Sunday, September 18, 2011

သူ့ဝဋ်ကြွေးနဲ့သူသေတာ ဘာဖြစ်လို့ကိုယ့်မှာ အပြစ်ဖြစ်တာလဲ

မေး။ ။ အရှင်ဘုရား တပည့်တော်တို့စိတ်မှာ မရှင်းလင်းတဲ့ကိစ္စတစ်ခု မေးလျှောက်ခွင့် ပြုတော်မူပါဘုရား။

လူတွေက အတိတ်ကံ၊ ၀ဋ်ကြွေးကို မလွန်ဆန်နိုင်ကြဖူးလို့ တပည့်တော်သိထားပါတယ်။ ဥပမာ-မောင်ဖြူဆိုတဲ့လူတစ်ယောက်ဟာ သူများအသတ်ကိုသတ်ခဲ့ဖူးတဲ့ အကုသိုလ်ကံကြောင့် သူ့ကိုလည်း သူများကသတ်ခဲ့ရင် သူဟာသူ့ကံကြောင့်သေရတာဖြစ်ပေမဲ့ မောင်နီဆိုတဲ့ သတ်တဲ့သူကလည်း မောင်ဖြူရဲ့ကံအကြောင်းတရားကြောင့် သတ်ဖို့ဖြစ်လာခဲ့တာ မဟုတ်လား။ အဲဒီလိုသတ်ဖို့ဖြစ်လာတဲ့ မောင်ဖြူမှာသတ်ခြင်းကြောင့် အကုသိုလ်ဖြစ်ရတာကို စိတ်ထဲမှာ ဘ၀င်မကျဖြစ်နေမိပါတယ်။ တကယ်တော့ မောင်ဖြူက သူအကုသိုလ်နဲ့သူ သေရတာပဲမဟုတ်လား ဘုရား။ မောင်နီကလည်း မောင်ဖြူရဲ့အကုသိုလ်ကံကြောင့် သတ်ဖြစ်သွားတာမဟုတ်ဘူးလားဘုရား။ ဘယ်သူ့မှာ ဘယ်လိုအကုသိုလ်ပါတယ်ဆိုတာ ဘယ်သူက ကြိုသိနိုင်မှာလဲဘုရား။ တပည့်တော်အနေနဲ့ သူများအသတ်ကိုသတ်တာ ငရဲကြီးတယ်ဆိုတာသိပေမဲ့ ဒီလိုကိစ္စမျိုးမှာ ဘယ်သူကမှားတယ်ဆိုတာ မပြောတတ်အောင်ပါဘဲ။

တပည့်တော် ဒီမေးခွန်းကို မေးဖြစ်သွားတာ သူငယ်ချင်းတစ်ယောက်ကြောင့်ပါ။ သူငယ်ချင်းက

သူအလိုမတူပဲ ကိုယ်ဝန်ရခဲ့တဲ့အတွက် ကလေးကို သိပ်မုန်းပါတယ်။ ကလေးကို သူ့ကလေးလို့လက်မခံနိုင်သလို လူယုတ်မာကိုလည်း သူမယူနိုင်ပါဘူး။


ဒီကိုယ်ဝန်ကြောင့် လူယုတ်မာကိုယူရရင် သူ့ဘ၀တစ်ခုလုံးပျက်စီးမှာဖြစ်ပြီး မိဘတွေလည်း အရှက်ကွဲကြရပါမယ်။ ကလေးကိုလဲ မွေးခဲ့သည့်တိုင်အောင် လူ့လောကထဲမှာ သူ့သားသမီးအဖြစ် အသိအမှတ်ပြုနိုင်မှာ မဟုတ်ပါဘူးတဲ့။ မွေးပြီးမှ ပြစ်ထားတာထက်စာရင် မမွေးတာဟာ ကလေးအတွက်ရော သူ့အတွက်ရော ကောင်းမယ်လို့ယူဆပြီး ကလေးကို တစ်လသားကိုယ်ဝန်မှာ ဖျက်ချခဲ့ပါတယ်။ တစ်လသားဆိုတာ အသက်လဲမ၀င်သေးတော့ ငရဲမကြီးပါဘူးလို့ ပြောတဲ့လူကလဲ ပြောခဲ့လို့ပါတဲ့။ နိုင်ငံခြားမှာလဲ မလိုချင်တဲ့ကလေးကို တရားဝင်ဖျက်ချခွင့်တွေရှိနေတော့ ဒါကို သူလဲ အဲဒီတုန်းကတော့အပြစ်လို့ မယူဆခဲ့ဖူးထင်ပါတယ်။

