Saturday, October 15, 2011

ပါရမီဖြည့် ကျွတ်တမ်းဝင်သင်္ချေယျတို့ကို သိချင်တယ်

အမေး။ ။ (၁)ပညာဓိကာရ၊ သဒ္ဓါဓိကာရ၊ ၀ီရိယဓိကာရ ဘုရားအမျိုးအစားသုံးမျိုးကို ရှင်းပြပေးပါဘုရား။ (၂)ဘာကြောင့် ပါရမီဖြည့်ကျင့်ရသည့်ကာလ ကွာခြားမှုရှိရပါလဲ၊ တခြားမည်သည့်အချက်တွေမှာ ကွဲပြားခြားနားမှု ရှိသလဲ၊ ဖြေရှင်းပေးပါဘုရား။ (၃)ဘုရားတစ်ဆူနှင့်တစ်ဆူ သာသနာတွင် ကျွတ်လွတ်သည့် သတ္တ၀ါအရေအတွက် ကွာခြားသည်ဟုလည်း ကြားဖူးပါတယ်။ မှန်မမှန် ဖြေရှင်းပေးတောမူပါဘုရား။ (၄)လေးအသင်္ချေနှင့်ကမ္ဘာတစ်သိန်း ပါရမီဖြည့်ရာတွင် တစ်သင်္ချေတွင် ကမ္ဘာပေါင်းမည်မျှ ရှိပါသလဲ(သို့) တစ်သင်္ချေဆိုသည်မှာ မည်မျှကြာညောင်းပါသလဲဆိုသည်ကို ဖြေကြားပေးတော်မူပါဘုရား။

မင်းထက်ဝင်း

Moscow Power Engineering Institute (MPEI)


အဖြေ။ ။ နံပါတ်(၁)အဖြေက သဒ္ဓါအားနည်းပြီး ပညာထက်မြက်တဲ့ပုဂ္ဂိုလ်ကို ပညာဓိက လို့ခေါ်ပါတယ်။ ပညာအလယ်အလတ်မျှသာရှိပြီး သဒ္ဓါအားကြီးတဲ့ပုဂ္ဂိုလ်ကို သဒ္ဓါဓိကလို့ ခေါ်ပါတယ်။ သဒ္ဓါနှင့်ပညာအားနည်းပြီး ၀ီရိယအားကောင်းတဲ့ပုဂ္ဂိုလ်ကို ၀ီရိယာဓိက လိုခေါ်ပါတယ်။

နံပါတ်(၂)မေးခွန်းက ပါရမိဖြည့်ရာကာလကွာခြားခြင်းအကြောင်းကို မေးထားတာနဲ့ စပ်လျဉ်း၍ ပညာဓိကက လေးသင်္ချေနဲ့ကမ္ဘာတစ်သိန်း။ သဒ္ဓါဓိကက ရှစ်သင်္ချေနဲ့ကမ္ဘာတစ်သိန်း။ ၀ီရိယာဓိကက ဆယ်ခြောက်သင်္ချေနဲ့ကမ္ဘာတစ်သိန်းဟု အသီးသီး ပါရမီဖြည့်ရာကာလ မတူညီပုံကို ရေးထားပါတယ်။ မတူညီကွဲပြားရခြင်းအကြောင်းက သောတတ္တကီကျမ်း အ၀ိဒူရေနိဒါန်းမှာ-
(၁) ဥဂ္ဃါဋိတညူ ဘုရားလောင်း။ (၂) ၀ိပဉ္စိတညူ ဘုရားလောင်း။
(၃)နေယျဘုရား လောင်းရယ်လို့ (၃)မျိုးရှိပါတယ်။

ထိုသုံးမျိုးအနက် (၁)ဥဂ္ဃါဋိတညူ ဘုရားလောင်းဟာ ပညာဦးစီးတဲ့ ပညာဓိကဘုရားလောင်း ဖြစ်ပါတယ်။ (၂)၀ိပဉ္စိတညူဘုရားလောင်းဟာ သဒ္ဓါဦးစီးတဲ့ သဒ္ဓါဓိက ဘုရားလောင်း ဖြစ်ပါတယ်။ (၃)နေယျဘုရားလောင်းဟာ ၀ီရိယဦးစီးတဲ့ ၀ီရိယာဓိကဘုရားလောင်းဖြစ်ပါတယ်။
ပညာဓိကဘုရားလောင်းဟာ ဥဂ္ဃါဋိတညူမျိုးဖြစ်တဲ့အတွက် အလွန်ဉာဏ်ထက်မြက်တယ်။ ကိလေသာအပေါ်ဉာဏ်က လွန်နေပါတယ်။ ဒါကြောင့် ပါရမီဖြည့်တဲ့အခါ လေးသင်္ချေနဲ့ ကမ္ဘာတစ်သိန်းသာ ပါရမီဖြည့်ရပါတယ်။

