Thursday, September 1, 2011

နောင်ပွင့်မဲ့ဘုရားကျမှ ကျွတ်တမ်းဝင်အောင်လုပ်မယ်ဆိုရင်

အမေး။ ။ အရှင်ဘုရား ယခုခေတ်လူငယ်နဲ့လူအတော်များများဟာ အရိမေတ္တေယျဘုရားရှင်လက်ထက်မှာ လူဖြစ်ခွင့်ရအောင်လုပ်ပြီး၊ ကျွတ်တမ်းဝင်အောင်လုပ်မယ်ဆိုတဲ့ ရည်မှန်းချက်တွေထားကြပါတယ်။ အဲဒါ သင့်မသင့်ဆိုတာသိချင်ပါတယ်ဘုရား။
ခင်ဖုန်းမြင့်
ကွန်ပျုတာတက္ကသိုလ်

အဖြေ။ ။ နောင်ပွင့်မဲ့ဘုရားရှင်လက်ထက်မှာ လူဖြစ်ခွင့်ရဖို့ဆိုတာ ဘယ်သူမှ အာမမခံနိုင်ပါဘူး။ သေချာတဲ့အလုပ်မဟုတ်ဘူး။ ဘာ့ကြောင့်ဆိုရင် ဘုရားရှင်က “မနုဿတ္တဘာဝေါ ဒုလ္လဘော” လူ့အဖြစ်ရဖို့အတ်ာခဲယဉ်းတယ်။ ဘယ်လောက်ခဲယဉ်းလဲဆိုရင် ဗြဟ္မာ့ပြည်က အပ်တစ်စင်းကျလာတဲ့အခါ လူ့ပြည်က အပ်တစ်စင်းက ထောင်ထားမယ်။ ဒီအခါမှာ အပ်သွားချင်းသာ ထိသွားနိုင်တယ်။ လူဘ၀ဖြစ်ဖို့ဆိုတာ မလွယ်လှပါဘူး။ ဒါကြောင့် အရိမေတ္တေယျဘုရားရှင်လက်ထက်မှာ လူဖြစ်ဖို့ထက် ယခုဘ၀မှာ သေချာပေါက် လူဖြစ်နေကြရတယ်ဆိုတာကိုတော့ ကိုယ့်ကိုယ်ကို သတိထားစေချင်တယ်။

ဒီလိုလူ့ဘ၀ရနေတဲ့အပြင် ကြုံခဲလှတဲ့ ဘုရားရှင်သာသနာနဲ့လဲ ကြုံနေရပါပြီ။ နာရခဲတဲ့တရားတော်များကိုလဲ နာနေရပြီလေ။ ဒီလိုအဆင်ပြေနိုင်မဲ့ဘ၀ ဘယ်ဘ၀များရှိခဲ့လို့လဲ၊ ဘ၀ါဘ၀များစွာက ဘုရားအဆူဆူနဲ့လွဲခဲ့ပြီ။ ယခုလက်ရှိဘ၀မှာ ဘုရားရှင်သာသနာရှိနေတဲ့အတွက် အပျင်းမထူဘဲ တရားအားထုတ်ရင် မဂ်ဖိုလ်နိဗ္ဗာန် ရောက်နိုင်ပါတယ်။ ဒီလိုအခွင့်ကောင်းကို လက်လွတ်အဆုံးအရှုံးခံပြီး မသေချာမရေရာတဲ့ နောင်လာမဲ့အနာဂတ်ကို မမျှော်လင့်ပါနဲ့။ မေးပါအုံးမယ်။ စာရှုသူများ တကယ်လို့ ယခုအခါမှာ ငွေသိန်းပေါင်းများစွာ ရမယ်ဆိုပါစို့ ဒီအခွင့်အရေးကို အခုမယူဘဲ နောက်ဘ၀မှယူမယ်လို့ဆိုရင် လောကမှာ ဒီလူလောက်မိုက်တဲ့သူ ရှိပါအုံးမလား။

ဒါကြောင့် ရနိုင်တဲ့အခွင့်အရေးကို လက်လွတ်ဆုံးရှုံးမခံကြပါနဲ့၊ စိတ်ကူးမလွဲကြပါနဲ့လို့ ပြောလိုက်ပါရစေ။ တုမှေဟိ ကိစ္စမာတပ္ပံ=ချစ်သားတို့ အားထုတ်မှုကိစ္စကို ပွားများအားထုတ်ပါလော့၊ အားထုတ်သင့် အားထုတ်ထိုက်နေပါပြီလို့ ဘုရားရှင် တိုက်တွန်းမိန့်တော်မူခဲ့တဲ့စကားတော်အရ ယခုဘ၀မှာ တရားထူးရအောင် အားထုတ်ကြပါတော့။

ဦးကောဝိဒ(မြိတ်) http://venkawwida.com/မှ

0 comments:

Post a Comment

Powered by Blogger.