အခု သူအသက်ရလာလို့ဘာသာရေးတွေကို လေ့လာတဲ့အခါမှာ သူအကုသိုလ်တရားကို ထိတ်လန့်လာပါတယ်။ သူကလေးဖျက်ခဲ့တဲ့အတွက် သူဘယ်လိုအကုသိုလ်ကံတွေ ခံရမလဲပေါ့။ သူဘယ်လိုလုပ်ရင် အကုသိုလ်တွေကနေ သက်သာရာရမလဲပေ့ါ။ တပည့်တော်ကို မေးလာခဲ့ပါတယ်။ တပည့်တော်လဲ ရေများရေနိုင် မီးများမီးနိုင်ဆိုသလို လူ့ဘ၀မှာ အကုသိုလ်နဲ့တော့ လူတိုင်းမကင်းဘူး။ အကုသိုလ်ကို အမြဲတမ်းတွေးနေရင် အကုသိုလ်ဖြစ်တယ်။ နင်လဲ မလွှဲမရှောင်သာလို့လုပ်ခဲ့ရတာပဲ။ ကလေးမှာလဲ သူ့အကုသိုလ်ပါလို့ အသက်ရှင်ခွင့်မရတာပေါ့။ ဘယ်လိုကုသိုလ်ကောင်းမှုဖြစ်ဖြစ် လုပ်သာလုပ်ပါ။ ကုသိုလ်လုပ်တာများရင် အကုသိုလ်တွေ အကျိုးမသက်ရောက်နိုင်တော့ပါဘူးလို့ တပည့်တော် ဖြေမိပါတယ်။ ဒါပေမဲ့ တပည့်တော်အဖြေက မှန်မမှန် တပည့်တော် သံသယ၀င်လို့ အရှင်ဘုရားကို မေးလျှောက်တာပါဘုရား။ သူ့အနေနဲ့ ဖြစ်ပြီးသားကို မပြင်နိုင်တော့ပေမဲ့ သူပြုခဲ့တဲ့ အကုသိုလ်အကျိုးပေးကို သက်သာစေမဲ့ မှန်ကန်တဲ့ ကုသိုလ်ပြုနည်းရှိရင် တပည့်တော်ကို ဖြေကြားပေးပါဘုရား။

တပည့်တော်သူငယ်ချင်းက သူ့အကုသိုလ်ကြောင့် နောက်ဘ၀မှာ မိဘတွေက စွန့်ပစ်တာခံခဲ့ရရင် သူဆင်းဆင်းရဲရဲနဲ့ ဒုက္ခမရောက်ရအောင်ဆိုပြီး မိဘမဲ့ကလေးတွေကို အမြဲအလှူဒါနပြုပါတယ်။ သူမသိနားမလည်ဘဲလုပ်ခဲ့မိတဲ့အပြစ်အတွက် ကြေရာကြေကြောင်းအနေနဲ့ ဆေးဖိုးဝါးခမတတ်နိုင်တဲ့ ရောဂါသည်ကလေးတွေကိုလည်း အကူညီပေးပါတယ်။ ဆေးမကုနိုင်လို့ အသေခံရတော့မဲ့ ကလေးလူနာတွေကိုလဲ သူအသက်ကယ်ပါတယ်။ သူကုသိုလ်ကောင်းမှုလုပ်ပြီးတိုင်း ဒီကောင်းမှုကြောင့် သူ့အပြစ်တွေကျေပါစေလို့ သူဆုတောင်းပါတယ်တဲ့။ သူလုပ်နည်း မှန်ပါသလားဘုရား။ တပည့်တော် သူငယ်ချင်းအတွက် သနားသဖြင့် ဖြေကြားပေးတော်မူပါဘုရား။

