Saturday, October 15, 2011

ဃဋိကာရအကြောင်း

အမေး။ ။ အရှင်ဘုရား ဃဋိကာရ ဗြဟ္မာကြီးအကြောင်း သိလိုပါတယ်။ ဖြေကြားပေးစေလိုပါတယ်ဘုရား။

အဖြေ။ ။ ဃဋိကာရ ဗြဟ္မာကြီးအကြောင်းကို ပြောရမည်ဆိုလျှင် အခါတစ်ပါး ကဿပမြတ်စွာဘုရားသည် ဝေဂဠိင်္ဂရွာကြီးကို အမှီပြုပြီးကျောင်း အရာမ်တစ်ခုမှာ သီတင်းသုံးနေတော်မူပါတယ်။ ကဿပဘုရားရှင်သီတင်းသုံးတော်မူစဉ်က ဘုရားရှင်ရဲ့အလုပ်အကျွေးဟာ အလွန်သဒ္ဓါတရားကောင်းတဲ့ ဃဋိကာအိုးထိန်းသည် ဖြစ်ပါတယ်။ သူ့တွင် အလွန်ချစ်ခင်ရတဲ့ သူငယ်ချင်းတစ်ယောက်ရှိခဲ့ဖူးပါတယ်။ သူ့နာမည်က ဇောတိပါလ ခေါ်ပါတယ်။ သူငယ်ချင်းဖြစ် သူ ဇောတိပါလက ပုဏ္ဏားမျိုးတွင်ဖြစ်၍ ဇာတ်အားဖြင့် မြင့်မြတ်သူဖြစ်ပြီး ဃဋိကာရက ဇာတ်နိမ့်သူဖြစ်ပါတယ်။ သူတို့နှစ်ဦးဟာ ဇာတ်အနိမ့်အမြင့်ကို ပဓနာမထားဘဲ တစ်ဦးနှင့်တစ်ဦး ချစ်ခင်စွာ ပေါင်းသင်းလာကြပါတယ်။ တစ်နေ့သ၌ ဃဋိကာရက ကဿပဘုရားရှင်အား ဖူးမျှော်ကြရန် သူ့၏သူငယ်ချင်း ဇောတိပါလအား “သူငယ်ချင်း မြတ်စွာဘုရားကို သွားရောက်ဖူးမျှော်ကြပါစို့ လား”ဟု ခေါ်ပါတယ်။

အဲဒီအခါမှာ “ ရဟန်းဦးပြည်းတွေကိုဖူးလို့ ဘာအကျိုးရနိုင်မှာလဲ၊ မဖူးချင်ပါဘူး”လို့ ဇောတိပါလက ဆိုပါတယ်။ ထိုအခါ မြစ်ဆိပ်နှင့် မနီးမဝေးမှာ ဘုရားရှင်သီတင်းသုံးနေတော်မူပါတယ်။ မြစ်ဆိပ်ခေါ်ရင်ကောင်းမည် လို့တွေးကာ ဃဋိကာရက “ဘုရားမဖူးချင်ဘူးဆိုရင်လည်း မြစ်ဆိပ်သွားပြီး ရေချိုးကြမယ်” လို့ပြောတော့ ဇောတိပါလက သဘောတူလိုက်တယ်။ သည်လိုနဲ့ နှစ်ဦးသား မြစ်ဆိပ်သွားပြီး ရေချိုးကြပါ တယ် ရေချိုးပြီးတဲ့အခါ ဃဋိကာရက ဘုရားဖူးသွားကြရန် ထပ်မံပြီးခေါ်ပေမယ့် ဇောတိပါလက မလိုက်ဘူး။ သို့နှင့် ရေစိုနေတဲ့ ဇောတိပါလရဲ့ ဦးခေါင်းမှ ဆံပင်ကိုဆွဲပြီး “သူငယ်ချင်းဇောတိပါလ ဘုရားကို ဖူးမြင်ရတယ်ဆိုတာ အလွန်အကျိုးများပါတယ်။ လိုက်သာလိုက်ခဲ့စမ်းပါ၊ ငြင်းမနေပါနဲ့” လို့ ပြောသောအခါ ဇောတိပါလက စဉ်းစားတယ်“ ဃဋိကာရဟာ ဇာတ်နိမ့်သူဖြစ်ပါရက်နဲ့ ငါ့ခေါင်းကို ဆွဲတယ်၊ ဘုရင်ကို သွားတိုင်ရင် ဘုရင်က သူ့ကို သတ်လိမ့်မယ်။ ဇာတ်နိမ့်က ဇာတ်မြင့်သူကိုကိုင်ရင် ဇာတ်နိမ့်သူဟာ အသတ်ခံရတတ်ပါတယ်။

