Monday, August 29, 2011

ဥပုသ်နဲ့ (Chatting)ချက်တင် ၀င်လို့ရပါသလား

အမေး။ ။ အရှင်ဘုရား မနက်ဖြန် လပြည့်နေ့မှာ တပည့်တော် ဥပုသ်သီလ ယူလိုပါတယ်ဘုရား။ ဥပုသ်ယူပြီး လုပ်ငန်းခွင်ကိုရောက်တဲ့အခါ အင်တာနက်သုံးတာ ချက်တင်ဝင်တာ(Chatting) အပြစ်ရှိနိုင်ပါသလား အရှင်ဘုရား။ ကရုဏရှေ့ထားပြီး ဖြေကြားပေးတော်မူပါ အရှင်မြတ်ဘုရား ။

မနှင်းလွင်လွင်ကျော်
မကွေး



အဖြေ။ ။ ဥပုသ်သီလနဲ့ အင်တာနက်သုံးတာ ချက်တင်ဝင်တာ အပြစ်ရှိတယ်လို့ တစ်ထစ်ချကြီး ပြောလို့မရပါဘူး။ ယခုအခါ အင်တာနက်စာမျက်နှာများဟာ ဘာသာရေးသီးသန့်လဲ အများကြီးရှိသလို ဘာသာရေးမဟုတ်တဲ့ တစ်ခြားလူမှုရေးဆိုက်တွေ၊ စီးပွားရေးဆိုက်တွေလဲ အများကြီးပါ။ ထိုစာမျက်နှာများအနက် လူမှုရေးနဲ့ စီးပွားရေး အိမ်ထောင်ရေးစတဲ့ဆိုက်များကို ၀င်မယ်ဆိုရင်တော့ သီလကျိုးပေါက်ဖို့များပါတယ်။ ဘာသာရေးသက်သက်ရေးထားတဲ့ ၀က်ဘ်ဆိုက်တွေကို ၀င်ဖတ်တယ်ဆိုရင် ကုသိုလ်တောင်ရပါသေးတယ်။

နောက်တစ်ခုက (Chatting)ချက်တင်ဝင်တာနဲ့ပတ်သက်ပြီး ချက်တင်ဝင်တယ်ဆိုတာ အင်တာနက်ကနေ တစ်ဦးနဲ့တစ်ဦး စကားစမြည် ပြောကြတာပါ။ စကားပြောတဲ့နေရာမှာ တရားဆွေးနွေးရင်တော့ ကုသိုလ်ရတာပေါ့။ လောကုတ္တရာနှင့်မစပ်တဲ့ ဟိုအကြောင်းဒီအကြောင်းတွေပြောနေမယ်၊ အရည်မရအဖတ်မရတာတွေပြောနေမယ်၊ ကိလေသာတိုးပွားကြောင်းတွေပြောနေမယ်ဆိုရင်တော့ သီလကျိုးနိုင်ပါတယ်။ သီလကျိုးမကျိုးကိုတော့ မိမိဆောက်တည်ထားတဲ့ ရှစ်ပါးသီလနှင့်မအပ်စပ်တာကို မလုပ်ဘဲ ကိလေသာဖြစ်ကြောင်းများကို ရှောင်ကြဉ်မယ်ဆိုရင်တော့ အကောင်းဆုံးပါ။

ဖြစ်နိုင်ရင်တော့ တစ်ပါတ်မှတစ်ရက်သာစောင့်ထိန်းတဲ့ ဥပုသ်သီလလေးစင်ကြယ်အောင် ဥပုသ်သီလစောင့်တဲ့နေ့မှာ ချက်တင်မလုပ်ဘဲ ကျန်တဲ့တရားဆိုဒ်များကိုသာ ကြည့်ရှု့လေ့လာတာက အကောင်းဆုံးပါ။

ဦးကောဝိဒ(မြိတ်) http://venkawwida.com/မှ

0 comments:

Post a Comment

Powered by Blogger.