Thursday, January 13, 2011

ဆန်နီနေမင်း အမေးအဖြေ သံဃာတုကို လှူမိခဲ့လျှင်

အရှင်ဘုရား။ တကယ်လို့ ရဟန်းမစစ်တဲ့ ကိုယ်တော်ကို ကိုးကွယ်မိရင် ဘယ်လိုအကျိုးယုတ်မှုတွေ ဖြစ်နိုင်ပါသလဲ။ ဥပမာ သင်္ကန်းဝတ်နဲ့ မမြင်ကွယ်ရာမှာ လုပ်ချင်တာလုပ်တဲ့ ကိုယ်တော်မျိုးကို ဆိုလိုတာပါဘုရား။ အဲလိုရဟန်းမျိုးကို လှူမိရင် မကောင်းမှုလုပ်တာကို အားပေးရာရောက်တယ်လို့ ကြားဖူလို့ပါ။ ရှင်းပြပေးပါဘုရား။

အင်း... ဒကာမေးတဲ့ မေးခွန်းလေးက ဦးဇင်းတို့ ဗုဒ္ဓဘာသာမှာ တော်တော်လေးကို သံသယဖြစ်နေကြမဲ့ မေးခွန်းလေးပါပဲ။ မိမိက ရဟန်းစစ်မစစ်ကို အရင်သိအောင် လေ့လာစုံစမ်းဖို့တော့ လိုပါတယ် ဒကာ။ ဥပမာ..ဒီရဟန်းသည် ရဟန်းယောင်ဆောင်ကာ လုပ်စားနေသော ရဟန်းလား။ ရဟန်းစစ်ပါလျက် ရဟန်းနဲ့မသင့်လျော်သည့်အရာများကို ပြုလုပ်နေသော ရဟန်းလားဆိုတာကို သေချာစမ်းသပ် လေ့လာစုံစမ်းပါ။


ထိုသို့ မစုံစမ်းမလေ့လာဘဲ သံဃာစစ်ကို သံဃာတုဟု စွပ်စွဲမိပါက လူပုဂ္ဂိုလ်များမှာ အပြစ်များစွာ ဖြစ်သောကြောင့် သေချာစုံစမ်းဖို့ရန်တော့ လိုပါတယ်။

ရဟန်းမစစ်ဘဲ ရဟန်းယောင်ဆောင်ထားသော ပုဂ္ဂိုလ်ကို လှူမိလျှင် လှူသောလူမှာ အပြစ်မရှိပါပေ။ ရဟန်းယောင်ဆောင်ထားသော ပုဂ္ဂိုလ်မှာသာလျှင် သာသနာကို အလွဲသုံးစားလုပ်သောကြောင့် ငရဲကိုလားစေနိုင်သော ကြီးစွာသော ပြစ်မှုဖြစ်ပါသည်။

ရဟန်းတော့ စစ်ပါသည်။ သို့သော် ရဟန်းနဲ့မသင့်လျော်သည့် အရာများကို ပြုလုပ်သောပုဂ္ဂိုလ်ကို လှူမိလျှင်လည်း လှူသောသူများမှာ အပြစ်မဖြစ်ပါ။ သို့သော် ရဟန်းဖြစ်ပြီး ရဟန်းနဲ့မသင့်လျော်သည့် ၀ိနည်းစည်းကမ်းများကို ဖောက်ဖျက်ပါက ဆိုင်ရာဝိနည်းစည်းကမ်းအလိုက် အပြစ်ရှိပေသည်။ ဥပမာ...ရဟန်းဖြစ်အောင် သိမ်ဝင်ထားသော သံဃာသည် (၁) မေထုန်အမှုကိစ္စ ပြုလုပ်ခြင်း၊ (၂) ပစ္စည်းဥစ္စာ ခိုးယူလည်ပတ်လိမ်ယူခြင်း၊ (၃) လူကိုသတ်ခြင်း၊ လူသေစေလောက်သော အရာဝတ္ထုများကို သူတစ်ပါးအားပေးခြင်း၊ ခိုင်းခြင်း၊ (၄) ဈာန်တရား မဂ်တရားစတဲ့ တရားထူးများ မရရှိဘဲ ရရှိသည်ဟု သူများနားလည်ယုံကြည်အောင် ပြောဆိုခြင်းများ ပြုလုပ်ပါက ထိုသံဃာသည် ငရဲကိုလားစေတတ်သော အပြစ်များ ဖြစ်ပေသည်။