ဒါကိုလည်း ဃဋိကာရဟာ မသိ၍မဟုတ် သိပါတယ်။ အသက်သေမှာကို သိပါလျက်နဲ့ ငါ့ကို အသက်စွန့်ပြီး ဘုရားကို ဖူးစေချင်လို့ ခေါ်နေတာဟာ အလွန်အကျိုးများလို့ ဖြစ်လိမ့်မယ်။ ငါလိုက်သွားကြည့်မယ်လေ။ အကျိုးတော့ယုတ်မှာ မဟုတ်ပါဘူးလို့တွေးကာ “ကောင်းပါပြီ သူငယ်ချင်း ကျွန်ပ်လိုက်ပါ့မယ်”လို့ပြောကာ ကဿပဘုရားရှင်ရှိရာသို့ ဃဋိကာရ အိုးထိန်းသည်နှင့်အတူ သွားကြပါတော့တယ်။ ဘုရားရှင်ရှေ့မှောက်ရောက်တဲ့အခါ မြတ်စွာဘုရားက သူတို့နှစ်ဦးအား တရားဟောတော်မူပါတယ်။ တရားနာပြီးတဲ့အခါ ဇောတိပါလက သာသနာတော်အား ကြည်ညိုလွန်းသည့်အတွက် သာသနာတွင်းမှာ ရဟန်းပြုခဲ့ပါတယ်။ ထိုရဟန်းပြုခဲ့သူ ဇောတိပါလကား တစ်ခြားသူမဟုတ် ဂေါတမမြတ်စွာ ဘုရားအလောင်း ဖြစ်ပါတယ်။

ကဿပဘုရားရှင်ဟာ ဝေဂဠိင်္ဂရွာကြီးမျာ ဗာရာဏာသီပြည် မိဂဒါဝုန်တောသို့ ကြွတော်မူပါတယ်။ ထိုသတင်းကို ဗာရာဏာသီပြည့်ရှင် ကိကီမင်းကြီးကြားသောအခါ မြတ်စွာဘုရားထံသို့ သွားရောက်ဖူးမြင်ပါတယ်။ ဘုရားရှင်က ကိကီမင်းကြီးနှင့်ပရိသတ်များအား တရားဟောတော်မူပါတယ်။ တရားအဆုံး၌ ဘုရားရှင်အား မနက်ဖြန်အတွက် ဆွမ်းအလို့ငှါပင့်ပြီး ပြန်သွားပါတယ်။ နောက်တစ်နေ့ ဘုရားရှင်ကြွလာတော်မူကာ ကိကီမင်းကြီးလှူဒါန်းတဲ့ဆွမ်းကို ဘုဉ်းပေးတော်မူပါတယ်။ ဆွမ်းကိစ္စပြီးတော်မူသောအခါ ဘုရားရှင်အား ဗာရာဏသီပြည်တွင် ၀ါကပ်တော်မူပါမည့်အကြောင်း ကိကီမင်းကြီးက လျှောက်ထားသောအခါ ဘုရားရှင်က လက်မခံခဲ့ပေ။ (၃)ကြိမ်တိုင်တိုင် လျှောက်ထားပါသော်လည်း လက်မခံခဲ့ပေ။ ကိကီမင်းကြီးဟာ စိတ်မချမ်းမသာတဲ့အတွက် “အရှင်ဘုရား တပည့်တော်အပြင် သာလွန်တဲ့အလုပ်ကျွေး ရှိပါသေးလားဘုရား”လို့ မေးလျှောက်သောအခါ ဘုရားရှင်က “မင်းကြီး ဝေဂဠိင်္ဂရွာမှာ ဃဋိကာဟာ ငါဘုရားရဲ့ မြတ်သောအလုပ်အကျွေး ဖြစ်ပါတယ်။ သင်မင်းကြီးဟာ ဗာရာဏသီမှာ ၀ါဆိုဖို့လျှောက်စဉ် ငါဘုရားပယ်ချခဲ့တဲ့အတွက် နှလုံးမသာယာ ဖြစ်တယ်။ ဃဋိကာရကတော့ နှလုံးမသာခြင်း မရှိပါ။ သူဟာ ရတနာသုံးပါးတို့ကို ကိုးကွယ်ဆည်းကပ်ပါတယ်၊ ငါးပါးသီလမြဲတယ်၊ သစ္စာလေးပါးတွင် ယုံမှားမှုကင်းပါတယ်။ မြတ်သောအကျင့် ရှိပါတယ်၊ ရွှေ ငွေတို့နှင့် ကင်းရှင်းပါတယ်။ သမ္မာအာဇီဝ အိုးလုပ်စားပါတယ်။ မျက်မမြင်မိဘနှစ်ပါးကိုလည်း လုပ်ကျွေးတယ်။ အနာဂါမ်ပုဂ္ဂိုလ်ဖြစ်တဲ့အတွက် ကွယ်လွန်သောအခါ ဗြဟ္မပြည်တွင်ဖြစ်ပြီး ပရိနိဗ္ဗာန်စံဝင်လိမ့်မယ်။

