင်းအ၀န်းများကြားတွင် ၀င်ဆံ့နိုင်တာကို ဂုဏ်ယူကြည်နှုးနေပြီး အဲဒီလိုနည်းနဲ့ အသက်မွေးတာဟာ ရေရှည်မတည်မြဲဘူးဆိုတာကိုတေ့ာ မေ့လျော့နေကြတယ်။

အမျိုးသားများ  စာရိတ္တပျက်ယွင်းခြင်းထက် အမျိုးသမီးများ စာရိတ္တပျက်ယွင်းတာက ပိုဆိုးပါတယ်။ ဘာဖြစ်လို့လဲဆိုတော့ မိန်းကလေးတွေ လောဘအားကြီးပြီး မဟုတ်တာတွေကို အဟုတ်ထင်ပြီး တစ်ယောက်နဲ့တစ်ယောက် ပြိုင်ဆိုင်ချင်တဲ့စိတ်တွေဖြစ်လာရင် မိမိတို့ ခန္ဓာကိုယ်ကိုရင်းနှီးကာ ၀င်ငွေများရှာဖွေခြင်းနဲ့ မိမိတို့ဘ၀ကို ပုံဖော်တတ်ကြလို့ပါ။ ဥပမာ- စားသောက်ဆိုင်များတွင် ဖျော်ဖြေခြင်း၊ အနှိပ်ခံများတွင် အလုပ်လုပ်ခြင်း၊ တည်ခိုးခန်းများတွင် ပြည်တန်ဆာမဘ၀နဲ့ အသက်မွေးဝမ်းကျောင်းပြုခြင်းစတဲ့ ယောက်ျားသားများအား ဖျော်ဖြေတဲ့ အလုပ်များလုပ်တတ်ကြလို့ပါ။ အဲဒီလိုလုပ်တာဟာ မဟုတ်တဲ့အရာတွေကို ပြိုင်ဆိုင်ချင်၊ ကြားဝါးချင်တဲ့ မခံချင်စိတ်မျိုးရိုးဗီဇများကြောင့် ငွေကိုလျင်မြန်စွာနဲ့ များများရတဲ့ အလုပ်များကို ပြုလုပ်ကြတာပါ။

ဂျာနယ်မှာ ဖော်ပြတာမို့ စာရှည်နေသဖြင့် အပိုင်း(၂)ကို နောက်ရက်တွင် ဆက်လက်တင်ပြပေးပါမယ်။

0 comments:

Post a Comment

Powered by Blogger.