Friday, January 7, 2011

ကံတရားနှင့်အပျော်အပါး

အင်း ရေးစရာဘာရှိလည်းလို့ စဉ်းစားလိုက်တော့ ရခဲလှတဲ့ လူ့ဘ၀လေးရနေချိန်မှာ အပျော်ပါးပဲ ဦးစားပေးပြီး ဘ၀ဆက်တိုင်းကောင်းကျိုးခံစားရမည့် ကောင်းမှုလုပ်ဖို့တော့ မေ့နေကြတဲ့ လူသားများအတွက် သတိပေးစာရေးအုန်းမယ်ဆိုပြီး ဒီခေါင်းစဉ်ကို ပေးလိုက်တာပါ။ လူသားများသည် ကောင်းမှုလုပ်ဖို့ကိုသာ အပျော်ပါးကိစ္စလောက် စိတ်ဝင်စားမယ် လုပ်ကိုင်ဆောင်ရွက်မယ်ဆိုလျှင် လူ့ဘ၀ရရကျိုး နပ်ပါလိမ့်မယ်။ သို့သော် များသောအားဖြင့် လူသားတို့သည် လူ့ဘ၀ရလာတာကို အပျော်ပါးလုပ်ဖို့ပဲဟု ထင်မြင်ယူဆနေကြကာ အပျော်အပါးအတွက်ပဲ အားထုတ်ကြံစည် ပြုလုပ်နေကြတယ်လေ။


လူ့ဘ၀ရခဲပုံကိုလည်း စာရေးသူ အရင်ပို့စ်များ၌ ရေးသားခဲ့ပြီးဖြစ်၍ ဤနေရာမှာ မရေးချင်တော့ပါ။ လူ့ဘ၀သည် တကယ်တော့ ကောင်းမှုကုသိုလ်လုပ်ဖို့အတွက် အကောင်းဆုံးသောနေရာပါ။ ဘာဖြစ်လို့လဲဆိုတော့ နတ်ဘုံသည် သတ္တ၀ါတို့အတွက် ပျော်ပါးစရာ အကောင်းဆုံးသောနေရာဖြစ်ပြီး လူ့ဘုံသည် ကောင်းမှုကုသိုလ်လုပ်ရန် အကောင်းဆုံးသော နေရာဌာနတစ်ခုဖြစ်ပေသည်။ ဒါ့ကြောင့် သူတော်ကောင်းများသည် လူ့ဘ၀ထက် အဆပေါင်းများစွာသာလွန်အောင် ပျော်ရွှင်စရာကောင်းတဲ့ နတ်ဘုံကိုရောက်သော်လည်း မပျော်ရွှင်နိုင်ဘဲ လူ့ဘ၀ကို ကောင်းမှုကုသိုလ်လုပ်ချင်ကြ၍ လူ့ဘ၀ကိုပဲ ရချင်ကြသည်။

ဒီလို ရခဲလှတဲ့ လူ့ဘ၀၊ ကောင်းမှုလုပ်ဖို့ရန် အခွင့်ကောင်းတဲ့လူ့ဘ၀၊ သာသနာထွန်းကားချိန်မှာ လူ့ဖြစ်နေရတဲ့ လူ့ဘ၀၊ ကောင်းမှုလုပ်ရင် ကောင်းတာဖြစ်မယ်ဆိုတဲ့ အသိဉာဏ်လေးရှိနေတဲ့ လူ့ဘ၀မှာ အပျော်ပါးပဲ လိုက်စားကြံစည်ပြုလုပ်နေမည်ဆိုလျှင် ဘယ်လောက်များ ၀မ်းနည်းစရာ ကောင်းလိုက်မလဲ။ ဒီလို အပျော်ပါးကိစ္စနဲ့ လူ့ဘ၀လေး ကုန်ဆုံးသွားမည်ဆိုလျှင် ကျန်တဲ့ဘုံက သတ္တ၀ါတွေက အော် တယ်မိုက်တဲ့ လူပါလားလို့ အပြစ်အတင်းတွေ ပြောနေကြပေလိမ့်မည်။