ရိုသေစွာဖြင့်
ဟန်ထွန်း

ဖြေ။ ။ အင်း ဒကာမေးထားတဲ့ မေးခွန်းတွေက များတယ်လို့ထင်ရပေမဲ့ အပိုင်း(၃)ပိုင်းပဲ ရှိမယ်ထင်ပါတယ်။ အဲဒီတော့ နံပါတ်(၁)အနေနဲ့ ပထမဦးဆုံး သတ္တ၀ါတွေဟာ သေခြင်း(၄)မျိုးရှိတာထဲက တစ်မျိုးမျိုးနဲ့ သေကြရတာဆိုတာကို ရှင်းပြပါမယ်။ (၁)-သက်တမ်းကုန်လို့ သေတယ်။ (၂)-ကံကုန်လို့ သေတယ်။ (၃)-သက်တမ်းရော၊ သေရမဲ့ကံရောကုန်လို့ သေတယ်။ (၄)-သက်တမ်းရော၊ ကံတရားရော ရှိနေသေးမဲ့ ရုတ်တရက်ဝဋ်ကြွေးကြောင့် သေရတယ်ဆိုတဲ့ သေခြင်း(၄)မျိုးရှိပါတယ်။

အဲဒီတော့ တစ်စုံတစ်ယောက်ဟာ သူ့ပါလာတဲ့ကံကြောင့် တစ်နည်းနည်းနဲ့သေရမှာ မုချဧကန်ဖြစ်နေတာကို မိမိကကြားခံဝင်လိုက်ပြီး သတ်လိုက်တဲ့အတွက် အပြစ်ဖြစ်သွားရတာပါ။ ဥပမာ-မောင်ဖြူက မောင်ညိုကို ဓါးနဲ့ထိုးတယ်။ ဒါပေမဲ့ ကြားကနေ မောင်နီက ၀င်ခံလိုက်တဲ့အတွက် မောင်နီသေသွားတယ်။ အဲဒီအခါ မောင်ဖြူက ပြောမှာပေါ့။ ငါသတ်တာ မောင်ညို၊ သေသွားတာက မောင်နီ၊ ဒါကြောင့် ငါ့မှာအပြစ်မရှိဘူးလို့။ အဲဒီလိုပြောလို့ လောကီတရားဥပဒေက မောင်ဖြူကို အပြစ်မှလွတ်ခွင့်ပေးပါသလား။ အဲဒီလိုပါပဲ သူ့ဘာသာ ဘယ်နည်းနဲ့သေသေ၊ ကိုယ့်အလုပ်မဟုတ်တာကို မိမိက အငြိမ်မနေဘဲ သွားသတ်လိုက်မယ်ဆိုရင် မိမိကြောင့် သူသေသွားတာဖြစ်တဲ့အတွက် မိမိအပြစ်ဖြစ်ရတာပါ။

ဥပမာ-ငါးရာငါးဆယ်ဇာတ်တော်ထဲတွင် ဆိတ်တစ်ကောင်ဟာ သူများအသတ်ကိုသတ်ပြီး ယဇ်ပူဇော်ခဲ့တာကြောင့် ဘ၀ငါးရာတိုင်တိုင် သူများသတ်ခြင်းကို ခံခဲ့ရပါတယ်။ အဲဒီလိုခံခဲ့ရတာဟာ ယခုဆိတ်ဘ၀ကနေသေရင် ငါးရာပြည့်ပါပြီတဲ့။ အဲဒီငါးရာပြည့်မဲ့အချိန်မှာ ဆိတ်ကိုသတ်ပြီး တစ်ခြားလူများက ယဇ်ပူဇော်ဖို့ လုပ်ကြပါတယ်။ အဲဒီအခါမှာ ဆိတ်က ပြောပြပါတယ်။ မင့်တို့ငါ့ကိုသတ်ရင် မင့်တို့လည်း ငါလို့ပဲ ၀ဋ်ကြွေးတွေ ဆပ်ရလိမ့်မယ်။ ငါ့ဟာ မင့်တို့မသတ်လဲ သေရမှာပါတဲ့။ အဲဒီလိုဆိတ်ကပြောလို့ လူတွေကမသတ်ဖြစ်ပေမဲ့ ဆိတ်ဟာသေရမဲ့ကံကြောင့် မိုးကြိုးပစ်ခံရပြီး သေသွားပါတယ်။