သဒ္ဓါဓိကဘုရားလောင်းဟာ ၀ိပဉ္စိတညူမျိုးဖြစ်တဲ့အတွက် ဉာဏ်နဲ့ကိလေသာ ညီမျှနေပါတယ်။ ဒါကြောင့် ရှစ်သင်္ချေနဲ့ကမ္ဘာတစ်သိန်းသာ ပါရမီဖြည့်ရပါတယ်။ ၀ီရိယာဓိကဘုရားလောင်းဟာ နေယျပုဂ္ဂိုလ်မျိုးဖြစ်တဲ့ အတွက် ဉာဏ်အားနည်းပြီးကိလေသာကများနေပါတယ်။ ဒါကြောင့် ဆယ်ခြောက်သင်္ချေနဲ့ ကမ္ဘာတစ်သိန်းပါရမီဖြည့်မှ အထွတ်အထိပ်ကို ရောက်ပါတယ်။

အချူပ်ဆိုရသော် ဘုရားလောင်းတော်တို့ ပါရမီဖြည့်ရာ ကာလမတူညီသည်မှာ ဉာဏ်ပညာနှင့် ကိလေသာနှစ်ခုအထူးကြောင့် ပါရမီဖြည့်တော်မူတဲ့နေရာမှာ ကွာခြားကြခြင်းဖြစ်ပါတယ်။ နံပါတ်(၃)အမေးတွင် ဘုရားတစ်ဆူနှင့်တစ်ဆူ ကျွတ်တမ်းဝင်သည့် အရေအတွက်ဟာ ကွာခြားတယ်ဆိုတာမှန်/မမှန်ကို ဖြေကြားပေး ပါတဲ့။ ဘုရားတစ်ဆူလျှင် (၂၄)သင်္ချေနှင့်ကုဋေ(၆၀)၊ ဗိုလ်ခြေတစ်သိန်း ကျွတ်တမ်းဝင်ကြပါတယ်ဟု တထာဂတုပ္ပတ္တျိကျမ်းမှာဆိုထားပြီး၊ ဇိနာလင်္ကာရကျမ်းက (၂၄)သင်္ချေ ပမာဏကျွတ်တမ်းဝင်ကြတယ်လို့ ဆိုထားပါတယ်။ ဤစကားများဟာ ပါဠိတော်၊ အဋ္ဌကထာတို့၌ မတွေ့ရပါ။ ဒါပေမယ့် ဓမ္မပဒအဋ္ဌကထာမှာတော့ တစ်ဂါထာ တစ်ဂါထာဟောတော်မူလျှင် ကျွတ်တမ်းဝင်သော ဝေနေယျ အလွန်များပါတယ်။ ဤကဲ့သို့ ကျွတ်တမ်းဝင်ကြသော သုတ္တန်ဒေသနာဟာ အများအပြား ရှိပါတယ်။ အင်္ဂုတ္တရနိကာယ် ဧကနိပါတ် အဋ္ဌကထာတွင် မဟာသမယသုတ်၊ မင်္ဂလသုတ်၊ စူဠရာဟုလောဝါဒသုတ်၊ သမစိတ္တပဋိပဒါသုတ် ထိုသုတ်(၄)သုတ်နဲ့ တရားထူးရကုန်သော သတ္တ၀ါများဟာ အပိုင်းအခြားမရှိဟု ဆိုထားပါတယ်။

သုတ္တနိပါတ် အဋ္ဌကထာ ပရာဘ၀သုတ်အဖွင့်မှာ မဟာသမယသုတ်၊ မင်္ဂလသုတ်၊ သမစိတ္တသုတ်၊ ရာဟုလောဝါဒသုတ်၊ ဓမ္မစက္ကသုတ်၊ ပရာဘ၀သုတ်တို့ကို ဟောကြားရာဆီသို့ အစည်းအဝေးရောက်ရှိလာတဲ့ နတ်များဟာ မရေမတွက်နိုင်အောင် များလှပါတယ်ဟု ဆိုပါတယ်။