နောက်တစ်ခုက လူသားတွေသည် ကံတရား၏ အကျိုးပေးပုံကိုလည်း သေချာမသိ၊ သေချာနားမလည်၊ အကြွင်းမဲ့ယုံကြည်မှုမရှိ၊ ယောင်ဝါးဝါးဖြစ်နေကြ၍ ကောင်းမှု မကောင်းမှုတို့ကို သေချာမခွဲခြား ဂရုမမှုဘဲ ဖြစ်ချင်သည့်ဆန္ဒစိတ်ကိုသာလျှင် ရှေးတန်းတင်ကာ လုပ်နေကြသည်။

ကံတရားဆိုသည်မှာ မိမိလုပ်ခဲ့တဲ့ ကောင်းမှု မကောင်းမှုများက သူ့အချိန်တန်လျှင် အကျိုးပေးလာပါတယ်။ ကံတရားသည် မြင်ရတဲ့အရာမဟုတ်သလို တည်နေရာဌာနလည်း အတိအကျ မသိကြသည့်အတွက် ကံတရား၏အကျိုးပေးခြင်းကို ဂရုမစိုက်ဘဲ လုပ်ချင်ရာကိုသာ စဉ်းစားပြီး လုပ်နေကြခြင်း ဖြစ်ပေသည်။

တကယ်တော့ ကံတရားသည် မြင်၍ရအပ်တဲ့အရာလည်း မဟုတ်သလို တည်ရာဌာနလည်း အတိအကျပြောဆိုဖို့ရန် ခက်ခဲလှပါတယ်။ ဒါဆို ကံတရားကအကျိုးပေးတယ်၊ ကောင်းမှုလုပ်ရင် ကောင်းကျိုးရတယ်၊ မကောင်းမှုလုပ်ရင် မကောင်းကျိုးရတယ်ဆိုတာ ဘယ်ဖြစ်နိုင်မလဲလို့ စောဒကတတ်လာနိုင် ကံတရားအကျိုးပေးကို ယုံကြည်မှု ကင်းမဲ့လာနိုင်ပါတယ်။

ဒါ့ကြောင့် ဒီနေရာမှာ ရှင်နာဂသိန်နှင့်မိလိန္ဒမင်းကြီးတို့၏ အမေးအဖြေထဲမှ ကံတရားနှင့်ပတ်သတ်၍ မေးဖြေထားပုံကို တင်ပြပေးလိုက်ပေသည်။ မိလိန္ဒမင်းကြီးက ရှင်နာဂသိန်ရဟန္တာမထေရ်ကို ''အရှင်ဘုရား...ကံတရားသည် တည်ရာဌာန ရှိပါသလား"လို့ မေးတဲ့အခါ ရှင်နာဂသိန်မထေရ်မြတ်က ''မင်းကြီး...သရက်ပင်တစ်ပင်မှာ အသီးမသီးသေးခင် သရက်သီးသည် ဘယ်နေရာမှာ ရှိပါသလဲ"လို့ မေးမြန်းလိုက်ပါတယ်။ ထိုအခါ မင်းကြီးက အရှင်ဘုရား..သရက်သီး၏ တည်ရာဌာနကို မမြင်ရသလို ဘယ်နေရာမှာ တည်ရှိနေသလဲဆိုတာလည်း မသိနိုင်ပါဘုရားလို့ ပြန်လျှောက်ပါတယ်။ အဲဒီလို ဖြေကြားတဲ့အခါ ရှင်နာဂသိန်မထေရ်က မင်းကြီး...ထို့အတူပဲ ကံတရားဆိုတာ တည်ရာဌာန အတိအကျမသိနိုင် မမြင်နိုင်သော်လည်း သရက်ပင်မှ သရက်သီးသည် အချိန်တန်လျှင်သီးလာသလို ကံတရားဟာလည်း အချိန်တန်လျှင် ဆိုင်ရာဆိုင်ရာ အကျိုးပေးမဲ့ အစွမ်းသတ္တိရှိပါတယ်မင်းကြီးလို့ မိန့်ကြားတော်မူခဲ့ပါတယ်။။ သရက်ပင်မှ သရက်သီးသည် အချိန်တန်လျှင် အသီးဖြစ်လာသလို ကံတရားဟာလည်း ကောင်းမှုများတဲ့ချိန် ကောင်းကျိုးကိုပေးပါတယ်။ မကောင်းမှုများတဲ့ချိန် မကောင်းမှုကို ပေးနေစမြဲဖြစ်ပေသည်။