မင်းကြီး ငါဘုရားဟာ ဝေဂဠိင်္ဂရွာကြီးတွင်နေစဉ် ဃဋိကာရနေအိမ်သို့ ဆွမ်းခံကြွတော်မူပါတယ်။ ထိုအခိုက် ဃဋိကာရဟာ အိမ်မှာမရှိ တောထဲသွားနေပါတယ်။ အိမ်တွင်မျက်မမြင် မိဘနှစ်ပါးသာ ရှိပါတယ်။ ငါဘုရား ဆွမ်းခံတဲ့အခါ မျက်မမြင်မိဘနှစ်ပါးက အလိုရှိသလောက်သာခပ်ယူတော်မူပါ ဆို၍ ငါဘုရားကိုယ်တော်တိုင် ဆွမ်းကို ခပ်ယူခဲ့ရဘူးပြီ။ တောထဲကပြန်လာသော ဃဋိကာရက ထိုအကြောင်းကို သိသဖြင့် (၁၅)ရက်ပတ်လုံး ပီတိဖြင့်ချမ်းသာစွာ နေခဲ့ဖူးလေပြီ။

တစ်နေ့သ၌ ကဿပဘုရားရှင်ရဲ့ကုဋီအမိုးဟာ မိုးမလုံ၍ သက်ငယ်အမိုးလိုတဲ့အတွက် ရဟန်းတော်များကိုခေါ်ကာ “ချစ်သားတို့ ဃဋိကာရအိမ်မှာ သက်ငယ်မိုးရှိပါသလား” ဘုရားရှင်ကမေးသောအခါ ရဟန်းတော်များက “မြတ်စွာဘုရား သူတို့အိမ်မှာတော့ သက်ငယ်မိုးမမြင်ရပါဘုရား။ ဒါပေမယ့် သူ့တို့ရဲ့ အလုပ်တဲမှာတော့ မိုးထားတာ အသစ်ကြီး ရှိပါသေးတယ်ဘုရား”ဘုရားအား လျှောက်ထားကြပါတယ်။ ဘုရားရှင်က “ ဒါဆိုရင် ဃဋိကာရရဲ့ အလုပ်တဲက သက်ငယ်မိုးကို သွားရောက်ဖြုတ်ကြချေ”ဟု ရဟန်းများအား ခိုင်းတော်မူခဲ့ပါတယ်။ ရဟန်းတော်များကလည်း “အလုပ်တဲသွားကာ သက်ငယ်အမိုးကို ဖြုတ်ယူနေကြစဉ် မျက်မမြင်မိဘနှစ်ပါးက မေးသောအခါ ရဟန်းတော်များက အကြောင်းစုံ ပြောပြပါတယ်။ မျက်မမြင်မိဘနှစ်ပါးကလည်း သက်ငယ်မိုး ဖြုတ်ယူကြပါရန် ကြည်ဖြူစွာ ခွင့်ပြုလိုက်ပါတယ်။ ဃဋိကာရတောထဲက ပြန်လာသောအခါ အကြောင်းစုံကို မိဘများထံမှသိရတဲ့အတွက် “ဘုရားရှင်ဟာ ငါ့အပေါ် အလွန်အကျွမ်းဝင်တော်မူတယ်။ ငါ့အား အရတော်လေစွ”လို့ တွေးကာ နှစ်သက်သောပီတိဖြင့် (၇)ရက်ပတ်လုံး ချမ်းသာစွာနေခဲ့ရပါတယ်။