အဲဒီတော့ မိမိတို့က သူ့အလိုလိုသေရမဲ့ကံပါတဲ့ တစ်စုံတစ်ယောက်ကို သတ်ရင်လည်း မိမိမှာဝဋ်ကြွေးဖြစ်ရပါတယ်။ ဘာဖြစ်လို့လဲဆိုတော့ မိမိက ခြေမငြိမ်နိုင်၊ လက်မငြိမ်နိုင်နဲ့ သွားကမြင်းလို့လေ။ ကားလမ်းပေါ်မှာ သူ့ဘာသာ ကားတွေပြေးနေတာကို ကိုယ်က မျက်စိနောက်တယ်ကွာဆိုပြီး ကားတွေရှေ့မှာ သွားရပ်လိုက်ရင် ကိုယ်ပဲတိုက်ခံရမှာပေါ့။ အဲဒီလိုပါပဲ သဘာဝတရားဆိုတာ အမြဲတမ်းလည်ပတ်နေတဲ့အတွက် ကိုယ်နဲ့မဆိုင်ဘူးလို့ထင်ရတဲ့အလုပ်ဖြစ်ပေမဲ့ ကိုယ့်ကိုအမှုပတ်တဲ့အရာတွေ အများကြီးပါ။ ခုလည်း မောင်ဖြူဟာ ဒီချိန်ဒီနေ့မှာ သေရမဲ့ကံပါတဲ့လူဆိုရင် ကိုယ်မသတ်လည်း သူ့အလိုလို သဘာဝကဖြစ်စေ၊ လောကကဖြစ်စေ၊ ကံကြမ္မာကဖြစ်စေ ပေးလာမဲ့ ဒဏ်တစ်မျိုးမျိုးနဲ့တော့ သေမှာပါ။ ဒါပေမဲ့ မိမိက သွားသတ်မိရင်တော့ မိမိက သွားရှုပ်မိတဲ့အတွက် အပြစ်ဖြစ်ရခြင်းပါ။ ဒါဟာ ဒီနေ့ဒီချိန်ကိုသေမဲ့လူကို သတ်ခြင်းပဲ ပြောတာပါ။ သတ္တ၀ါတစ်ဦး ဘယ်နေ့ဘယ်ချိန်သေမယ်ဆိုတာ သေချာမသိနိုင်တဲ့အတွက် သူတစ်ပါးအသက်ကိုသတ်ခြင်း မကျုးလွန်မိအောင် ရှောင်ကြဉ်ရပါမယ်။ သူတစ်ပါးကိုသတ်တဲ့အခါမှာတော့ မိမိသေစေချင်တဲ့စိတ်ဆန္ဒ အနည်းအများ၊ လုံ့အားထုတ်မှုအနည်းအများပေါ်မှာ မူတည်ပြီး အကျိုးပေးကတော့ ကွာခြားပါတယ်။