ဒါကိုကြည့်သောအားဖြင့် ကံတရားရဲ့ သဘောသဘာဝကို နားလည်မယ် ထင်ပါတယ်။ ကံတရားသည် အရင်ဘ၀တွေက ကောင်းမှုနှင့်ယခုမျက်မှောက်ဘ၀ ကောင်းမှုတွေကများနေရင် ကောင်းကျိုးကို ပေးပါတယ်။ အကယ်၍ အရင်းဘ၀တွေက မကောင်းမှုတွေများပြီး ဒီဘ၀မှာလည်း မကောင်းမှုတွေများနေမယ်ဆိုရင် မကောင်းကျိုးတွေ ပေးနေပါမယ်။

ဒီသဘောတရားကိုမသိကြသော လူသားအချို့သည် ယခုဘ၀မှာ ကောင်းတာလုပ်သော်လည်း မကောင်းကျိုးက အကျိုးပေးနေသည်ကို ခံစားရသောအခါ ကံတရားကို မယုံသလိုဖြစ်လာကာ ကံတရားယုံကြည်မှုမရှိတဲ့ နေရာဌာနများသို့ အလိုက်မှားသွားတတ်ကြသည်။ ဒီဘ၀မှာ ကောင်းမှုလုပ်သော်လည်း အရင်းဘ၀တွေက မကောင်းမှုများခဲ့၍ မကောင်းကျိုးကို ခံစားနေရလျှင် ''ငါသည် နောက်နောင်ဘ၀တွေမှာ ယခုလို မကောင်းကျိုးများ မခံစားရအောင် ယခုသိတတ်တဲ့ လူ့ဘ၀လေး၌ ကောင်းမှုများများလုပ်မည်ဟု စိတ်ဆုံးဖြတ် လုပ်ကိုင်သင့်ပေသည်။ သို့မှသာလျှင် သံသရာ၌ ကိုယ်စိတ်နှစ်ပါး ချမ်းသာစွာဖြင့် နေထိုင်သွားရပါလိမ့်မည်။

မိမိတို့ လူ့ဘ၀လေးရနေချိန်မှာ ကံတရားသဘောကို သေချာနားလည်ယုံကြည်ကာ လူ့ဘ၀မကုန်ခင်၌ မကောင်းမှုများသာ ဖြစ်လေ့ရှိပြီး မကောင်းကျိုးများသာ ပေးတတ်သော အပျော်အပါးအတွက်ပဲ အားထုတ်ကြံစည် ပြုလုပ်ခြင်းများလျှော့ကာ ကောင်းမှုများကို အရင်က အပျော်ပါးအတွက် ပြုလုပ်ကြံစည်သလို ပြုလုပ်ကြပါလို့ ဆန္ဒပြုရင်း နိဂုံးချုပ်လိုက်ရပေသည်။

မှတ်ချက်။ စာရေးသူ ဘလော့တင်တိုင်း မေးလ်မှတဆင့် ဖတ်ချင်သောဆန္ဒရှိပါက စာရေးသူအကောင့်ကို အပ်ထားနိုင်ပါသည်။

0 comments:

Post a Comment

Powered by Blogger.