အရှင်မဟိန္ဒထေရ် သီဟိုဠ်ကျွန်းသို့ရောက်တဲ့နေ့ သမစိတ္တသုတ်ကို ဟောကြားတော်မူရာအဆုံး၌ မရေမတွက်နိုင်တဲ့နတ်များ တရားထူးရကြပါတယ်။ နဂါး၊ဂဠုန်တို့လည်း သရဏာဂုံတည်ကြပါတယ် လို့ ၀ိနည်းအဋ္ဌကထာ၌ ဆိုထားပါတယ်။ အချူပ်ဆိုရသော် ဘုရားတစ်ဆူဆူလျှင် ကျွတ်တမ်းဝင်ကြတာဟာ အပိုင်းအခြားမရှိ များလှတဲ့အတွက် ဆရာမထေရ်မြတ်တို့ တစ်ထစ်ချ ၀န်မခံနိုင်ကြပါ။

နံပါတ်(၄)မေးခွန်းမှာ အသင်္ချေရဲ့အရေအတွက်ကို မေးထားပါတယ်။ ရှေးဦးစွာ တစ်ကမ္ဘာရဲ့ အရေအတွက်ကို ပြောပါ့မယ်။ အလျား၊ အနံ၊ အမြင့်တစ်ယူဇနာ(၈မိုင်) စီရှိတဲ့ တိုက်ခန်း(ဂိုဒေါင်)ကြီးအတွင်း၌ သေးငယ်တဲ့မုန်ညင်းဖြူစေ့ အပြည့်ထည့်၍ နှစ်ပေါင်းတစ်ရာပြည့်လျှင် ဂိုင်ဒေါင်ထဲက မုန်ညင်းဖြူစေ့ တစ်စေ့ယူ ထုတ်ပါ။ ဤသို့အားဖြင့် နှစ်ပေါင်းတစ်ရာပြည့်တိုင်း မုန်ညင်းဖြူစေ့တစ်စေ့ယူထုတ်၍ ဂိုဒေါင်ထဲက မုန်ညင်းစေ့ကုန်သွားဖွယ် ရှိပါတယ်၊ ဒါပေမယ့် တစ်ကမ္ဘာရဲ့သက်တမ်းကတော့ မကုန်သေးပါဘူးတဲ့။

နောက်တစ်ခုက အသင်္ချေယျရဲ့အရေအတွက် ဖြစ်ပါတယ်။ ကမ္ဘာဦးလူတို့ သက်တမ်းဟာ အသင်္ချေယျတမ်းအထိရှည်ပါတယ်။ နောက်ပိုင်းတွင် လောဘ၊ ဒေါသ အကုသိုလ်များကြောင့် အသက်တမ်းဟာ တဖြည်းဖြည်း ဆုတ်ယုတ်နိမ့်ကျလာရာမှ ဆယ်နှစ်သက်တမ်းတိုင်အောင် ဆုတ်ယုတ်သွားပါတယ်။ အဲဒါကို ဆုတ်ကပ်တစ်ကပ်လို့ခေါ်ပါတယ်။ တဖန် ဆယ်နှစ်သက်တမ်းတွင် ဗြဟ္မစိုရ်တရားများ ပွားများလာရာမှ သက်တမ်းဟာ တဖြည်းဖြည်းမြှင့်တက်လာရာမှ အသင်္ချေယျတမ်းတိုင်အောင် တက်လာပါတယ်။ အဲဒါကို တက်ကပ်လို့ ခေါ်ပါတယ်။ ထိုသက်တမ်း ဆုတ်ကပ်နှင့်တက်ကပ်တစ်စုံကို အန္တရကပ်တစ်ကပ်ဟု ခေါ်ပါတယ်။ ဤ အန္တရကပ်ပေါင်း (၆၄)ကပ်ကြာလျှင် အသင်္ချေယျကပ် တစ်ကပ် ဖြစ်ပါတယ်။ ဤအသင်္ချေယျကပ် (၄)ကပ်လျှင် မဟာကပ်တစ်ကပ်ဖြစ်ပါတယ်။ ထိုမဟာကပ်ကိုပင်လျှင် တစ်ကမ္ဘာဟုခေါ်ပါကြောင်း ဖြေကြားပေး လိုက်ပါတယ်။

ဦးကောဝိဒ(မြိတ်) http://venkawwida.com မှ

2 comments:

win said...

ယခုကာလသည် မည်သည့်ကပ်တွင် ပါဝင်ပါသလဲ။
အရိမေတ္တရဘုရား ပွင့်တော်မူလျှင် မြေပြင်များ အားလုံးညီမယ်ဆိုတာ ဟုတ်မဟုတ် သိလိုပါတယ်ဘုရား။

ဆန်နီနေမင်း said...

မေးဖြေကဏ္ဍထဲတွင် အရိမေတ္တေယျဘုရားအကြောင်းမှာ ကပ်တွေအကြောင်း အကျယ်တ၀င့် ရေးထားပါတယ်။

Post a Comment

Powered by Blogger.