မှတ်ချက်။ ။(ထိုအချိန်မှစ၍ ဃဋိကာရတို့ရဲ့အိမ်ဟာ အမိုးမရှိတော့ဘဲ ၀ါတွင်းသုံးလလုံးလုံး နေလာခဲ့ရာ ဃဋိကာရတို့ရဲ့အိမ်တွင် ဘယ်လောက်ပဲမိုးရွာရွာ မိုးမစိုပေ။ နောင်ကမ္ဘာတည်သ၍ တည်နေမည့် ကပ္ပဌိတိလေးမျိုးတွင်တမျိုးဖြစ်သည်)။ ကဿပဘုရားရှင်က ထိုသို့မိန့်တော်မူသောအခါ ကိကီမင်းကြီးဟာ ဃဋိကာရအား သလေးဆန် လှည်းအစီးငါးရာနှင့်အတူ လျောက်ပတ်သော ဟင်းချက်စရာများကို ပို့စေပါတယ်။ ထိုပစ္စည်းများကို ဃဋိကာရက လက်မခံခဲ့ပေ။ ဘာ့ကြောင့်နည်း။ ဘုရားရှင်က ငါ၏ ၀ါဆိုရန်လျှောက်ထားမှုနှင့် ငါရဲ့ဂုဏ်ကျေးဇူးကိုပြောသဖြင့် ကိကီမင်းကြီးက ပေးပို့ခြင်းဖြစ်တယ်။ က၍ရတဲ့ပစ္စည်း၊ သီဆို၍ရတဲ့ပစ္စည်းကဲ့ သို့ ဖြစ်သောကြောင့် လက်မခံခဲ့ခြင်း ဖြစ်ပါကြောင်း ဃဋိကာရအကြောင်းကို ဖြေကြားပေးလိုက်ရပါသည်။ (မဇ္ဈိမပဏ္ဏာသ၊ ရာဇ၀ဂ်၊ ဃဋိကာရသုတ်)။
ဦးကောဝိဒ(မြိတ်) http://venkawwida.com မှ

2 comments:

win said...

မြတ်စွာဘုရားတိုင်းဟာ အိန္ဒိယပြည် နေရာတစ်နေရာတည်းမှာပဲ ဘုရားဖြစ်တော်မူတာပဲလား။တစ်ခြားတိုင်းပြည်(သို့)တစ်ခြားနေရာမှာရော ဘုရားဖြစ်တော်မူပါသေးလားဘုရား။

ဆန်နီနေမင်း said...

မြစ်၊ ချောင်းတွေဟာ ရွေ့လျားနေတဲ့အတွက် အမြဲတမ်းပြောင်းလဲနေသလို ကမ္ဘာမြေကြီးဟာလည်း အချိန်ကာလကြာလာတာနဲ့ ပြောင်းလဲနေပါတယ်။ အဲဒီတော့ မြတ်ဗုဒ္ဓတိုင်းဟာ တောင်ကျွန်းရဲ့ အလယ်တည့်တည့်နေရာသာ ဘုရားပွင့်ကြပေမဲ့ တစ်နေရာတည်းဖြစ်နေဖို့။ တူနေဖို့ကတော့ မလွယ်ပါ။ ဖြစ်လည်း မဖြစ်နိုင်ဖို့ များပါတယ်။ ကျန်တာမကြည့်နဲ့ မြစ်ချောင်းနဲ့နီးတဲ့ ရွာတွေတောင် နှစ်ပေါင်း(၁၀၀)လောက်ကြာရင် နေရာရွေ့လားသွားတယ်လေ။ အရင်ရွာက နောက်ကျတော့ မရှိတော့ဘူးလေ။ အဲဒါကြောင့် ပုံသေကတော့ တွက်လို့ မရပါ။

Post a Comment

Powered by Blogger.