တစ်ခါ နံပါတ်(၂)အနေနဲ့ ကိုယ်ဝန်တည်နေတဲ့ သန္ဓေသားဟာ အသက်မရှိသေးဘူးဆိုပြီး သတ်ခြင်းဟာလည်း အပြစ်ဖြစ်တယ်လို့ ပြောရပါမယ်။ ဘာဖြစ်လို့လဲဆိုတော့ ဦးဇင်းတို့ရဟန်းသံဃာများ လူ့အသက်ကို မသတ်ဖို့ ပညတ်ထားတဲ့သိက္ခာပုဒ်ထဲမှာ ကိုယ်ဝန်ဖျက်ဆေးပေးရင်လည်း အပြစ်ဖြစ်တယ်လို့ ပါပါတယ်။ အဲဒီတော့ သွေးနှစ်ခုပေါင်းစပ်မိလို့ ကိုယ်ဝန်တည်နေတဲ့သန္ဓေသားဟာ လူဖြစ်ဖို့များလာပါပြီ။ အဲဒါကြောင့် အပြစ်ဖြစ်တယ်လို့ မှတ်ယူရပါမယ်။ ဒါပေမဲ့ သန္ဓေသားဟာ သီလ၊ သမာဓိ၊ ပညာတရားများမရှိသေးတဲ့အတွက် လူဖြစ်တဲ့လူကိုသတ်တာနဲ့စာရင်တော့ အပြစ်သေးနိုင်ပါတယ်။ တခြားနိုင်ငံတွေကို နေရာတကာနှိုင်းယှဉ် မကြည့်မိဖို့လည်း အရေးကြီးပါတယ်။ ဘာဖြစ်လို့လဲဆိုတော့ သူတို့ဟာ ကံအကျိုးပေးကို မယုံကြည်တဲ့လူတွေက များနေတဲ့အတွက် နေရာတကာ သူတို့လုပ်သလို လိုက်လုပ်ခြင်းမျိုး မလုပ်သင့်ပါ။

တစ်ဖန်နံပါတ်(၃)အနေနဲ့ မကောင်းမှုရှိခဲ့တဲ့လူဟာ ကောင်းမှုနဲ့အစားထိုးရင် ပြေပျောက်တယ်ဆိုတာ မှန်ပါတယ်။ ကောင်းမှုတွေဆက်တိုက်လုပ်နေလို့ မကောင်းကျိုးများ အကျိုးပေးခွင့်မရဘဲ ပျက်စီးသွားတာရှိသလို မကောင်းမှုများဆက်တိုက်လုပ်နေရင်လည်း ကောင်းကျိုးများ ပျက်စီးသွားတာ ရှိပါတယ်။ လုံးဝအစားထိုးလို့ မရတဲ့မကောင်းမှုကတော့ မိခင်သတ်၊ ဖခင်သတ်၊ ဘုရားသွေးစိမ်းတည့်အောင်လုပ်၊ ရဟန္တာသတ်၊ သံဃာသင်းခွဲ၊ မိစ္ဆာဒိဋ္ဌိအယူမှားခြင်းဆိုတဲ့ အချက်(၆)ချက်ကလွဲရင် ကျန်တဲ့မကောင်းမှုများကို ဖြေဖျောက်လို့ ရပါတယ်။ ကျန်တဲ့မကောင်းမှုအားလုံးကို ကုန်စင်အောင် ဖြေဖျောက်ချင်တယ်ဆိုရင်တော့ အင်္ဂုလိမာလလို့ ကိလေသာကင်းအောင်လုပ်ရပါမယ်။

အဲဒီတော့ မိမိက မကောင်းမှုလုပ်ခဲ့လို့ နောင်တရတယ်ဆိုရင် သိတတ်ချိန်ကစပြီး အသက်ထွက်သည့်တိုင်အောင် ကောင်းမှုများဖြင့် မွေ့လျော်အောင်လုပ်ပေးမယ်ဆိုရင်တော့ သေခါနီးလည်း ကောင်းကျိုးနိမိတ်များ ထင်လာနိုင်တဲ့အတွက် ကောင်းသောဘုံဌာနသို့ရောက်ရှိကာ ကောင်းကျိုးများ ခံစားရပါလိမ့်မယ်။ မိမိကသာ နေ့စဉ် ဒါန၊ သီလ၊ ဘာဝနာ၊ အများအကျိုး ပရဟိတလုပ်ငန်းများဖြင့် ဘ၀ကိုဖြတ်သန်းသွားဖို့ အရေးကြီးပါကြောင်း ပြောကြားရင်း အဖြေလုံလောက်မည်ထင်လို့ အဆုံးသတ်လိုက်ပါတယ်။

2 comments:

Anonymous said...

သာဓု သာဓု သာဓု

သုမွန် said...

သံသယများ ရှင်းသွားလို့ ကျေးဇူးအထူးတင်ပါတယ်ဦးဇင်းဘုရား.။

Post a Comment

Powered by Blogger.