ထိုလေးမျိုးသော အပြစ်ကြီးများမှအပ အခြားသော အပြစ်များသည် သိမ်ဝင်ထားသော ရဟန်းဖြစ်ပါက ကုစားလို့ရသောကြောင့် ကြီးလေးသော အပြစ်မဟုတ်ပါ။ သို့သော် လူမြင်မကောင်းသည့်အရာများကို လူမြင်အောင်ပြုလုပ်သော အခြားအပြစ်များသည်လည်း သာသနာထိခိုက်သောကြောင့် ထိုက်သင့်သော အပြစ်များ ရှိပေသည်။

လှူဒါန်းသူနှင့် အလှူခံသည့်ပုဂ္ဂိုလ်နှစ်ဦးမှာ လှူဒါန်းသူဘက်က အပြစ်မရှိပါ။ အလှူခံပုဂ္ဂိုလ်မှာသာလျှင် အလှူခံထိုက်သော ဂုဏ်မရှိလျှင် အပြစ်ရှိပေသည်။ လှူဒါန်းသူများမှာ စိတ်ထားပေါ်မူတည်၍ အကျိုးနည်းများမှုသာ ကွာခြားပါသည်။

လှူဒါန်းမည့် ဒကာ ဒကာမများသည် မည်သည့်သံဃာကိုမဆို မိမိက လှူဒါန်းမည်ဆိုလျှင် မိမိလှူဒါန်းသူ၏ ဂုဏ်သိက္ခာ သမာဓိတို့ကို အာရုံမပြုဘဲ သံဃာအားလုံး၏ ဂုဏ်တော်များကို အာရုံပြုကာ လှူဒါန်းမည်ဆိုလျှင် မရေတွက်နိုင်သော အကျိုးများ ရရှိပါသည်။ အကယ်၍ မိမိသည် သံဃာ့ဂုဏ်ကို အာရုံပြုရန် ခက်ခဲပြီး သံဃာကောင်း သံဃာစစ် သီလ၊ သမာဓိ၊ ပညာစတဲ့ တစ်ခုခုသော ဂုဏ်များနဲ့ပြည့်စုံသော သံဃာမှသာ လှူဒါန်းချင်လျှင်တော့ သေချာစုံစမ်းလေ့လာ၍ လှူဒါန်းမှု ပြုလုပ်ပါလေ။

မြတ်ဗုဒ္ဓအလိုအရ နောင်အချိန် သာသနာကွယ်ခါနီးကာလတွင် လက်မှာသင်္ကန်း ပတ်ထားသော လူကိုတောင်မှ သံဃာအမှတ်ဖြင့် သံဃာ့ဂုဏ်ကို အာရုံပြုပြီး လှူဒါန်းလျှင် ရှင်သာရိပုတ္တရာအစရှိသော ရဟန္တာများအပါအ၀င် သံဃာအားလုံးအား လှူဒါန်းရာ ရောက်သောကြောင့် အကျိုးပေးများသည်ဟု ဟောကြားထားသည်ကို ထောက်ဆလျှင် မိမိတို့၏ စိတ်စေတနာသည် အဓိကကျပေသည်။

နိဂုံးချုပ်အနေဖြင့် ပြောချင်သည်မှာ လှူဒါန်းမည့် ဒကာ ဒကာမများသည် အကယ်၍ မိမိ၌ လှူဒါန်းချင်သော စေတနာလည်းဖြစ်နေ၊ လှူဒါန်းရန်လည်း ပစ္စည်းဝတ္ထုကအရန်သင့်၊ အလှူခံပုဂ္ဂိုလ်ကလည်း မိမိရှေ့တွင် ရောက်နေပါက မိမိလှူမည့် အလှူခံပုဂ္ဂိုလ်၏ သီလ၊ သမာဓိ၊ ပညာတို့ကို မိမိက မသိထားလျှင် သံဃာ့ဂုဏ်ကို အာရုံပြုကာ လှူဒါန်းမှု ပြုလုပ်ပါလေ။

တကယ်တော့ အလှူခံနှင့် လှူသူနှစ်ဦးတွင် လှူသည့်ပုဂ္ဂိုလ်၌ အပြစ်မရှိသော ကြောင့် မိမိစေတနာထားတတ်ဖို့ရန်သာ မိမိ၏အကျိုးပေးပေါ်မူတည်နေသဖြင့် မိမိရဲ့ စိတ်စေတနာလေးကို ကောင်းမွန်စွာ ထားတတ်အောင်သာ ကျင့်ကြံကြိုးစား အားထုတ်ပေးပါလို့ ပြောကြားရင်း အားလုံး ရခဲလှတဲ့ လူ့ဘ၀လေး မကုန်ခင်မှာ ဒါန၊ သီလ၊ ဘာဝနာများကို နေ့စဉ်မပြတ် ပြုလုပ်နိုင်ကြပါစေလို့ ဆန္ဒပြုလျက်...............။

0 comments:

Post a Comment

Powered by Blogger.